မဲခေါင်၊ မတ်လ ၈ ရက်
တာချီလိတ် စစ်ဗျူဟာက G2 နှင့် ဝမ်ကောင်းပြည်သူ့စစ်ပေါင်းပြီး ရပ်ကွက်တွေအတွင်းရှိ လောင်းကစားရုံနှင့် မူးယစ်ဆေးဝါးရောင်းချသည့်နေရာများကို လိုင်းကြေးကောက်ကာ အကာအကွယ်ပေးထားသည့်အပြင် ဖမ်းဆီးရေးမှ ရရှိသည့် သက်သေခံပစ္စည်းများကိုလည်း ပြန်မအပ်ဘဲ ခွဲတမ်းချယူထားကြောင်း မဲခေါင်းသတင်းဌာနက စုံစမ်းသိရသည်။
တာချီလိတ် အခြေချစစ်ဗျူဟာက G2 ဗိုလ််မှူး ညီညီအောင်ထွေးနှင့် ဝမ်ကောင်းပြည်သူ့စစ် စည်သူတို့သည် ဝမ်ကောင်းရပ်ကွက်အတွင်းရှိ ငါးပစ်ခုံ၊ ဘိန်းစာရွက်ရည်နှင့် သုသာန်အနီး မူးယစ်ဆေးဝါးရောင်းချသည့်နေရာများကို လစဉ်ကြေး လိုင်းကြေးကောက်ယူထားခြင်းဖြစ်ပြီး အကာအကွယ်ပေးထားသည့်အပြင် စီမံချက်ရှိပါက ဒုစရိုက်မှုသမားများကို ဖမ်းဆီးရေးအတွက်ကြိုတင်သတင်းပေးကာ ရှောင်တိမ်းခိုင်းခြင်းများရှိကြောင်း သိရသည်။
ဝမ်ကောင်းပြည်သူ့စစ် စည်သူသည် ရပ်ကွက်အတွင်း ဘိန်းစာရွက်ရည်ရောင်းချသည့် ဆိုင်တစ်ဆိုင်ကို လစဉ်ကြေးအဖြစ် ဘတ်ငွေ ၅၀၀၀၊ ငါးဂိမ်းခုံတစ်ခုံလျှင် ဘတ်ငွေ ၅၀၀၀နှင့် မူးယစ်ဆေးဝါးလက်လီရောင်းချသူများကို တစ်ဦးကို ဘတ်ငွေ ၃၀၀၀ နှုန်းဖြင့် ပြည်သူ့စစ်ရန်ပုံငွေအတွက်ဟုဆိုကာ လစဉ်ကြေားများ ကောက်ခံနေခြင်းဖြစ်ကြောင်း လုံခြုံရေးအဖွဲ့နှင့်နီးစပ်သူတစ်ဦးက ပြောသည်။
“G2 နဲ့ စည်သူက အတွဲမိတယ်၊ တရုတ်တွေဖမ်းတုန်းကဆိုရင် ဖမ်းဆီးရေးအိမ်က ပစ္စည်းတွေ ကားနဲ့တိုက်ပြီးသယ်တာ ပြီးရင် G2 နဲ့ ခွဲတမ်းချပြီးယူကြတာ G2 ကလဲ ဟိုတယ်တာချီလိတ်လမ်းထိပ်မှာ KTV ဖွင့်ထားတယ် သူ့ KTV မှာ Happy Water, K က အစအကုန်ရတယ်၊ ဖမ်းဆီးရေးက ရတဲ့ပစ္စည်းတွေကို သူ့ KTV ဆိုင်မှာ ပြန်ရောင်းတာ” ဟု ၎င်းက ပြောသည်။
ဗျူဟာတွင် G2 အဖြစ်တာဝန်ယူထားသည့် ဗိုလ်မှူး ညီညီအောင်ထွေးမှာ ယခင်က ထွက်စာတင်ထားသည့်အတွက် အရန်အင်အားကိုပို့ထားခံရသော်လည်း ယခုလက်ရှိ ဗျူဟာတွင် အင်အားမရှိသည့်အတွက် ပြန်လည်ခေါ်ယူထားခြင်းဖြစ်ပြီး မြို့ပေါ်ရှိ လောင်းကစားနှင့် တရားမဝင်လုပ်ငန်းပေါင်းစုံထံမှ လိုင်းကြေးတွေလစဉ်ရရှိနေသည့်အတွက် နှစ်အနည်းငယ်အတွင်း ငွေကြေးချမ်းသာလာကာ တပ်မှထွက်ရန် ထွက်စာတင်ထားခြင်းဖြစ်သည်။
ထို့အပြင် ဗိုလ်မှူးညီညီအောင်ထွေးမှာ လွယ်စီတုံကျေးရွာအတွင်း၌ ကြီးစိုးနေသည့် ဆယ်အိမ်မှူးဝင်းဇော်ထိုက်နှင့် ကုလားမောင်ကျော်တို့နှင့် ပူးပေါင်းကာ လယ်မြေများမြေဖို့ အကွက်ရိုက်ရောင်းခြင်း၊ တောင်ဖြိုကာ မြေကွက်ရိုက်ရောင်းချခြင်းများ ပြုလုပ်နေကြောင်း သိရသည်။
လွယ်စီတုံကျေးရွာမှာ ဆယ်အိမ်မှူးဝင်းဇော်ထိုက်မှာ ကျေးရွာအတွင်း မြေအရောင်းအဝယ်ပြုလုပ်ပါက ဘတ် ၃သောင်းကောက်ခံပြီး ၎င်းကိုယ်၎င်း ဒုတိယ ဒုဌာဂါမဏိဘွဲ့ခံယူထားသူဖြစ်ကြောင်း ရွာခံများက ပြောသည်။
ပြီးခဲ့တဲ့ ရက်ပိုင်းက မကာဟိုခမ်းရပ်ကွက်အတွင်း J-My King(သင်္ဘောဟိုတယ်)အနီးဖွင့်လှစ်ထားသည့် ဘိန်းစာရွက်ရည်ရောင်းချသည့် (ဘိုင်ကထောင့်)ဆိုင်တစ်ဆိုင်တွင် ထိုင်သောက်နေကြသည့် အသက် ၁၅ နှစ်ဝန်းကျင်အရွယ် ကလေးများအချင်းချင်းစကားများချိန်တွင် ဗိုလ်မှူး ညီညီသွေး(G2) နှင့် ဝမ်ကောင်းပြည်သူ့စစ် စည်သူတို့အဖွဲ့ရောက်ရှိလာပြီး ကလေးများကို လက်ကျိုးအောင်ရိုက်လိုက်ကြောင်း သိရသည်။
#MeKongNews
#လိုင်းကြေး
#မူးယစ်ဆေးဝါး
#စစ်ဗျူဟာ
#G2
#ပြည်သူ့စစ်
#ဝမ်ကောင်း
#တာချီလိတ်
