မဲခေါင်၊ မတ် ၂
စစ်ကောင်စီ၏ နေရာပြောင်းစစ်တိုင်း အရှေ့မြောက်တိုင်းစစ်ဌာနချုပ် – ရမခ တိုင်းမှူး ဗိုလ်ချုပ်မြင့်ကျော်ထွန်းနှင့် ဗျူဟာမှူး ၂ ဦး ဖမ်းဆီးအရေးယူခံရခြင်းမှာ တရုတ်နိုင်ငံဘက်မှ နေရာအတိအကျ၊ လူစာရင်းအတိအကျဖြင့် ကျားဖြန့်လုပ်ငန်းများကို ဖမ်းဆီးခိုင်းသော်လည်း လာဘ်ငွေယူကာ မဖမ်းပေးသည့်အတွက်ဖြစ်ကြောင်း ဒေသတွင်း သတင်းရင်းမြစ်က မဲခေါင်ကိုပြောသည်။
၁၀၂၇ စစ်ဆင်ရေး ပထမလှိုင်းမစတင်မီ ကျားဖြန့်များကို အလိုရှိကြောင်း တရုတ်နိုင်ငံမှ အမိန့်ထုတ်စဉ်က ကျားဖြန့်လုပ်ကိုင်သူများမှာ တန့်ယန်းဘက်သို့ ထွက်ပြေးသွားခြင်းဖြစ်ပြီး မန်ပန် ပြည်သူ့စစ်နယ်မြေတွင် ခိုလှုံနေကြောင်း၊ တရုတ်နိုင်ငံမှ နောက်တကြိမ် နေရာနှင့် လူစာရင်းအတိအကျပေးပြီး ဖမ်းခိုင်းချိန်တွင် “ဝ” ပြည်သွေးစည်းညီညွတ်ရေးတပ်ဖွဲ့ – UWSA မှ ဖမ်းဆီးပေးခဲ့သော်လည်း မြန်မာစစ်တပ်ဘက်မှ ဖမ်းဆီးနိုင်ခြင်း မရှိခဲ့ကြောင်း၊ ယင်းအချက်ကြောင့် ရမခတိုင်းမှူးနှင့် ဗျူဟာမှူးများကို အရေးယူခြင်းဖြစ်ကြောင်း သတင်းရင်းမြစ်က မဲခေါင်ကိုပြောသည်။
တန့်ယန်းဒေသရှိ ရွာများတွင် ကျားဖြန့်လုပ်ကိုင်သူ ထောင်နှင့်ချီရှိနေပြီး ၎င်းတို့ကို မြန်မာစစ်တပ်တာဝန်ရှိသူများက လာဘ်ငွေယူကာ စောင့်ရှောက်ထားကြောင်း၊ မိုင်းရယ်နှင့် တန့်ယန်းတို့တွင် စစ်ဗျူဟာ အခြေချသော်လည်း ဖမ်းဆီးပေးနိုင်ခြင်းမရှိကြောင်း ဒေသခံတစ်ဦးက မဲခေါင်ကိုပြောသည်။
ယင်းအခြေအနေများကြောင့် ရမခတိုင်းမှူး၊ တန့်ယန်းဗျူဟာမှူးနှင့် မိုင်းရယ်ဗျူဟာမှူးတို့ကို စစ်ကောင်စီက ကိုယ်တိုင်ဖမ်းဆီးခဲ့ခြင်းဖြစ်ပြီး ၎င်းတို့နေရာတွင် ရမခတိုင်းမှူးအဖြစ် OTS ၉၄ မှ ဗိုလ်မှူးချုပ်အေးမင်းသိန်း၊ မိုင်းရယ်ဗျူဟာမှူးအဖြစ် DSA ၄၆ မှ ဗိုလ်မှူးကြီး သူရိန်မင်းသိန်း၊ တန့်ဟန်းဗျူဟာမှူးအဖြစ် ဗိုလ်မှူးကြီးကျော်မျိုးမြင့်တို့ကို ပြောင်းလဲခန့်အပ်ထားကြောင်း မဲခေါင်က စုံစမ်းသိရသည်။
ဇော်မြင့်
#MeKongNews
#ကျားဖြန့်
#ရမခ
#ဗိုလ်ချုပ်ကျော်မြင့်ထွန်း
#မိုင်းရယ်
