မဲခေါင်၊ မတ် ၁
ထိုင်းအာဏာပိုင်များသည် နိုင်ငံအတွင်းတရားမဝင် ဝင်ရောက်လာမှုအကြောင်းပြချက်ဖြင့် ၁၁ နှစ်ကြာ ဖမ်းဆီးထားခဲ့သော ဝီဂါ မွတ်ဆလင် ၄၅ ယောက်ကို တရုတ်နိုင်ငံသို့ လွှဲပြောင်းပေးခဲ့ရာ ကမ္ဘာတစ်ဝန်း လူ့အခွင့်အရေးအသိုင်းအဝိုင်းများသာမက ထိုင်းလွှတ်တော်အမတ်များ၏ လူ့အခွင့်အရေးချိုးဖောက်မှု၊ နိုင်ငံတကာဥပဒေကို မျက်ကွယ်ပြုမှုဟု ပြင်းထန်စွာ ဝေဖန်မှုများ ရှိလာခဲ့သည်။
ဝီဂါမွတ်ဆလင်များသည် တူရကီနွယ်ဖွား လူမျိုးစုများဖြစ်ကာ တရုတ်နိုင်ငံအနောက်မြောက်ပိုင်း ရှင်းကျန်းဒေသတွင် ကိုယ်ပိုင်အုပ်ချုပ်ခွင့်ရဒေသအသွင် နေထိုင်လာခဲ့ရာ စုစုပေါင်း လူဦးရေ ၁၂ သန်းဝန်းကျင်ရှိနေသည်။
ထိုအခြေအနေတွင် အကြမ်းဖက်လာမည့် အန္တရာယ်ပေးနိုင်သော လူမျိုးစုဟုဆိုကာ တရုတ်အစိုးရက ဝီဂါမျိုးနွယ်စုပေါင်း ၁ . ၂ သန်းကျော်ကို မြို့ကြီးတစ်ခုပုံစံ အကျဉ်းထောင်အဆောက်အအုံကြီးများ ဆောက်လုပ် အကျဉ်းချနေထိုင်စေပြီး လူ့အခွင့်အရေးလုံး၀မပေးသော ဖိနှိပ် သတ်ဖြတ်မှုများပြုလုပ်နေသဖြင့် လူမျိုးတုံး သတ်ဖြတ်မှုဟု နိင်ငံတကာက စွပ်စွဲနေခဲ့သည်မှာ ကြာခဲ့ပြီဖြစ်သည်။
ထို့ကြောင့် ဝီဂါ ၄၅ ယောက်ကို ထိုင်းအစိုးရက တိတ်တဆိတ် တရုတ်ထံ လွှဲအပ်ပေးခဲ့ရာ ထိုင်းအတိုက်အခံ အမတ် ကန်ဝီးနှင့် ရန်စီမန်ရုမ်းတို့ဦးဆောင်ကာ ကုလသမဂ္ဂ လူ့အခွင့်အရေးကောင်စီအဖွဲ့ဝင်ထားပြီး တရုတ်မှ အစဖျောက်ဖျက်ရန်ရှိနေသော ဝီဂါများကို တရုတ်လက်ထံ အပ်နှံခြင်းမှာ အန္တရာယ်ရှိသော ခိုလှုံခွင့်တောင်းခံသူ များအား အန္တရာယ်ရှိသော နိုင်ငံထံ ပြန်အပ်နှံခြင်းမပြုရဆိုသည့် နိုင်ငံတကာ စည်းမျဉ်းကို ချိုးဖောက်ခြင်းဖြစ်သည်ဟု ဆိုသည်။
ထိုင်းနိုင်ငံ၏ လူ့အခွင့်အရေးစံနှုန်းများအပေါ် လိုက်နာခြင်းမရှိခြင်းက ယခု ဖြစ်စဉ်တွင် ပြောင်ပြောင် တင်းတင်း ကျူးလွန်ခြင်းဖြစ်သောကြောင့် လူ့အခွင့်အရေးကောင်စီမှ ထွက်သင့်ကြောင်း လွှတ်တော်အမတ် ကန်ဝီးက ပြင်းထန်စွာဝေဖန်ခဲ့သည်။
ဖေဖော်ဝါရီ ၂၈ ရက်နေ့ရောက်မှ ထိုင်းဝန်ကြီးချုပ် ပေထောင်တန်သည် အဆိုပါ လှုပ်ခတ်မှုများနှင့်ပတ်သက်ပြီး မိမိ တရုတ်နိုင်ငံသို့ မကြာသေးမီက အလည်အပတ်ခရီးသွားစဉ် ဝီဂါများကို တရုတ်အစိုးရက မိသားစုနှင့် နွေးထွေးစွာ ပြန်လည်ဆုံဆည်းပေးမည်ဟု အာမခံချက်ဖြင့် ပြန်လည် စေလွှတ်ပေးခဲ့ခြင်းဖြစ်သည်ဟု ဆိုသည်။
တူရကီ နိုင်ငံက အဆိုပါ ဝီဂါများကို ပြန်ခေါ်မည်ဆိုသည့် သတင်းများမှာ လက်တွေ့တွင် ကောလာဟလသဖြစ်ခဲ့သောကြောင့် ဝီဂါ ၄၅ ယောက်ကို လက်ခံမည့် တတိယနိုင်ငံ တစ်နိုင်ငံမှ မရှိခဲ့ကြောင်း၊ ထို့ကြောင့် ၎င်းတို့သည် တရုတ်နိုင်ငံသားများသာဖြစ်သောကြောင့် နိုင်ငံတကာ ဥပဒေစံနှုန်းနှင့်အညီ လက်ထပ်ပင် မခတ်ဘဲ မိသားစုထံ ပြန်လည် ပို့ဆောင်ပေးခြင်းသာဖြစ်ကာ ထုတ်မပြောဟု ရည်ရွယ်ထားပြီးမှ ရှင်းလင်းစေလိုသဖြင့် နောက်ကျမှ ရှင်းလင်းရခြင်းဖြစ်သည်ဟု ထုတ်ပြန်သွားခဲ့သည်။
သို့သော် ထိုင်း ပြည်သူ့ပါတီ ဒုတိယအကြီးအကဲ နာမည်ကြီးလွှတ်တော်အမတ် ရန်စီမန်ရုမ်းက တရုတ်ပြန်ပို့ လိုက်သော ဝီဂါများထဲမှ တစ်ဦးက မိမိတို့ တရုတ်သို့ မည်သူမျှ မပြန်ချင်ကြောင်းနှင့် ထိုင်းထောင်ထဲတွင်ပင် တစ်ဦး သေဆုံးခဲ့ရပြီးဖြစ်ကြောင်း၊ မည်သည့် တတိယနိုင်ငံဖြစ်ပါစေ နေထိုင်ခိုလှုံခွင့်ရလျှင် သွားရောက်မည် ဖြစ်ကာ တရုတ်သို့ လုံး၀မပြန်လိုကြောင်း စာရေးပေးပို့ခဲ့သည့် သက်သေ စာနှင့်တကွ တင်ပြပြီး ပေထောင်တန် ၏ ပြောဆိုမှုများနှင့် ပြန်ရောက်စဉ် ဝီဂါများမိသားစုနှင့်ပွေ့ဖက်နေသည့်ပုံမှာ တရုတ်သံရုံးမှ ထုတ်ပြန်သည့်ပုံသာ ဖြစ်သည့်အတွက် နိုင်ငံတော်၏ လူ့အခွင့်အရေးအပေါ် မျက်ကွယ်ပြုလွန်းမှုသည် ရှက်ဖွယ်ရာကောင်းကြောင်း ဝေဖန်သွားခဲ့သည်။
Ref: Thai Enquirer & The Reporters
ကိုကလင်း
#MeKongNews
#ဝီဂါ
#တရုတ်
#တူရကီ
#ထိုင်း
#ပေထောင်တန်
#ပြန်ပို့
