မဲခေါင်၊ ဖေဖော်ဝါရီ ၇
ရှမ်းပြည်အရှေ့ပိုင်း၊ တာချီလိတ် အမှတ် ၁ ချစ်ကြည်ရေးတံတားမှတဆင့် ထိုင်းနိုင်ငံအတွင်းသို့ တရားဝင်ခရီးသွားဗီဇာ PJ၊ PV ပါ့စ်ပို့များဖြင့် ဖြတ်သန်းခြင်းကို ရပ်တန့်လိုက်ရခြင်းမှာ လျှပ်စစ်မီးအခက်အခဲကြောင့်သာဖြစ်ပြီး ယနေ့ ဖေဖော်ဝါရီလ ၇ ရက်မှ စတင်ကာ ပြန်လည်သွားခွင့်ပြုပြီဖြစ်ကြောင်း သတင်းရင်းမြစ်များထံမှ သိရသည်။
ဖေဖော်ဝါရီလ ၅ ရက် နံနက်ပိုင်းက ထိုင်းနိုင်ငံမှ လျှပ်စစ်မီးဖြတ်တောက်လိုက်သည့်အတွက် တာချီလိတ်မြို့တွင် လျှပ်စစ်မီး အခက်အခဲဖြစ်သွားပြီး လူဝင်မှုကြီးကြပ်ရေးလုပ်ငန်းများ လုပ်ဆောင်ရန် အဆင်မပြေသည့်အတွက် ခရီးသွားဗီဇာဖြင့် ဖြတ်သန်းသွားလာသူများကို ပြန်လွှတ်ရခြင်းဖြစ်ကြောင်း၊ ယမန်နေ့ ဖေဖော်ဝါရီ ၆ ရက် ညနေပိုင်း၌ ဖြတ်သန်းခွင့် ပြန်လည်ခွင့်ပြုလိုက်ပြီဖြစ်ကြောင်း သတင်းရင်းမြစ်တစ်ဦးက ပြောသည်။
“အခုက ပြန်ဖွင့်လိုက်ပြီ၊ ရုံးက ဖုန်းဆက်ပြောလာတယ်” ဟု ၎င်းက ဆိုသည်။
ထိုင်းနိုင်ငံအတွင်း ဆေးကုသရန်အပါအဝင် အကြောင်းအမျိုးမျိုးကြောင့် ရက်ရှည် သွားရောက်ရမည့် ဒေသခံများအနေဖြင့် ရန်ကုန်ရှိ ထိုင်းသံရုံးတွင် ခရီးသွားဗီဇာ ၂ လ လျှောက်ထားကာ တာချီလိတ်တံတား ၁ မှတစ်ဆင့် ဖြတ်သန်းသွားလာနိုင်ပြီး ယင်းသို့သွားလာသူများကို ဝန်ဆောင်မှုပေးသူများလည်းရှိကြောင်း ဒေသခံများထံမှ သိရသည်။
“ဘယ်လိုပဲသွားသွား စိတ်ချရအောင် အရင်လှမ်းတိုင်ပင်ပါ။ သေချာစီစဥ်ပြီးမှ သွားပါ။ အတတ်နိုင်ဆုံး ကူညီနေပါတယ်။ ဒီကာလမှာ ဒုက္ခရောက်နေသူတွေ လူလိမ်မခံရဖို့။ အဖမ်းမခံရဖို့ သေသေချာချာရှင်းပြ ကူညီနေပါတယ်” ဟု မယ်ဆိုင်အခြေစိုက် ခရီးသွားလုပ်ငန်းတစ်ခုက မဲခေါင်ကို ပြောသည်။
စစ်ကောင်စီ၏ အဓမ္မ စစ်ထဲဆွဲသွင်းနေမှုကြောင့်လူငယ်လူရွယ် အများအပြား ထိုင်းနိုင်ငံဘက်သို့ တရားဝင်နှင့် တရားမဝင် ရောက်ရှိနေသူ ၂ သန်းခန့်ရှိနေပြီဟု နိုင်ငံတကာ အလုပ်သမားအဖွဲ့ချုပ် ILO က မကြာခင်က ခန့်မှန်းထားပါသည်။
မဟာ
#MeKongNews
#တာချီလိတ်
#ခရီးသွားဗီဇာ
#ထိုင်းနိုင်ငံ
#မယ်ဆိုင်
မှတ်ချက် – ပုံဟောင်းဖြစ်သည်။
