မဲခေါင်၊ ဖေဖော်ဝါရီ ၅

ထိုင်းနိုင်ငံမှ လောင်စာဆီတင်ပို့မှုကို ပိတ်ပင်ထားသည့်အတွက် ရှမ်းပြည်အရှေ့ပိုင်းအတွက် လိုအပ်သည့် လောင်စာဆီကို လာအိုနိုင်ငံမှ တဆင့် တင်သွင်းရန် ကြိုးစားနေသော်လည်း ညှိနှိုင်းမရဖြစ်နေကြောင်း စက်သုံးဆီလုပ်ငန်းရှင်အသိုင်းအဝိုင်းမှ သိရသည်။

ယခင်ကိုဗစ်ကာလက လာအိုနိုင်ငံမှတဆင့် မဲခေါင်မြစ်ကြောင်းကိုဖြတ်ကာ စက်သုံးဆီတင်သွင်းခဲ့ဘူးသော်လည်း လက်ရှိအခြေအနေမှာ ထိုစဉ်က အခြေအနေနှင့်မတူဘဲ ထိုင်းနိုင်ငံဘက်က တင်ပို့မှုပိတ်ထားသည့်အတွက် တင်သွင်းရန် အခက်အခဲဖြစ်နေခြင်း ဖြစ်ကြောင်း စက်သုံးဆီလုပ်ငန်းရှင်အသင်းနဲ့နီးစပ်သူတစ်ဦးက ပြောသည်။

“ထိုင်းကတော့ ပေးမသွင်းဘူး။ လာအိုကို ရောင်းပေးဖို့ညှိတာလဲ ညှိလို့မရသေးဘူး”လို့ ဆီလုပ်ငန်းရှင်အသင်းနဲ့နီးစပ်သူတစ်ဦးပြောပါတယ်။

ထိုင်းဘက်က လောင်စာဆီရောင်းချမှု ပိတ်ပင်သည့်ကာလ ကြာရှည်ပါက ရှမ်းပြည်အရှေ့ပိုင်းတစ်ခုလုံး လောင်စာဆီ အကြပ်အတည်းဖြစ်နိုင်ကြောင်း လုပ်ငန်းရှင်အသိုင်းအဝိုင်းက သုံးသပ်သည်။

ထိုသို့ ပြတ်တောက်ပါက မော်တာယာဉ်များအပါအဝင် ဆောက်လုပ်ရေးလုပ်ငန်းတွေအတွက်လည်း လောက်စာဆီအကြပ်အတည်းရင်ဆိုင်ရမည်ဖြစ်သည်။

ရှမ်းပြည်အရှေ့ပိုင်းရှိ ကျိုင်းတုံ၊ မိုင်းပျင်း၊ မိုင်းလား၊ မိုင်းတုံ၊ မိုင်းဆတ်နှင့် မိုင်းခတ်မြို့များအပြင် ရှမ်းပြည်တောင်ပိုင်းရှိ ကွန်ဟိန်း၊ နမ့်ဆန်အထိ ထိုင်းမှ လောင်စာဆီဝယ်ယူပြီး ပြန်လည်ရောင်းချနေခြင်းဖြစ်သည်။

ယနေ့ ထိုင်းမှ လောင်စာဆီ တင်ပို့မှု ပိတ်ပင်လိုက်သည့်အတွက် တာချီလိတ်ရှိ ဆီပန့်များတွင် စက်သုံးဆီ အလုအယက် တိုးဝယ်ယူကြီပြီး ဆီပန့်များတွင် ဆီဈေးမတက်ဘဲ တစ်လီတာလျင် ၃၂ ဘတ်ဖြင့် ရောင်းချပေးနေသော်လည်း အပြင်လမ်းဘေးဆီဆိုင်များတွင် တစ်လီတာကို ထိုင်းဘတ် ၁၀၀ နီးပါးဖြင့် ရောင်းချနေကြောင်း သိရသည်။

ဇော်မြင့်
#MeKongNews
#တာချီလိတ်
#ရှမ်းအရှေ့
#စက်သုံးဆီ
#လာအိုနိုင်ငံ
#ကျားဖြန့်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)