မဲခေါင်၊ ဖေဖော်ဝါရီ ၄
ရှမ်းပြည်မြောက်ပိုင်း၊ နောင်ချိုမြို့နယ်၊ တောင်ခမ်းတိုက်ပွဲ၌ စစ်ကောင်စီဘက်က ဆေးအလွန်အကျွံသုံးထားသည့်အကိုက ညီဖြစ်သူပါဝင်သည့် တော်လှန်ရေးအဖွဲ့ထံ လက်နက်ချအညံ့ခံရာမှာ ခံယူချက်မတူသည့် ညီအကိုနှစ်ဦး ပြန်လည်ဆုံတွေ့ခဲ့ကြသည်။
တောင်ခမ်းအခြေစိုက် အမြောက်တပ်အနီး၌ TNLA အပါအဝင် ဓနုပြည်သူ့လွတ်မြောက်ရေးတပ်နှင့် အမြှောက်တပ် ယနေ့ (ဖေဖော်ဝါရီ ၄) နံနက်ပိုင်း တိုက်ပွဲဖြစ်ပွားခဲ့ရာ စစ်ကောင်စီဘက်က လက်နက်ချအညံ့ခံသူ ငါးဦး တွင် DPLA တော်လှန်ရေးရဲဘော်၏အကို ပါဝင်လာသည်။
“သူတို့က အဆက်သွယ်ပြတ်နေတာ ကြာပြီ၊ ဒီနေ့မှ တိုက်ပွဲထဲ ရုတ်တရက်တွေ့ကြတာ၊ စစ်မြေပြင်မှာတိုက်ရင်းနဲ့ မတက်သာတော့လို့ ကျွန်တော်တို့ဆီ လက်နက်ချတာပါ” ဟု DPLAZ တပ်တာဝန်ခံ ကိုထွန်းနိုင်က မဲခေါင်ကိုပြောသည်။
လက်နက်ချခဲ့တဲ့အကိုဖြစ်သူဟာ ၂၀၁၃ ခုနှစ်ကတည်းက စစ်တပ်ထဲဝင်ရောက်ခဲ့ခြင်းဖြစ်ပြီး အမတ(၉၀၂) တပ်ကြပ်အဆင့်ရရှိထားသူဖြစ်ပြီး လက်နက်ချအညံ့ခံချိန်တွင် ဆေးအလွန်အကျွံသုံးထားတာကြောင့် အနည်းငယ် စိတ်မူမမှန်ဖြစ်ကြောင်း ကိုထွန်းနိုင်ကပြောသည်။
အကိုဖြစ်သူ လက်နက်ချအဖမ်းခံချိန်တွင် ပွန်းပဲ့ဒဏ်ရာတချို့ရရှိထားသောကြောင့် ညီဖြစ်သူက ဆေးကုသပေးနေကြောင်း DPLA တပ်တာဝန်ခံကပြောသည်။
တောင်ခမ်း၌ စစ်ကောင်စီ၏ အမြောက်စခန်းကွပ်ကဲမှုဌာနချုပ်( ၉၀၂) နှင့်ကွပ်ကဲမှုလက်အောက်ခံ အမတ(၃၅၄)၊ အမတ(၂၀၆)နှင့်အမ(၄၀၆) တည်ရှိသည်။
ပြီးခဲ့တဲ့နှစ်ပိုင်းကတည်းက TNLA နဲ့ DPLA အပါအဝင် တော်လှန်ရေးတပ်များက တောင်ခမ်းအမြောက်စခန်းကို ထိုးစစ်ဆင်တိုက်ခိုက်နေကြတာဖြစ်ပြီး တော်လှန်ရေးတပ်များနှင့် စစ်ကောင်စီ နေ့စဉ်ဆိုသလို တိုက်ပွဲဖြစ်ပွားနေကြောင်း ကိုထွန်းနိုင်ကပြောသည်။
တောင်ခမ်းအမြောက်တပ်ကို ကျောက်ဂူ-နမ့်လန်-ရပ်စောက်ဘက်မှ ရိက္ခာနှင့် စစ်ကူ ပို့ပေးနေပြီး ကျောက်ဂူအနီးတဝိုက်တွင်လည်း စစ်ကောင်စီတပ်နှင့် တော်လှန်ရေးတပ်တို့ တိုက်ပွဲဖြစ်ပွားလျက်ရှိသည်။
တောင်ခမ်းအမြောက်စခန်းသည် ရှမ်းပြည်တောင်ပိုင်းနှင့် မြောက်ပိုင်း ဆက်သွယ်ရာတွင် အရေးပါသောနေရာဖြစ်ပြီး စစ်ကောင်စီ၏ ဗိုလ်သင်တန်းကျောင်း အပါအဝင် တပ်စခန်းအများအပြားအခြေစိုက်ရာ ဗထူးတပ်မြို့နှင့် ၇၉ မိုင်ခန့်သာ ကွာဝေးသည်။
ဂနိုက်
#MeKongNews
#တောင်ခမ်းတိုက်ပွဲ
#တော်လှန်ရေး
#စစ်ကောင်စီ
#ဆေးအလွန်အကျွံသုံး
ပုံစာ။ ။ ဒဏ်ရာရှိထားသည့်အကိုဖြစ်သူကို ညီဖြစ်သူကဆေးထည့်ပေးနေစဉ်။ ဓါတ်ပုံ- ကိုထွန်းနိုင်
