မဲခေါင်၊ ဖေဖော်ဝါရီ ၁
ရှမ်း၊ ကယား (ကရင်နီ) နယ်စပ်တွင် စစ်ကောင်စီတပ်အား တော်လှန်တိုက်ခိုက်နေသည့် လက်နက်ကိုင်နှစ်ဖွဲ့ အမျိုးသားညီညွှတ်ရေးအစိုးရ (NUG)၊ ကာကွယ်ရေးဝန်ကြီးဌာန (MoD) လက်အောက်မှ နှုတ်ထွက်မည်ဟု ယနေ့ (ဖေဖော်ဝါရီ ၁) တွင် ကြေညာသည်။
MoD ၏ စစ်ဘက်ဆိုင်ရာကျင့်ဝတ် (CoC) ဖြင့် လှုပ်ရှားနေသည့် အမှတ် (၁၀၀၅) တပ်ရင်း (SSPDF) နှင့် အမှတ် (၁၀၀၈) တပ်ရင်း (SSRY) တို့ နှုတ်ထွက်ကြမည်ဖြစ်ပြီး အခြားစုဖွဲ့မှုပုံစံနှင့် တော်လှန်ရေးပြီးဆုံးသည်အထိ တိုက်ပွဲဝင်သွားမည်ဟု ဆိုသည်။
သဘောထားကြီးစွာဖြင့် နှုတ်ထွက်ခွင့်ပေးသည့် MoD အား ကျေးဇူးတင်ကြောင်းလည်း ထိုတပ်ရင်းများက ဆိုသည်။ MoD လက်အောက်တွင် မရှိဘဲ ရှမ်းပြည်တောင်ပိုင်းတွင် လှုပ်ရှားနေသည့် ရှမ်းတောင်ဒေသခံတော်လှန်ရေးတပ်ပေါင်းစု (SSLRU) အဖွဲ့နှင့် နှုတ်ထွက်သည့်အဖွဲ့များ ပူးပေါင်းကြမည်ဖြစ်သည်။
“တပ်ရင်းပြန်အပ်ရတဲ့ အကြောင်းအရင်းကတော့ ပြည်ထောင်စုအဆင့်ကနေ ပထဝီနိုင်ငံရေးအရ ရှမ်းတောင်ဒေသကို အခြေခံတဲ့တပ်အဖြစ်နဲ့ သွားမှ ရမယ်လို့ စဉ်းစားချက်ရှိလို့ပါ” ဟု နှုတ်ထွက်ခွင့်တောင်းသည့် ၁၀၀၅ တပ်ရင်းမှူး ကိုဘုန်းကြီးက မဲခေါင်သတင်းဌာနကို ရှင်းပြသည်။
နှုတ်ထွက်သည့် တပ်ရင်းများသည် MoD လက်အောက်တွင် သုံးနှစ်ကျော် လက်နက်ကိုင်တော်လှန်ခဲ့သည့် တပ်ရင်းများဖြစ်ကြသည်။
SSLRU နိုင်ငံရေးမှူး စိုင်းပန်ဖ က “ဒီလိုပေါင်းစည်းဖို့ လုပ်နေတာကြာပါပြီ၊ အခုလိုမျိုး ရှမ်းတောင်တပ်ရင်းတွေ တစုတစည်းတည်း ပေါင်းစည်းပြီး တော်လှန်မှ စစ်အာဏာရှင်စနစ်နဲ့ ယန္တရားကို ဖြိုဖျက်နိုင်မယ်ဆိုတဲ့ တူညီတဲ့ သဘောထား တွန်းအားတွေကြောင့် အခုလို စုဖွဲ့မှုအသစ်ကို လုပ်ဆောင်နိုင်တာဖြစ်တယ်” ဟု မဲခေါင်သတင်းဌာနကို ပြောသည်။
ကျန်ရှိနေသေးသည့် ရှမ်းတောင် တော်လှန်ရေးအင်အားစုများ ပါဝင်လာရန်လည်း စည်းရုံးဖိတ်ခေါ်သွားမည်ဖြစ်ပြီး ခိုင်မာအားကောင်းသည့် စုဖွဲ့မှုဖြစ်ရန် ကြိုးပမ်းမည်ဟုလည်း သူက ဆက်ပြောသည်။
ရှမ်းပြည်တောင်ပိုင်းတွင် သက်တမ်းရင့်လက်နက်ကိုင် ရှမ်းပြည်ပြန်လည်ထူထောင်ရေးကောင်စီ (RCSS)၊ စစ်ကောင်စီလက်အောက်ခံ ပအိုဝ်းအမျိုးသားအဖွဲ့ချုပ် (PNO) ပအိုဝ်းပြည်သူစစ်၊ စစ်ကောင်စီအား တိုက်ခိုက်နေသည့် ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLA) စသည့် အဖွဲ့များ အခြေစိုက်ကြသည်။
စစ်တပ်အာဏာသိမ်းပြီးနောက် လက်နက်ကိုင်တော်လှန်တိုက်ခိုက်နေသည့် ကရင်နီအမျိုးသားများကာကွယ်ရေးတပ် (KNDF) နှင့် မဟာမိတ်ပူးပေါင်းအဖွဲ့များသည်လည်း ရှမ်းပြည်တောင်ပိုင်းတွင် ရံဖန်ရံခါ စစ်ရေးလှုပ်ရှားမှုများ ပြုလုပ်ကြသည်။
ကရင်အမျိုးသားအစည်းအရုံး (KNU) ထိန်းချုပ်နယ်မြေတွင် စုဖွဲ့ခဲ့သည့် ဂဠုန်စစ်ကြောင်း (P29908) သည်လည်း MoD လက်အောက်မှ ယခုနှစ် ဇန်နဝါရီ ၂၉ ရက်တွင် နှုတ်ထွက်ကြောင်း ကြေညာထားသည်။
သုဝဏ္ဏခွန်
#MeKongNews
#စစ်ကောင်စီ
#NUGMOD
#နှုတ်ထွက်
#စုဖွဲ့မှုအသစ်
#တော်လှန်ရေး
#ရှမ်းတောင်
#တိုက်ခိုက်မည်
ပုံစာ။ ။ နှုတ်ထွက်သွားသည့် ရှမ်းတောင်အခြေစိုက် အမှတ် (၁၀၀၈) တပ်ရင်းရဲဘော်များ
Photo – SSRY
