မဲခေါင်၊ ဖေဖော်ဝါရီ ၁
လားရှိုးကနေ တန့်ယန်းမြို့နယ်ထဲမှာ သွားရောက်အထိုင်ချနေတဲ့ စစ်ရှုံး ရမခ အင်အားကို အခုလေယာဉ်နဲ့ အလယ်ပိုင်းတိုင်းကိုပို့ဆောင်နေတာကြောင့် အလယ်ပိုင်းတိုင်းအတွင်း စစ်ကောင်စီထိုးစစ်ပိုလာနိုင်ကြောင်း CDM တပ်မတော်သားတွေနဲ့ စစ်ရေးကျွမ်းကျင်သူတွေက သုံးသပ်လိုက်ပါတယ်။
၁၀၂၇ စစ်ဆင်ရေး ဒုတိယလှိုင်းမှာ လားရှိုးခြေစိုက် အရှေ့မြောက်ပိုင်းစစ်ဌာနချုပ်(ရမခ)ဟာ ၁၀၂၇ စစ်ဆင်ရေးကာလတုန်းက စစ်ရှုံးကာ ဖွဲ့စည်းပုံပျက်ပြီးနောက် အစားထိုး ရမခအနေနဲ့ တန့်ယန်းမှာအထိုင်ချနေတာဖြစ်ပြီး အခုအလယ်ပိုင်းတိုင်းကို ထပ်မံပြောင်းရွှေ့တာ ဖြစ်ပါတယ်။
လားရှိုးမြို့ကို ထိန်းချုပ်ထားတဲ့ ကိုးကန့်တပ်နဲ့ စစ်ကောင်စီ အပစ်အခတ်ရပ်စဲရေး သဘောတူညီမှုရရှိပြီးနောက်ပိုင်းမှာ အခုလို တန့်ယန်းမှာအထိုင်ချနေတဲ့ စစ်ကောင်စီတွေ အပြောင်းအရွှေ့ဖြစ်ပေါ်လာတာ ဖြစ်ပါတယ်။
“တန့်ယန်းမှာအခြေပြုပြီး လားရှိုးကို ပြန်တိုက်မယ်ဆိုပြီး စုဖွဲ့တာပေါ့နော်၊ အဲ့ကနေအခု မန်ကတ်၊ မိုင်းဆတ်ကနေ စုဖွဲ့အင်အားတွေကို လေယာဉ်နဲ့ ရှမ်းတောင်၊ ရှမ်းတောင်ကနေ မိတ္ထီလာ၊ တချို့ မပခ မြစ်ကြီးနားကို ပို့နေတယ်လို့ သတင်းရထားတယ်၊ လားရှိုးကို ပြန်တိုက်ဖို့ မဖြစ်နိုင်တော့ဘူးပေါ့” လို့ လေတပ် CDM တပ်ကြပ်ကြီး ဇေယျက မဲခေါင်ကို ပြောပါတယ်။
၂၀၂၄ ခုနှစ်၊ ဒီဇင်ဘာလထဲမှာ စစ်ကောင်စီအနေနဲ့ လားရှိူးကို ပြန်တိုက်ဖို့ စုဖွဲ့ထားတဲ့ တန့်ယန်း၊ မန်ကတ်၊ မိုင်းဆတ်တကြောက စစ်ကောင်စီအရာရှိစစ်သည် အင်အား ၂၀၀၀ ကျော်ခန့် Mi 35, MiATR တွေနဲ့ စစ်အင်အားခွဲပို့တာတွေ ပြုလုပ်ခဲ့တာပါ။
လားရှိူးမြို့ကို တော်လှန်ရေးတပ်တွေ သိမ်းယူပြီးတဲ့အချိန်အထိ စစ်ခေါင်းဆောင်ဟာ ရမခတိုင်းစစ်ဌာနချုပ်ကို ပြန်လည်တိုက်ယူရန် စစ်တိုင်းမှူး သုံးဦးအထိ ပြောင်းလဲကာ စုဖွဲ့မှုတွေ ပြုလုပ်ခဲ့တာပါ။
စစ်ကောင်စီက ရှမ်းပြည်မြောက်ပိုင်း စစ်အင်အားကို အလယ်ပိုင်းဒေသကို ခွဲပို့ထားစဉ် ရှမ်းမြောက်တကြောကို တရုတ်ဖိအားနဲ့ အချိန်တခုအထိထိန်းထားကာ ကချင်လွတ်လပ်ရေးတပ်မတော် KIA ထိစပ်နေတဲ့ မြန်မာပြည် အလယ်ပိုင်းဒေသတလျှောက်ကို ထိုးစစ်ပိုလာနိုင်တယ်လို့ လူငယ်စစ်ရေးကျွမ်းကျင်သူတစ်ဦးက မဲခေါင်ကို ပြောပါတယ်။
“ကျွန်တော်တစ်ယောက်တည်း အမြင်အရ ရှမ်းမြောက်ကို တရုတ်နဲ့ဖိအားပေးပြီး စစ်ကောင်စီတပ်ရဲ့အဓိက ကပစ တပ်တွေရှိရာ KIA နဲ့ ထိစပ်နေတဲ့ စစ်ကိုင်းတကြောနဲ့ AA ထိုးစစ်ဆင်လာတဲ့ ပြည် လိုနေရာတွေ စစ်ကိုင်းမကွေးအစပ်တွေကို ပိုဖိလိမ့်မယ်၊ သေချာတာက ၂၀၂၅ က စစ်ပွဲအကြီးဆုံးနှစ် ဖြစ်လာလိမ့်မယ်” လို့ သူက ဆိုပါတယ်။
လက်ရှိမှာ ရှမ်းပြည်နယ်အရှေ့ပိုင်းနဲ့ ထိစပ်နေတဲ့ ရှမ်းပိုင်းမြောက်ပိုင်းမြို့အများစုကို စစ်ကောင်စီက ထိန်းချုပ်ထားပြီး မိုင်းရယ်၊ ဟိုယ၊ တန့်ယန်းမြို့တွေမှာ UWSA “ဝ” တပ်တွေ တပ်စွဲထားတာလည်း ရှိနေပါတယ်။
ရှမ်းပြည်နယ်မြောက်ပိုင်းဒေသတွင်း လက်နက်ကိုင်တွေကြားက စစ်ရေးအခြေအနေကို သိနိုင်ရန် RCSS/SSA က ဒုဗိုလ်မှူးကြီး အုမ်းခေးနဲ့ SSPP/SSA က ဗိုလ်ကြီးသီဟရာဇာ တို့ကို မဲခေါင်က ဆက်သွယ်မေးမြန်းပေမဲ့ ဖြေဖို့အဆင်မပြေသေးကြောင်းသာ အကြောင်းပြန်ခဲ့ပါတယ်။
MK 016
#MeKongNews
#တန့်ယန်း
#စစ်အင်အား
#အလယ်ပိုင်းတိုင်း
#ထိုးစစ်ပိုလာနိုင်
