မဲခေါင်၊ ဇန်နဝါရီ ၂၅
ရှမ်းပြည်အရှေ့ပိုင်း၊ မိုင်းဆတ်ခရိုင်၊ မိုင်းတွမ်းအခြေစိုက် စကခ(၁၄ )လက်အောက်ခံ ခမရ(၅၅၄)က တိုက်ပွဲမှာသေဆုံးတဲ့ စစ်သည်တွေရဲ့လစာနဲ့ ဘဏ်စုငွေတွေကို ခံစားခွင့်ရှိသူမိသားစုဝင်တွေက ထုတ်ယူခွင့်မရပဲ တပ်ရေးဗိုလ်ကြီး ဟိန်းသော်ဇင်စိုးက ထုတ်ယူသုံးစွဲနေတယ်လို့ တပ်တွင်းသတင်းအရင်းအမြစ်က ပြောပါတယ်။
ကရင်နီနဲ့ လားရှိုးတိုက်ပွဲတွေမှာ အများအပြား သေဆုံးခဲ့တဲ့ ခမရ(၅၅၄)က သေဆုံးစစ်သည်တွေနဲ့ တပ်ကနေထွက်ပြေးတဲ့စစ်သည်တွေကို တပ်တွင်းမှာရှိနေသယောင် အင်အားပြကာ သူတို့ရဲ့လစာနဲ့ ပိုင်ဆိုင်ငွေတွေကို ထုတ်ယူသုံးစွဲနေတာလို့ ပြောပါတယ်။
“ကျိုင်းတုံက တပ်စာရင်းစစ်တွေလာစစ်ပေမယ့် အရက်၊ ဘီယာအစုံနဲ့လာဘ်ထိုးထားတော့ ဘယ်ကန့်ကွက်တာရှိတော့မလဲ၊ လူပျိုတွေ၊ တပ်သားသစ်လစာတွေကို မိုင်းဆတ်က ကမ္ဘောဇဘဏ်ထဲထည့်ပြီး သူ့ပိုင်လို သုံးစွဲနေတာ”လို့ တပ်တွင်းသတင်းအရင်းအမြစ်က ပြောပါတယ်။
တပ်ရေးဗိုလ်ကြီးအဆင့်ရှိသူ ဟိန်းသော်ဇင်စိုးဟာ တပ်ရင်းမိသားစုတွေနဲ့ အမျိုးသမီး တပ်ဖွဲ့ဝင်တွေအပေါ် ရိုင်းပြစွာ ဆက်ဆံတာမျိုးတွေကြောင့် မခံနိုင်လို့ တရားမျှတမှု ရရှိနိုင်ရေးအတွက် အခုလိုပြောရတာလို့ ဆိုပါတယ်။
ဟိန်းသော်ဇင်စိုးဟာ စစ်တက္ကသိုလ်အပတ်စဉ် ၅၄ ကျောင်းဆင်းဖြစ်ပြီး တပ်ရေးဗိုလ်ကြီး တာဝန်မှာ ၂ နှစ်ကျော် ရှိပြီဖြစ်ကာ ရှေ့တန်းမထွက်ရပဲ နောက်တန်းမှာနေပြီး တပ်ကိုမစောင့်ရှောက်ပဲ ကိုယ်ကျိုးရှာနေသူသာ ဖြစ်တယ်လို့ သတင်းအရင်းအမြစ်က ပြောပါတယ်။
စစ်သည်တစ်ဦး တပ်ပြေးဖြစ်တဲ့အခါမှာ အထက်ကို တပ်ပြေးစာရင်း အနည်းဆုံးသုံးလမှ အများဆုံးခြောက်လခန့်အထိ မတင်သေးပဲ အင်အားပြကာ သူရဲ့လစာကို တပ်ရေးဗိုလ်ကြီး၊ ဌာနချုပ်တပ်ခွဲမှူး၊ ဒုတပ်ရင်းမှူး၊ တပ်ရင်းမှူးတို့က ထုတ်ယူသုံးစွဲတာဟာ စစ်တပ်ရဲ့ အစဉ်အလာသဖွယ် အစဉ်အဆက်လုပ်ဆောင်နေကြတာလို့ တပ်တွင်းသတင်းအရင်းအမြစ်တစ်ဦးက ပြောပါတယ်။
စစ်ကောင်စီတပ်တွင်းမှာ စစ်သည်တွေ ရရှိတဲ့လစာထဲမှ လေးပုံ တစ်ပုံကို မဖြစ်မနေ ဘဏ်ထဲထည့်ထားရတာဖြစ်ပြီး ဘဏ်စာအုပ်ကို တပ်ခွဲရဲ့ လစာကြပ်တာဝန်ထမ်းဆောင်သူ ဒါမှမဟုတ် တပ်ခွဲအရာခံဗိုလ်က ထိန်းသိမ်းထားပါတယ်။ စုဆောင်းထားတဲ့ ဘဏ်စုငွေကို ဘဏ်စုစစ်သည်က ထုတ်ချင်တဲ့အခါမှာ ကိုယ့်ဆုံးဖြတ်ချက်နဲ့ကိုယ် ထုတ်ယူခွင့်မရှိပဲ ထုတ်ယူသုံးစွဲလိုတဲ့အကြောင်းအရာကို တပ်ရေးဗိုလ်ကြီးထံ တင်ပြရပြီး တပ်ရေးဗိုလ်ကြီးရဲ့ ခွင့်ပြုချက်လက်မှတ်ပါရှိမှသာ ထုတ်ယူခွင့်ရှိပါတယ်။ အကြောင်းပြချက် မခိုင်လုံရင် တပ်ရေးဗိုလ်ကြီးဖြစ်သူက ခွင့်ပြုချက်လက်မှတ် ထိုးမပေးပါဘူး။
MK-012
#MeKongNews
#မိုင်းဆတ်ခရိုင်
#ခမရ၅၅၄
#တပ်ရေးဗိုလ်ကြီး
#စကခ၁၄
