မဲခေါင်၊ ဇန်နဝါရီ ၂၂
ကမ္ဘာမှာ သေဒဏ်စီရင်မှု အများဆုံးနိုင်ငံအဖြစ် နှစ်ပေါင်းအတော်ကြာ ထိပ်ဆုံးကရပ်တည်နေတဲ့ တရုတ်နိုင်ငံဟာ ကွပ်မျက်မှုတွေကို မျက်ကွယ်သာ တိတ်တဆိတ်သတ်ဖြတ်၊ သတင်းမှောင်ချခဲ့ပေမယ့် ဒီလပိုင်းထဲ သေဆုံးမှုများလှတဲ့ လူသတ်မှုတွေကျူးလွန်ခဲ့သူ ၂ ယောက်အပေါ် ကွပ်မျက်မှုကိုတော့ ကြုံတောင့်ကြုံခဲ့ နိုင်ငံပိုင်မီဒီယာကနေ ဇန်နဝါရီ ၂၀ ရက်မှာ လူသိရှင်ကြား ဖော်ပြသွားခဲ့ပါတယ်။
၂၀၂၄ နိုဝင်ဘာ ၁၁ ရက်နေ့က နိုင်ငံတောင်ပိုင်း ဇူဟိုင်အွန်မြို့ အားကစားကွင်းပတ်လမ်းနား လူစည်ကားနေတုန်း ၆၂ နှစ်အရွယ် အမျိုးသား ဖန်ဝေကျူဆိုသူဟာ ပတ်ချာလည်လှည့်ပြီး အရှိန်ပြင်းစွာ မောင်းနှင်လို့ မြင်မြင်သမျှ လှည့်ပတ်ကားနဲ့တိုက်ခဲ့ရာက ၃၅ ယောက်သေဆုံးပြီး အယောက် ၈၀ ဝန်းကျင် ဒဏ်ရာရရှိခဲ့ပါတယ်။
မစ္စတာ ဖန်ဟာ ဇနီးနဲ့ ကွာရှင်းရာမှာ ပိုင်ဆိုင်မှုခွဲဝေရမှုအပေါ် မကျေမနပ် ဒေါသထွက်ပြီး ပတ်ဝန်းကျင်ကို လက်စားချေလိုစိတ်ကြောင့် မြင်မြင်ရာ ကားနဲ့လိုက်တိုက်သတ်ကာ နောက်ဆုံး သူ့ကိုယ်သူ ကားထဲမှာ ဓားနဲ့လည်ပင်းကို ထိုးသတ်ရာက ကိုမာဖြစ်သွားပြီး ဆေးရုံတင် ကုသမှုခံယူနေခဲ့ရတာ ဖြစ်ပါတယ်။ ဒါကြောင့် တရားရုံးက သေဒဏ်ချမှတ်ပြီး ၃ ပတ်အကြာမှာ ကွပ်မျက်မှုလုပ်ခဲ့ကြောင်းကို နိုင်ငံပိုင် မီဒီယာက သတင်းထုတ်ပြန်ခဲ့တာ ဖြစ်ပါတယ်။
ဒီကားတိုက်မှုနဲ့ ရက်ပိုင်းအကွာမှာပဲ ၀ူဇီမြို့က တက္ကသိုလ်တန်းပြီးသူ ၂၁ နှစ်အရွယ် ဇူဂျားဂျင်း ဆိုသူဟာ စာမေးပွဲ ရမှတ်မကောင်းလို့ အောင်လက်မှတ် မထုတ်ပေးသေးခြင်းအပေါ် မကျေမနပ်ဖြစ်ပြီး တက္ကသိုလ်ဝင်းထဲ ဓားနဲ့ မြင်ရာလိုက်ထိုးလို့ ၈ ယောက်သေဆုံးခဲ့လို့ သေဒဏ်ပေးခဲ့မှုကိုလည်း ကွပ်မျက်အပြီး နိုင်ငံပိုင်မီဒီယာကနေ ကြေညာကာ ဒီလပိုင်းထဲ စီးပွားရေးကျဆင်းခြင်းနဲ့ စိတ်ဖိစီးမှုများလွန်းခြင်းတွေကြောင့် နိုင်ငံအတွင်း လူ့ပတ်ဝန်းကျင်ကို ပစ်မှတ်ထား လက်စားချေမှုအဖြစ် မြင်မြင်ရာ လိုက်သတ်သူတွေ နောင်ကျဉ်သွားအောင် သမ္မတ ရှီကျင်းဖျင်က အပြင်းထန်ဆုံး သေဒဏ်တွေချမှတ်ပြီး နိုင်ငံပိုင်မီဒီယာက ကြေညာခိုင်းခဲ့တာဖြစ်တယ်လို့ သိရှိရပါတယ်။
လူ့အခွင့်အရေးအုပ်စုတွေဟာ တရုတ်ဟာ နှစ်ပေါင်းများစွာ ကမ္ဘာမှာ သေဒဏ်စီရင်မှုအများဆုံးနိုင်ငံအဖြစ် နှစ်စဉ် ထိပ်ဆုံးကရပ်တည်နေပြီး တစ်နှစ် ထောင်ချီ ကွပ်မျက်နေခဲ့လို့ ဝေဖန်မှုတွေ လုပ်ခဲ့ကြပေမယ့် ဒီတစ်ကြိမ် ကွပ်မျက်မှုတွေအပေါ်မှာတော့ တရုတ်တွစ်တာလို့ ခေါ်ရမယ့် လူမှုကွန်ရက် Weibo မှာ ထောက်ခံအားပေးတဲ့ မှတ်ချက်များစွာ ရရှိခဲ့ကြောင်း သိရှိရပါတယ်။
မနှစ်ကလည်း အမျိုးသားတစ်ယောက်ဟာ ယူနန်ပြည်နယ် ဆေးရုံပေါ်တက်ပြီး လူနှစ်ယောက်ကို သေစေအောင် ဓားနဲ့ထိုးသတ်ကာ ၂၁ ယောက် ဒဏ်ရာရရှိစေအောင် တိုက်ခိုက်ခဲ့ပါသေးတယ်။
၂၀၂၄ ခုနှစ်အတွင်း တရုတ်မှာ စီးပွားရေးကျဆင်းခြင်း၊ ပြဿနာနဲ့ ဖိအားများစွာကို ပြည်သူတွေ ခံစားရခြင်းကနေ ခုလို လူ့ပတ်ဝန်းကျင်ကို ပစ်မှတ်ထားပြီး မြင်မြင်ရာ အကြမ်းဖက်တိုက်ခိုက်သတ်ဖြတ်မှုပေါင်း ၁၉ ခု ရှိခဲ့ကာ တစ်ယောက်လုပ်ရပ်ကို တစ်ယောက် နမူနာယူလိုက်လုပ်ရာက ပေါ်ပျူလာဖြစ်လာတဲ့ လူသတ်မှုတွေဖြစ်လို့ ရှီကျင်းဖျင်ရဲ့ ဒီတစ်ကြိမ်သေဒဏ်တွေအပေါ် ပြည်သူလူထုထောက်ခံမှု ပိုရခဲ့တယ်လို့ ဆိုပါတယ်။
Ref:Thesun
MKF-001
#MeKongNews
#ကားနဲတိုက်
#ဓားနဲ့ထိုး
#တရုတ်
#ကွပ်မျက်
#မီဒီယာ
