မဲခေါင်၊ ဇန်နဝါရီ ၁၇
မြေပြင်မှာ ဝိုင်းပတ်ပိတ်ဆို့ထားတဲ့ တော်လှန်ရေးတပ်တွေကို ဖောက်ထွက်နိုင်ခြင်းမရှိတဲ့ စစ်ကောင်စီဟာ ပြည်သူတွေသွားလာ လှုပ်ရှားနေကြတဲ့ ရှမ်း၊ ကရင်နီ(ကယား)နယ်စပ်က မိုးဗြဲလမ်းမကြီးတစ်လျှောက်ကို ဒီကနေ့ လေယာဉ်နဲ့ ဗုံးကြဲခဲ့တယ်လို့ ကယန်းအမျိုးသားတပ်မတော် KNA ထံကသိရပါတယ်။
ဒီကနေ့( ဇန်နဝါရီ ၁၇) ၊ နေ့လယ် ၁ နာရီခန့်က မိုးဗြဲလမ်းမကြီးတစ်လျှောက် ဗုံးအလုံးရေအများအပြား ကြဲချခဲ့တာကြောင့် လမ်းပျက်စီးမှုတွေရှိခဲ့သော်လည်း လူအထိအခိုက်မရှိဘူးလို့ ကယန်းအမျိုးသားတပ်မတော် KNA ပြော ရေးဆိုခွင့်ရှိသူ ခွန်းဆောင်ဒူက မဲခေါင်ကိုပြောပါတယ်။
“သူတို့က လွိုင်င်ကော်-မိုးဗြဲလမ်းကိုပြန်ပြီးတော့ စိုးမိုးချင်တဲ့အနေအထားမျိုးတော့ရှိတာပေါ့နော်၊ ဒါပေမဲ့ သူတို့က ထိုး ဖောက်နိုင်တဲ့အခြေအနေမျိုးတော့မရှိသေးဘူး၊ ကျွန်တော်တို့ အင်အားစုတွေ ကင်းပုံစံမျိုးတောက်လျှောက်ရှိထားတာပေါ့”လို့ သူကပြောပါတယ်။
စစ်ကောင်စီအနေနဲ့ ၂၀၂၅ နှစ်ဦးပိုင်းကစတင်ပြီး လွိုင်ကော်-မိုးဗြဲလမ်းမကြီးတလျှောက် နယ်မြေစိုးမိုးမှုပြန်လည်ရရှိနိုင်ဖို့ နေ့စဉ်လက်နက်ကြီးနဲ့ပစ်ခတ်တာ၊ လေကြောင်းကနေဗုံးကြဲချတိုက်ခိုက်တာနဲ့ ဒရုန်းဗုံးကြဲချတိုက်ခိုက်တာတွေ ခက်စိမ့်စိမ့် လုပ်လာပေမဲ့ မိုးဗြဲမြို့ကို စစ်ကြောင်းထိုး ဝင်ရောက်နိုင်တာမျိုးတော့မရှိသေးဘူးလို့ ဆိုပါတယ်။
မြေပြင်မှာ ထိတွေ့တိုက်ပွဲမကြာခဏဖြစ်ပွားလျက်ရှိတဲ့ မိုးဗြဲမြို့အနီးဝန်းကျင်ကို စစ်ကောင်စီအနေနဲ့ အချိန်မရွေး ဝင်ရောက်လာနိုင်သလို ပြည်သူတွေနေထိုင်ရာ နေအိမ်၊ အဆောက်အအုံနဲ့ စစ်ရှောင်ဒေသခံတွေတည်ရှိရာ နေရာတွေကို ရည်ရွယ်ချက်ရှိရှိ ဗုံကြဲချတိုက်ခိုက်တာတွေ ပြုလုပ်လာနိုင်တာကြောင့် ဒေသခံပြည်သူတွေ၊ စစ်ရှောင်တွေအနေနဲ့ သွားလာလှုပ်ရှားနေထိုင်ရာမှာ သတိဝီရိယာထားပြီး ဂရုတစိုက်ရှိကြဖို့လိုအပ်တယ်လို့ KNA ကသတိပေးပါတယ်။
“သူတို့စစ်ကြောင်းထိုးလာတဲ့နေကတော့ အကြီးအကျယ်ဖြစ်မယ့်နေပဲ၊ စစ်ကောင်စီက သူတို့စိုးမိုးနိုင်တာဆိုလို့ ၄၂၂ တပ်ရင်း မှာပဲ၊ တာဝန်ယူထားကြတဲ့ အင်အားစုတွေ အသီးသီးက မြေပြင်မှာဆိုလည်း ညီညီညွတ်ညွတ်စည်းစည်း လုံးလုံးနဲ့အလုပ်လုပ်နေတာပေါ့နော်၊ အခု ကျွန်တော်တို့ သူတို့ရဲ့မလှမ်းမကမ်းမှာနေထားတော့ သူတို့ကိုခြိမ်းခြောက်နိုင်တဲ့အနေအထား မျိုးလုပ်ထားနိုင်တယ်”လို့ ခွန်းဆောင်ဒူကပြောပါတယ်။
ပြန်လည်စုဖွဲ့ပေါင်းစည်းထားတဲ့ ကရင်နီအမျိုးသားများကာကွယ်ရေးတပ် (KNDF)၊ ပြည်သူ့ကာကွယ်ရေးတပ် (PDF)၊ မြို့ပြ တော်လှန်တပ်ဦး (URF) နဲ့ ကယန်းအမျိုးသားတပ်မတော် (KNA) အပါအဝင် ဒေသတော်လှန်ရေးတပ်တွေက ခမရ (၄၂၂) ကို ဝိုင်းဝန်းပိတ်ဆိုးထားတာဖြစ်ပါတယ်။
တော်လှန်ရေးတပ်တွေကို ဖောက်ထွက်မရဖြစ်နေတဲ့ စစ်ကောင်စီရဲ့မိုးဗြဲမြို့ ခြေစိုက် ခမရ ၄၂၂ တပ်နဲ့ လွိုင်လင်လေး အခြေစိုက် ခမရ (၅၃၀) ကနေပြီး မိုးဗြဲမြို့နယ်အတွင်းကို လက်နက်ကြီးတွေဖြင့် နေ့စဉ်ပစ်ခတ်လျက်ရှိပြီး အဲဒီပစ်ခတ်မှု ကြောင့် ဇန်နဝါရီ ၁၃ ရက်က ဘီလူးချောင်းဘေးမှာ ငါးထိုင်မျှားနေတဲ့ အသက် ၃၄ နှစ်အရွယ် အမျိုးသားတစ်ဦးထိခိုက် ဒဏ်ရာရရှိခဲ့ပါတယ်။
ဇန်နဝါရီ ၁၅ ရက်ကလည်း စစ်ကောင်စီက ဒီမောဆိုရှိ စစ်ရှောင်စခန်းတစ်ခုကို လေကြောင်းနဲ့ဗုံးကြဲတိုက်ခိုက် ခဲ့တာကြောင့် စစ်ရှောင်ပြည်သူ သုံးဦးသေဆုံးပြီး လေးဦးပြင်းထန်ဒဏ်ရာရရှိခဲ့ပါတယ်။
၂၀၂၃ ခုနှစ်၊ နိုဝင်ဘာလအတွင်းက (၁၁၁၁) စစ်ဆင်ရေးစတင်ပြီးနောက် ကရင်နီပြည်၊ မယ်စဲ့၊ ဒီးမော့ဆို၊ ရွာသစ်၊ ရှားတောနဲ့ မော်ချီး၊ မိုးဗြဲ၊ နန်းဖယ်ခုံ စတဲ့မြို့ ခုနစ်မြို့ကို တော်လှန်ရေးတပ်ဖွဲ့တွေကထိန်းချုပ်နိုင်ခဲ့ပါတယ်။ အဲဒီနောက် စစ်ကောင်စီရဲ့ ပြန်လည်ထိုးစစ်ဆင် တိုက်ခိုက်လာတာကြောင့် မယ်စဲ့၊ နန်းမယ်ခုံ၊ ရှားတော၊ မော်ချီမြို့တို့ကို တော်လှန်ရေးတပ်တွေက ပြန်လည်လက်လွှတ်ပေးခဲ့ရပါတယ်။
မိုးဗြဲဖယ်ခုံဟာ ရှမ်းပြည်နယ်တောင်ပိုင်းထဲက မြို့နှစ်မြို့ဖြစ်ပြီး ကရင်နီပြည်နယ်နဲ့ နယ်နိမိတ်ချင်းထိစပ်နေတဲ့ မြို့ဖြစ်တာ ကြောင့် ရှမ်းပြည်နယ်ပင်လောင်းဘက်ကနေ ကရင်နီဒေသကိုလာတဲ့ စစ်ကောင်စီတပ်တွေအနေနဲ့ မိုးဗြဲနဲ့ ဖယ်ခုံမြို့ကိုမဖြစ် မနေဖြတ်သန်းရတာဖြစ်လို့ စစ်ရေးမဟာဗျူဟာအရ အချက်အချာကျတဲ့မြို့ တစ်ခုလည်းဖြစ်နေပါတယ်။
CJ-017
#MeKongNews
#KNA
#လွိုင်ကော်
#မိုးဗြဲ
#ဗုံးကြဲ
