မဲခေါင်၊ ဇန်နဝါရီ ၁၄
တာချီလိတ်မြို့နယ်ကို ဖြတ်သန်းပြီး လာအိုနိုင်ငံဘက်အခြမ်းကို သွားရောက်အလုပ်လုပ်နေတဲ့ မြန်မာနိုင်ငံသားတွေထံကနေ ပါခုတ်ကျေးရွာစစ်ဆေးရေးဂိတ် တာဝန်ကျရဲတွေက ငွေကြေးအဆမတန်တောင်းနေတယ်လို့ သတင်းရင်းမြစ်တွေနဲ့ ဖြတ်သန်းသွားလာသူတွေက ပြောပါတယ်။
မိုင်းဖုန်း (ခ) ကျေးရွာအုပ်စုထဲမှာရှိတဲ့ ပါခုတ်ကျေးရွာ စစ်ဆေးရေးဂိတ်မှာ တာဝန်ကျတဲ့ နယ်ထိန်းမျိုးအောင်နဲ့ မင်းမင်းလတ်တို့က ငွေကြေးအဆမတန် ကောက်ခံနေတာဖြစ်ပြီး လူပို့ဆောင်ပေးတဲ့ ကားသမားတွေထံကသာမက လာအိုသွားမယ့်သူတွေထံကပါ အသွားကို ဘတ် ၂၀၀၊ အပြန်ကို ဘတ် ၁၀၀ ထပ်မံကောက်ခံတယ်လို့ သတင်းရင်းမြစ်တစ်ဦးက မဲခေါင်ကို ပြောပါတယ်။
ဒါ့အပြင် မဲခေါင်မြစ်ဆိပ်ရောက်ရင်လည်း ဝမ်ပုံရဲစခန်းက နယ်ထိန်းနဲ့အဖွဲ့က လာအိုဘက်ကမ်းပို့ပေးတဲ့လှေတွေထဲကနေ ဘတ်ငွေ ငါးထောင်၊ တစ်သောင်း ထပ်မံကောက်ခံသေးတယ်လို့ အဲဒီသတင်းရင်းမြစ်က ပြောပါတယ်။
“ပါခုတ်ကျေးရွာမှာစစ်ဆေးရေးဂိတ်ရှိတယ်။ အဲဒီစစ်ဆေးရေးဂိတ်မှာ ဝမ်ပုံစခန်းက ရဲတွေက အဓိကတာဝန်ယူထားပါတယ်။ ဝမ်ပုံရဲစခန်းဟာ မဲခေါင်မြစ်ဘေးမှာရှိပါတယ်။ မြစ်ဆိပ်ကိုရောက်ရင် နယ်ထိန်းအဖွဲ့က လာအိုကိုပို့တဲ့ လှေပိုင်ရှင်တွေထံက ထိုင်းဘတ်ငွေ ငါးထောင်၊ တစ်သောင်း အမျိုးမျိုးကောက်ခံပါတယ်” လို့ သူက ပြောပါတယ်။
အရင်က ကားတစ်စီးကို ဘတ် ၃၀၀၀ သာကောက်ခံပေမယ့် အခုအခါမှာ လူတစ်ဦးကို အသွား ဘတ် ၂၀၀၊ အပြန် ဘတ် ၁၀၀ ကောက်ခံတဲ့အပြင် ကားတစ်စီးကိုလည်း ဘတ် ၅၀၀၀ ကောက်ခံတဲ့အပြင် မဲခေါင်မြစ်ဘေးမှာလည်း ထပ်တောင်းသေးတယ်လို့ သတင်းရင်းမြစ်တွေက ပြောပါတယ်။
လက်ရှိမှာ တာချီလိတ်ကနေတဆင့် လာအိုဘက်ကို အလုပ်လုပ်ဖို့ရည်ရွက်ချက်နဲ့ သွားရောက်တဲ့ မြန်မာနိုင်ငံသားအရေအတွက်ဟာ တစ်ရက်ကို အနည်းဆုံး တစ်ရာကျော်ရှိနေပြီး တစ်ချို့ရက်တွေမှာ အယောက် ၃၀၀ ကျော်အထိရှိတယ်လို့ ပုံမှန်သွားလာသူတစ်ဦးက ပြောပါတယ်။
“အခုက လူဟောင်းတွေပြန်သွားတာများတယ်။ လူသစ်ဆိုရင်အလုပ်က ခက်တယ်။ လုပ်ဖူးတဲ့လူဆိုရင် ပိုအဆင်ပြေတယ်။ နိုင်ငံရေးနဲ့ ပတ်သက်တဲ့သူတွေ မသွားတာတော့ပိုကောင်းတယ်။ အဲဒီမှာ နေရာရနေတဲ့ နိုင်လင်းက မြန်မာစစ်တပ်ကလူတွေနဲ့အဆက်အသွယ်ရှိတယ်” လို့ သူက ပြောပါတယ်။
နိုင်လင်းဆိုသူဟာ လာအိုရဲတစ်ယောက်ရဲ့ သမီးဖြစ်သူနဲ့ ယူထားသူဖြစ်ပြီး မြန်မာစစ်တပ်အရာရှိတွေနဲ့ ရင်းနှီးသူဖြစ်ကာ နိုင်ငံရေးနဲ့ပတ်သက်သူတွေလာအိုဘက်မှာ ဖမ်းဆီးခံရတာဟာ သူ့လက်ချက်ဖြစ်တယ်လို့ သတင်းရင်းမြစ်တွေက ပြောပါတယ်။
တာချီလိတ်မြို့နယ်၊ ဝမ်ပုံဆိပ်ကမ်းတစ်ဖက်မှာရှိတဲ့ လာအိုနိုင်ငံဘက်အခြမ်းမှာ မြန်မာနိုင်ငံသားတွေသွားရောက် အလုပ်လုပ်ကိုင်နေတာဖြစ်ပြီး ဆောက်လုပ်ရေးလုပ်ငန်း၊ ကာစီနိုနဲ့ ကျားဖြန့်လုပ်ငန်းတွေမှာ ဝင်ရောက်လုပ်ကိုင်နေတာဖြစ်ပါတယ်။
လာအိုနိုင်ငံမှာ အလုပ်လုပ်ကိုင်နေတဲ့ မြန်မာနိုင်ငံသားအရေအတွက်ဟာ တစ်စတစ်စ များပြားလာပြီး လက်ရှိမှာ မြန်မာရွှေ့ပြောင်းအလုပ်သမားဦးရေ ၁ သိန်းကျော်ရှိနေပြီလို့ သိရပါတယ်။
MK – 004
#MeKongNews
#တာချီလိတ်
#လာအိုနိုင်ငံ
#ပါခုတ်ဂိတ်
#လာဘ်ငွေ
ဓာတ်ပုံ – ပုံဟောင်းဖြစ်ပါတယ်။
