မဲခေါင်၊ ဇန်နဝါရီ ၁၁
ရှမ်းပြည်တောင်ပိုင်း ၊ အောင်ပန်းရဲစခန်းက အချုပ်ကိုဖေါက်ပြီး ထွက်ပြေးသွားသူတွေကို ဒုရဲမှူးကြီးဦးစီးတဲ့အဖွဲ့က ဒီနေအထိလိုက်လံရှာဖွေနေဆဲဖြစ်ပြီး ဖြစ်စဉ်ကို CID ၊ အထူးသတင်းတပ်ဖွဲ့ SB နဲ့ နေပြည်တော်ဝန်ကြီးဌာနအဆင့်ကပါ လာရောက်စစ်ဆေးနေတယ်လို့ သိရပါတယ်။
ကလောခရိုင်၊ ဒုရဲမှူးကြီး ခင်နိုင် ဦးစီးတဲ့ အင်အား ၂၀ ခန့်နဲ့ သာစည်ဘက်၊ ပင်းတယ ဟံမြင့်မိုရ်ဘက်နဲ့ ရပ်စောက်ဘက်တွေကို ဒီနေ့(ဇန်နဝါရီ၁၁) အထိ လိုက်လံရှာဖွေနေဆဲလို့ သိရပါတယ်။
အချုပ်ခန်းသံတိုင်နဲ့ သစ်သားတိုင်တွေကို သံဖြတ်လွှနဲ့ တစ်ရက်ခွဲခန့် အချိန်ယူဖြတ်တောက်ကာ အခုလ၊ ဇန်နဝါရီ ၉ ရက်၊ မနက်ပိုင်း ရေစက်မောင်းနေတဲ့အသံရယ်၊ အချုပ်သားတွေ ဘုရားရှိခိုးသံတွေရယ် အသံဆူညံနေချိန်မှာ ထွက်ပြေးတာဖြစ်တယ်လို့ ရဲစခန်းနဲ့ နီးစပ်သူက ပြောပါတယ်။
အချုပ်ခန်းဖောက်ထွင်းမှုကို ပြီးခဲ့တဲ့နှစ်က ကလောလမ်းခွဲမှာ သားအမိနှစ်ဦးကိုသတ်ကာ ဆိုင်ကယ်နဲ့ လက်ဝတ်လက်စားတွေလုယက်ခဲ့သူ မင်းမင်းဦး (ခ) မင်းမောင်(၃၃) နှစ်နဲ့ အောင်ခိုင်ဦး(ခ)အောင်ကြီး(၂၆)နှစ်တို့က ဦးဆောင်တာလို့ သိရပါတယ်။
အောင်ပန်းအချုပ်ခန်းမှာ ကျားတစ်ခန်း၊ မတစ်ခန်း ချုပ်နှောင်ထားတာဖြစ်ပြီး အခုဖောက်ခံရတဲ့ ကျားအချုပ်ခန်းမှာ အချုပ်သား ၂၉ ဦးရှိခဲ့တာဖြစ်လို့ ကျန်ရှိသူတွေကို သံဖြတ်လွှ ဘယ်လိုရတာကအစ ဖောက်ထွင်းမှုကို သိ၊ မသိ အသေးစိတ်စစ်ဆေးနေတယ်လို့ သိရပါတယ်။
အခင်းဖြစ်ချိန် တာဝန်ကျ ကင်းမှူးရဲတပ်ကြပ်ကြီး ထွန်းမြင့်နဲ့ ကင်းသားတွေ၊ တာဝန်မှူး၊ စခန်းမှူးတွေကို အချုပ်ခန်းတိုင်တွေ စစ်ဆေးမှုကအစ အချုပ်သားတွေဆီပါသွားတဲ့ ၁၂ ဗို့သေနတ် ကျည်မရှိတာ၊ ရဲတွေကိုယ်တိုင် ဒီဖြစ်စဉ်မှာ ပါ၊ မပါ ကိုလည်း စစ်ဆေးနေတယ်လို့ သိရပါတယ်။
“ဆိုင်ကယ်လု လူသတ်ကောင်တွေကို အင်တောဘက်ပြေးမယ်ယူဆလို့ လိုက်နေတယ်၊ တောထဲရောက်သွားရင်တော့ တွေ့ဖို့မလွယ်လောက်တော့ဘူး” လို့ အောင်ပန်းဒေသခံတစ်ဦးက ပြောပါတယ်။
အချုပ်ဖောက်ထွက်ပြေးသူ ၁၀ ဦးအနက် နှစ်ဦးကို ဖမ်းမိပြီး ကျန်သူတွေလွတ်မြောက်နေဆဲလို့ သိရပါတယ်။
ဇန်နဝါရီ ၉ ရက် မနက် ၁ နာရီခွဲခန့်က အချုပ်ခန်းဖောက်ပြေးသူ ၁၀ ဦးထဲက ညီညီအောင် (ခ) ညီညီ အောင်ပန်းကို အချုပ်ဖောက်ပြေးစဉ်မှာပဲ ဖမ်းဆီးရမိခဲ့ပြီး ကလောမြို့က ခိုးမှုနဲ့ဖမ်းထားတဲ့ မိုးဆွေဟိန်း (ခ) ရဲလေးကို မနက် ၉ နာရီခွဲလောက်မှာ မစခ(၉၀၃) အနီးမှာ ဖမ်းမိတယ်လို့ သိရပါတယ်။
အခင်းဖြစ်တဲ့အချိန်က အောင်ပန်း အချုပ်ခန်းထဲမှာ အချုပ်သားကျား ၂၉ ဦး ၊ မ ၃ ဦး၊ စုစုပေါင်း ၃၂ ဦး ရှိနေပြီး ကင်းသမား ရဲတပ်သား ထွန်းမင်းကျော်ရဲ့ ကင်းချိန်မှာ ကျားအခန်းအိမ်သာဘက်ကနေ အသံကြားလို့ သွားကြည့်တဲ့အခါ အချုပ်ခန်းဖေါက်ပြီး ထွက်ပြေးနေကြတာတွေ့လို့ အော်ခေါ်ခဲ့ရာ ကင်းမှူးနဲ့ ကျန်ကင်းသမားတွေနိုးပြီး ဝိုင်းပြီးဖမ်းကြလို့ ညီညီအောင် တစ်ဦးကိုသာ ပြန်လည်ဖမ်းမိခဲ့တာပါ။
ထွက်ပြေးသွားတဲ့ အချုပ်သားတွေဟာ ကင်းမှူး ရဲတပ်ကြပ်ကြီး ထွန်းမြင့်ကိုင်ဆောင်တဲ့ ၁၂ ဗို့ တစ်လက်ကို ယူဆောင်သွားပေမယ့် ကျည်ဆံပါမသွားဘူးလို့ သိရပါတယ်။ေ
အောင်ခိုင်မိုး (ခ) အောင်ကြီး( ရွှေညောင်- လူသေမှု နဲ့ လုယက်မှု) ၊ မင်းမင်းဦး (ခ) မင်းမောင်( ပင်လုံ – လူသေမှု နဲ့ လုယက်မှု ) ၊ မိုးမြင့်စိုး (ခ) ဇိုးဘိုင်း အောင်ပန်း (ခိုးမှု) ၊ ရန်ရှင်းအောင် (အောင်ပန်း- ခိုးမှု) ၊ ငမိုး (အောင်ပန်း – ခိုးမှု) ၊ လွင်မိုး (ခ) လွင်မိုးအောင်(အောင်ပန်း- ခိုးမှု) ၊ သန့်ဇင်ဦး (အောင်ပန်း – ခိုးမှု) ၊ အောင်ကိုဦး (ခ) ဧရာ၀တီ (အောင်ပန်း – ခိုးမှု) တို့ လွတ်မြောက်နေဆဲဖြစ်ကြောင်းနဲ့ အသက် ၁၅ နှစ်ကနေ ၃၂ နှစ်အထိ အရွယ်စုံရှိတယ်လို့ သိရပါတယ်။
MK-012
#MeKongNews
#အောင်ပန်း
#ရဲစခန်း
#အချုပ်ဖေါက်
#အချုပ်သားထွက်ပြေး
