မဲခေါင်၊ ဇန်နဝါရီ ၅
၇၇ ကြိမ်မြောက် လွတ်လပ်ရေးနေ့အထိမ်းအမှတ်အဖြစ် လွှတ်ပေးတဲ့ လွတ်ငြိမ်းချမ်းသာခွင့်ထဲမှာ နိုင်ငံရေးအကျဉ်းသားတွေ ပါဝင်ပေမယ့် ရှမ်းပြည်အတွင်းက အကျဉ်းထောင်တွေမှာရှိတဲ့ နိုင်ကျဉ်းတွေ လွတ်မြောက်တာ မတွေ့ရပါဘူး။
ရှမ်းပြည်တောင်ပိုင်းမှာ ညောင်ရွှေ (တောင်လေးလုံး)ထောင်၊ ရှမ်းအရှေ့မှာ ကျိုင်းတုံထောင်နဲ့ မိုင်းဆတ်ထောင်တွေရှိရာမှာ ညောင်ရွှေ(တောင်လေးလုံးထောင်)က လွတ်မြောက်သူ ၈၀ ဦး ရှိပါတယ်၊ အဲဒီအထဲကမှ ၃၉ ဦးဟာ လွတ်ရက်နီးလို့သိရပြီး လွတ်ငြိမ်းရသူက ၄၁ ဦး ဖြစ်ပါတယ်။ အဲဒီအထဲမှာ နိုင်ငံရေးအကျဉ်းသား မပါဘူးလို့ သိရပါတယ်။
“ခြောက်လအောက် လွတ်နီးတွေပဲ ပေးတာဆိုတော့ အထဲမှာ မရှိလောက်ဘူး၊ ရှိခဲ့ရင်လည်း အခြား ပုဒ်မတွေနဲ့တွဲထားတော့ သူတို့မရဘူး၊ ကြားတာတော့ တစ်ယောက်မှမပါဘူး” လို့ မကြာခင်ကမှ ထောင်ကလွတ်မြောက်ခဲ့တဲ့ နိုင်ကျဉ်းတစ်ဦးက ပြောပါတယ်။
ရှမ်းပြည်အရှေ့ပိုင်း၊ ကျိုင်းတုံထောင်က ကျားဖြန့်အမှုနဲ့အကျဉ်းကျနေသူ ထိုင်းနိုင်ငံသား ၁၅၁ ဦးနဲ့ စစ်တပ်ပုဒ်မ(တမအ-၇၁)၊ ခိုး၊ ဆိုး၊ လု၊ နိုက်တွေသာ လွတ်မြောက်သလို မိုင်းဆတ်ထောင်ကလည်း စစ်တပ်ပုဒ်မ(တမအ-၇၁)နဲ့ ခိုး၊ ဆိုး၊ လု၊ နိုက်တွေသာ လွတ်မြောက်တယ်လို့ သိရပေမယ့် အရေအတွက် မသိရသေးပါဘူး။
“နိုင်ကျဉ်းဆိုတာ ခေတ်အဆက်ဆက် အာဏာရှင်တွေရဲ့ ကုန်ကြမ်းတွေပဲ၊ လွှတ်လိုက် ဖမ်းလိုက်နဲ့ နိုင်ငံရေး အလျှော့အတင်းကစားတာပဲ၊ ရာဇဝတ်မှုတွေအတွက်ကတော့ ဒီလို လွတ်ငြိမ်းသက်သာတွေနဲ့ ပြစ်ဒဏ်စေ့ မနေရဘူးပေါ့၊ ထောင်ထဲတုန်းက ရာဇဝတ်မှုတွေက သူတို့ မြန်မြန်လွတ်နိုင်တာ နိုင်ကျဉ်းတွေကြောင့်လို့ ပြောခဲ့ကြတာ” လို့ ရှမ်းပြည် နိုင်ငံရေးအကျဉ်းသားဟောင်းများအဖွဲ့ဝင် တစ်ဦးက မဲခေါင်ကို ပြောပါတယ်။
ရှမ်းမြောက်က လားရှိုးအကျဉ်းထောင်ကို ၁၀၂၇ စစ်ဆင်ရေးမှာ MNDAA က သိမ်းပိုက်ထိန်းချုပ်ခဲ့ပြီး သီပေါထောင်ကိုတော့ TNLA က သိမ်းပိုက်ခဲ့တာ ဖြစ်ပါတယ်။
လက်ရှိမှာ ထောင် ၂၄ ထောင်က နိုင်ကျဉ်း ၂၁၃ ဦးသာ လွတ်သေးတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ကနဦးထုတ်ပြန်တဲ့စာရင်းအရ သိရပါတယ်။
စစ်ကောင်စီက(၇၇) နှစ်မြောက်လွတ်လပ်ရေးနေ့ အထိမ်းအမှတ်အနေနဲ့ ပြစ်ဒဏ်ကျခံနေရတဲ့ အကျဉ်းသား ၅၈၆၄ ဦးကို မနေ့က လွတ်ငြိမ်းချမ်းသာခွင့် ပေးခဲ့တာဖြစ်ပါတယ်။
MK-012
#MeKongNews
#ရှမ်းပြည်
#နိုင်ကျဉ်း
#တာချီလိတ်
#မိုင်းဆတ်
