မဲခေါင်၊ ဇန်နဝါရီ ၄
ရှမ်းပြည်တောင်ပိုင်း၊ ဟဲဟိုးမြို့နဲ့ အောင်ပန်းမြို့ကနာမည်ကျော်ကြားနေတဲ့ လောင်းကစားဝိုင်းသတင်းကို မဲခေါင်က သတင်းဖော်ပြခဲ့ပြီးနောက် အောက်ခြေရဲတွေသာ ရာထူးချခံရသလို နယ်ပြောင်းခံရတာတွေ ယခုရက်ပိုင်းအတွင်း ပြုလုပ်နေတယ်လို့ ကလောခရိုင်ရဲတပ်ဖွဲ့အသိုင်းအဝန်းကသိရပါတယ်။
ပြီးခဲ့တဲ့နှစ်က ဟဲဟိုးမြို့၊ အင်းခေါင်းလောင်းကစားဝိုင်းသတင်းနဲ့ အောင်ပန်းမြို့က လောင်းကစားဝိုင်းသတင်းတွေကို မဲခေါင်သတင်းဌာနက ဖေါ်ပြခဲ့ရာမှာ လုံခြုံရေးတာဝန်ရှိရဲတွေကို ရဲတရားရုံးတွေနဲ့ စစ်ဆေးပြီးနောက် အောက်ခြေအဆင့်တွေကို အရေးယူမှုတွေလုပ်လာတာလို့ သိရပါတယ်။
အောင်ပန်းမြို့က နယ်ထိန်း ဒုရဲအုပ် သန့်ဇော်ထွန်းကို ရဲအရာခံအဆင့် ရာထူးချခံရကာ မိုင်းရယ်ကိုပြောင်းရွှေ့ခံရသလို ပြည်နယ် မှု/ကူ က ရဲအုပ်ရဲမြင့်သူ၊ ဟဲဟိုးစခန်းမှူး နဲ့ကလောခရိုင် ဒ/န က ဒု ရဲအုပ် သန်းထိုက်တို့ကို ရာထူးချပြီး တခြားနယ်တွေကို ပြောင်းရွှေ့ခံရတယ်လို့ သိရပါတယ်။
“စားတုန်းက အတူစားနေကြတာ၊ အထက်က ပိုတောင်စားသေးတယ်၊ အရေးယူတော့အောက်ခြေကို၊ ဖိထောင်းတာပေါ့” လို့ ကလောခရိုင်ရဲနဲ့ နီးစပ်သူတစ်ဦးက မဲခေါင်ကိုပြောပါတယ်။
ဟဲဟိုးမြို့၊ အင်းခေါင်းဘုန်းကြီးကျောင်းအနီးနဲ့ အောင်ပန်းမြို့၊ လွယ်မခံ ကောင်းမှုတော်စေတီ အနီးတွေမှာပြုလုပ်ခဲ့ကြတဲ့ လောင်းကစားဝိုင်းဟာ တစ်ညကို ကျပ်သိန်းထောင်ချီ အလျော်အစားရှိကာ အကောက်ငွေအားဖြင့်လည်း တစ်ညကို ကျပ်သိန်းရာကျော်အထိ ရှိပါတယ်။ လောင်းကစားဝိုင်းတွေကို အပိုင်ရဲစခန်းတွေက အကာအကွယ်ယူပေးခဲ့ရတယ်လို့ သိရပါတယ်။
“အထက်လူကြီးတွေ ခွင့်မပြုပဲ မလုပ်နိုင်ဘူးလို့” နီးစပ်သူတစ်ဦးက ပြောပါတယ်။
နယ်မြေခံလုံခြုံရေးတာဝန်ရှိသူတွေကို ပေးရတဲ့ အကတိကြေးကို ငွေသားနဲ့ပေးရတာမဟုတ်ပဲ Kpay, Wave Pay တွေနဲ့ လွှဲပေးခဲ့ရတာလို့ သိရပါတယ်။
အဲ့ဒီကိစ္စကို ပြည်နယ်ရဲကအရေးမယူပဲ ဖုံးဖိထားတာကို နေပြည်တော်က သိတဲ့အခါ အပြောင်းခံရမယ်၊ အစစ်ခံရမယ်၊ ရှေ့တန်းအပို့ခံရမယ်လို့ အငြိမ်းစားရဲမှူးတစ်ဦးက သုံးသပ်ပါတယ်။
အဲဒီလောင်းကစားဝိုင်းဟာ အခုထိပျက်ပြယ်တာမျိုးမရှိသေးပဲ စစ်ကောင်စီနဲ့ တိုက်ရိုက်ပတ်သက်မှုရှိတဲ့ လုံခြုံရေးအဝန်းအဝိုင်းတစ်ခုမှာ ပြောင်းရွှေ့လုပ်ဆောင်နေကြတယ်လို့ မဲခေါင်ကသိရပေမယ့် သတင်းခိုင်မာတိကျမှုကို စောင့်ဆိုင်းအတည်ပြုနေဆဲ ဖြစ်ပါတယ်။
MK-012
#MeKongNews
#ဟဲဟိုးမြို့
#အောင်ပန်းမြို့
#နာမည်ကျော်
#လောင်းကစားဝိုင်း
