မဲခေါင်၊ ဒီဇင်ဘာ ၂၈
ရှမ်းပြည်မြောက်ပိုင်း၊ လားရှိုးနဲ့ ကျောက်မဲမြို့နယ်ဘက်ကနေ ရှမ်းပြည်နယ်တောင်ပိုင်း၊ တောင်ကြီးဘက်ကို လာရောက်တဲ့ ၁၁ မျဉ်းစောင်း မှတ်ပုံတင်ကိုင်ဆောင်ထားသူ ခရီးသည်တချိုကို စစ်ကောင်စီစစ်ဆေးရေး ဂိတ်တွေမှာ အခုဒီဇင်ဘာလ တတိယပါတ်က စတင်ပြီး ဖမ်းဆီးတာတွေ ရှိနေတယ်လို့ ကားသမားတွေနဲ့ ခရီးသည်တွေထံကနေသိရပါတယ်။
၁၁ မျဉ်းစောင်း (ရခိုင်ပြည်နယ်)မှတ်ပုံတင်ကိုင်ဆောင်ထားတဲ့ ခရီးသည်တွေကို စစ်ဆေးရေးဂိတ်တွေမှာ အသေးစိတ်စစ်ဆေးမေးမြန်းပြီးနောက် အမျိုးသမီးတွေနဲ့ သက်ကြီးပိုင်းတွေကို ဆက်လက်သွားလာခွင့်ပြုပေမယ့် တချို့ကိုတော့ဖမ်းဆီးထားတယ်လို့ဆိုပါတယ်။
မိုင်းကိုင်အနီးက ဂိတ်နဲ့ တာကော်တံတား ဂိတ်မှာဖမ်းဆီးနေတာလို့ လားရှိုး-တောင်ကြီးသွား ကားသမားတစ်ဦးကပြောပါတယ်။
သူက “ဂိတ်တွေမှာ စစ်ဆေးတဲ့အခါ တချို့ကားသမားတွေက ခရီးသည်တွေကို တာဝန်မခံပဲနဲ့ စစ်ဆေးတဲ့ နေရာတွေမှာ သူမသိဘူးဆိုပြီး ခေါင်းရှောင်တာတွေရှိတယ်။ စစ်တပ်နဲ့ ရဲကဆွဲစိတယ်။ အမှန်က ဟိုမှာလက်မှတ်လာဖြတ်ကတည်းက သေချာမေးပြီးတော့ တာဝန်ယူနိုင်တယ်ဆိုမှခေါ်လာရမှာလေ” လို့ပြောပါတယ်။
အဲဒီလို အခြေအနေတွေကြောင့် ရှမ်းမြောက်ကနေ ရှမ်းတောင်ကို လာရောက်မယ့် ရခိုင်ပြည်နယ် မှတ်ပုံတင်ကိုင်ဆောင်ထားတဲ့ ခရီးသည်တွေကို ကားဂိတ်တွေ၊ ကားသမားတွေက လက်မှတ်မရောင်းပေးတာ၊ ကားပေါ်လိုက်ပါစီးနင်းဖို့ မခေါ်လာရဲတာတွေ ရှိနေတယ်လို့သိရပါတယ်။
ခရီးသည်တစ်ဦးက “အဓိကကတော့ ရခိုင်တိုက်ပွဲအခြေအနေတွေကြောင့် ရရာလုပ်တာလို့ မြင်တာပဲ။ တာကော်တံတားဂိတ်မှာဆိုရင် ကားရပ်ပြီဆိုတာနဲ့ ၁၁ မျဉ်းစောင်းပါရင် ကားပေါ်က အရင်ဆင်းလာဆိုပြီး ခေါ်စစ်တာ။ ကျန်မှတ်ပုံတင်ကိုင်ထားတဲ့သူတွေကြတော့ ကားပေါ်ကနေမဆင်းရဘူး၊ မှတ်ပုံတင်ပဲ ပြရတယ်” လို့မဲခေါင်သတင်းဌာနကို ပြောပါတယ်။
ဒီအပြင် ရှမ်းပြည်မြောက်ပိုင်းကနေ တောင်ကြီးမြို့ကို သွားရောက်မယ့် ခရီးသည်တွေအနက် ၅ မျဉ်းစောင်း(စစ်ကိုင်းတိုင်း ဒေသကြီး)နဲ့ ၁၃ မျဉ်းစောင်း လရန (လားရှိုး၊ ကျောက်မဲ) မှတ်ပုံတင်ကိုင်ဆောင်ထားသူတွေကိုလည်း ခရီးသွားထောက်ခံစာ(ရပ်ကွက်၊ ရဲစခန်း)ပါမှသာ လက်မှတ်ရောင်းပေးနေသလို စစ်ဆေးရေးဂိတ်တွေမှာ အဲဒီထောက်ခံစာပြသနိုင်မှသာ ဆက်လက်သွားလာခွင့်ပြုနေတယ်လို့ သိရပါတယ်။
ဓာတ်ပုံ-တာကော်တံတားစစ်ဆေးရေးဂိတ်
CJ-003
#MekongNews
#စစ်ကောင်စီ
#၁၁မျဉ်းစောင်း
#မှတ်ပုံတင်
#ဖမ်းဆီး
