မဲခေါင်၊ ဒီဇင်ဘာ ၂၄
တောင်ကြီးမြို့ဟာ ဒေသတွင်းအနီးဝန်းကျင်မြို့တွေနဲ့မတူပဲ ဓါတ်အားပြတ်တောက်ချိန်များပြီး အလှည့်ကျဓါတ်အားပေးစနစ်ပုံစံမျိုး ဓါတ်အားပေးချိန် ပြတ်တောက်ချိန်ပုံမှန်မဟုတ်တာကြောင့် နေ့စဉ်မိသားစုလုပ်ငန်းလည်ပတ်မှု နှောင့်နှေးတာနဲ့ အပိုထွက်ငွေများပြားလာတယ်လို့ မြို့ခံတွေက ပြောပါတယ်။
အလှည့်ကျစနစ်နဲ့ ၄ နာရီခြားတစ်ခါ ဓါတ်အားပေးမယ်လို့ နိုင်ငံတဝှမ်း ကြေညာထားပေမယ့် တောင်ကြီးမှာ တခါတရံ ၂၄ နာရီအတွင်း မိနစ် ၁၈၀ ခန့်သာ ဓါတ်အားရရှိသလို ဓါတ်အားပေးပြီးခဏအကြာမှာ အချိန်ကြာမြင့်စွာ ပြန်လည်ပြတ်တောက်နေတဲ့ရက်က ပိုမိုများပြားနေတယ်လို့ မြို့ခံတွေက ပြောပါတယ်။
ဆိုင်ရှင်တစ်ဦးက “မနက် ၈ နာရီလောက်ကပျက်သွားပြီး ည ၈ နာရီလောက်မှ ပြန်လာတာတွေလည်း ရှိတယ်။ ၈ နာရီလာပြီး ၁၁ လောက်ဆို ပြန်ပျက်တယ်။ တရက်နဲ့တရက်ကလည်း မတူဘူး။ အခက်အခဲတွေက အများကြီးရှိတယ်။ ရေခဲသေတ္တာတွေထဲကဆို အကုန်အရည်ပျော်တယ် အသားတွေဆို သိမ်းလို့မရဘူး။ လုပ်တောင် မလုပ်စားချင်တော့ဘူး။ ခုမီးစက်နဲ့ သုံးရတယ်” လို့ ပြောပါတယ်။
အမျိုးသားတစ်ဦးက “မီးက တစ်ရက်ကို ၄-၅ ခါလောက်လာတယ်။ တခါလာရင် ၁၀ မိနစ်လောက်။ ညောင်ဖြူစခန်းမှာတရက်ကို နေ့ခင်း မီး ၂ နာရီလာရင် ကံကောင်း။ ပိုဆိုးတာက မီးလာချိန်ကို မှန်းလို့မရတာ။ ဒီနေ့ တနေကုန်မီးပျက်လို့ ညနေ လာမယ်ထင်ပေမယ့် မလာတဲ့အခါတွေလည်းရှိတယ် ” လို့ ပြောပါတယ်။
ဓါတ်အားအဓိကလိုအပ်တဲ့ စားသောက်ဆိုင်တွေမှာ အလင်းရောင်ရရှိဖို့ မီးစက်အသုံးပြုရာမှာ တရက်အတွက် စက်သုံးဆီဖိုး ကျပ် ၁၅၀၀၀ ခန့်ကုန်ကျကာ ချက်ပြုတ်ကြော်လှော်ရေးအတွက် ဂက်စ်ကိုအသုံးပြုရာမှာ တစ်ရက်ကို ဂက်စ်ဖိုး ကျပ် ၂၇၀၀၀ ဝန်းကျင် ကုန်ကျနေတာဖြစ်လို့ တစ်လ ဂက်စ်ဖိုး ရှစ်သိန်းကျော် ကုန်ကျနေတယ်လို့ ဆိုင်ပိုင်ရှင်က ပြောပါတယ်။
ဒေသတွင်းမှာ တောင်းကြီးမြို့နဲ့မဝေးတဲ့ အောင်ပန်းမြို့မှာ အလှည့်ကျစနစ်နဲ့ တစ်ရက်ကို မိနစ် ၁၂၀ ခန့် ပုံမှန်ဓါတ်အားရရှိတယ်လို့ သိရပါတယ်။
လျှပ်စစ်အခြေခံ လူနေမှုစနစ်ဖြစ်တာကြောင့် ဓါတ်အားပေးစနစ်မူမမှန်တဲ့အခါ တည်လက်စထမင်းအိုး ပျက်စီးတာ၊ ရေမတင်ရတာ၊ အလင်းရောင်အတွက် အဆင်မပြေတာတွေရှိနေလို့ တောင်ကြီးမြို့ကိုလည်း အလှည့်ကျစနစ်နဲ့ ဓါတ်အားပေးချိန် ပြတ်တောက်ချိန် ပုံမှန်ပေးစေချင်တယ်လို့ မြို့ခံတွေက ပြောပါတယ်။
မီတာခအနေနဲ့လည်း စက်တင်ဘာလထဲမှာ တယူနစ်ကို ၅၀ နှုန်းကောက်ခံတာတွေရှိနေပြီး ထပ်တိုးကောက်ခံတာတွေရှိတဲ့အပြင် မြို့အစွန်နားက ရပ်ကွက်တွေမှာ မီတာမဖတ်ဘဲ နံပတ်ခန့်မှန်းထည့်တာတွေလည်း ရှိနေတယ်လို့ သိရပါတယ်။
CJ-004
#MekongNews
#တောင်ကြီး
#ဓါတ်အား
#ပြတ်တောက်
#ပုံမှန်
#အချိန်ပိုင်း
