မဲခေါင်၊ ဒီဇင်ဘာ ၂၀
စစ်ကောင်စီထိန်းချုပ်ထားတဲ့ ကရင်နီပြည်၊ လွိုင်ကော်မြို့မှာ လူငယ်အမျိုးသားတွေအပြင် အသက်ကြီးသူတွေပါ စစ်မှုထမ်းဖို့ ဒီကနေ့ ဖမ်းဆီး ခေါ်ဆောင်ခံနေရတယ်လို့ ဒေသခံတွေက ပြောပါတယ်။
ဧက ၅၀၀ (အောင်သီဟ) ရပ်ကွက်ဘက်မှာတော့ လူငယ်တွေအပြင် အသက် ၅၀ ကျော်တွေပါ ခေါ်ဆောင်ခံနေရပြီး မင်းစုရပ်ကွက်ဘက်မှာတော့ ဒီကနေ့( ဒီဇင်ဘာ ၂၀) မှာ အုပ်ချုပ်ရေးမှူးနဲ့ စစ်ကောင်စီတပ်ဖွဲ့၀င်တွေက နာမည်စာရင်း နဲ့ တစ်အိမ်တက်ဆင်း လာရောက်ခေါ်ဆောင်ကာ တချို့လူငယ်တွေ အိမ်ပေါ်ကဆွဲချခံရတာမျိုးတွေအထိ ရှိနေတယ်လို့ ဒေသခံတွေထံက သိရပါတယ်။
စစ်ရှောင်ရာမှ လွိုင်ကော်မှာ ပြန်လည်နေထိုင်ကြတဲ့မြို့ခံတွေထဲက လူငယ်အမျိုးသားတွေနဲ့ အသက် ၅၀ ကျော်အရွယ်တွေကို စစ်မှုထမ်းဖို့ ပေါ်တာဆွဲဖမ်းဆီးတာတွေ ပြုလုပ်နေတာပါ။
“အိမ်ကို သူခိုး ခိုးတယ် ပြန်လာကြည့်ပါဆိုလို့ ပြန်ကြည့်တာ နာမည်စာရင်းလာကောက်သွားတယ်၊ တစ်ပတ်လောက်နေတော့ အုပ်ချုပ်ရေးမှူးကိုယ်တိုင် လာခေါ်ပြီး ထောက်ပို့တပ်မှာသွားပို့တယ်၊ ငယ်သူမို့ခေါ်တာနားလည်ပေမဲ့ အခုကအသက်ကြီးနေသူ ခေါင်းဖြူနေသူ တချို့ဆို ရောဂါအခံရှိသူကိုပါ ခေါ်သွားတယ်” လို့ စစ်မှုထမ်းခေါ်ဆောင်ခံရတဲ့ ကာယကံရှင် မိသားစုနဲ့နီးစပ်သူက မဲခေါင်ကို ပြောပါတယ်။
အခုလို စစ်မှုထမ်းဖို့ခေါ်ဆောင်ရာမှာ လွိုင်ကော်မြို့ ရပ်ကွက်တိုင်းလိုလိုဖြစ်နေပြီး သက်ကြီးပိုင်းတွေကို ရပ်ကွက်လုံခြုံရေးအတွက်ဟု ခေါင်းစဉ်တပ်ခေါ်ဆောင်သွားကာ သင်တန်းရောက်တဲ့အခါမှာတော့ ပြည်သူ့စစ်မဟုတ်ဘဲ ပြည်သူ့ကာကွယ်ရေးနဲ့ အကြမ်း ဖက်တိုက်ဖျက်ရေး ဆိုတဲ့အဖွဲ့ထဲ ပို့ခံရတာဖြစ်တယ်လို့ ဆိုပါတယ်။
“တချို့က အမှန်တရားကို သိသိကြီးနဲ့မပြောရဲကြဘူး၊ အုပ်ကြီးတွေလုပ်သလို ခံကြရတယ်၊ ကျွန်မသူငယ်ချင်းအဖေကိုခေါ်တုန်းက အဖေလိုက်ရင် သမီးကိုမခေါ်တော့ဘူးလို့ပြောလို့ သူငယ်ချင်းအဖေက ငါလည်းအသက်ကြီးပြီ ငါသွားလို့ ငါ့သားသမီးလွတ်ကင်းတယ်ဆိုရင် သွားလိုက်မယ်ဆိုပြီး လိုက်သွားတာတဲ့၊ ရင်နာတယ် ဒီစကားကြားရတာ” လို့ လွိုင်ကော်မြို့ ဒေသခံတစ်ဦးက ပြောပါတယ်။
ပြီးခဲ့တဲ့နို၀င်ဘာလအတွင်းက စစ်မှုထမ်းဖို့ဖမ်းဆီးခံရတဲ့ အသက်ကြီးပိုင်းတွေကိုတော့ အမှတ်(၇၂၂) ထောက်ပံ့ရေးနဲ့ ပို့ဆောင်ရေးတပ်အတွင်း ပို့ဆောင်ခံရပြီး သင်တန်းတက်သူ ၁၁၅ ဦးခန့် ရှိပါတယ်။
ကျောင်းသားကွင်းမှာ စစ်မှုထမ်း စာရင်းပေးသွင်းရတာ၊ ပေါ်တာဆွဲခံရတာနဲ့ အဓမ္မဆွဲခေါ်ခံရတဲ့ လူငယ်၊ လူလတ်ပိုင်း ၄၀၀ ခန့်ကို အားကစားကွင်းအတွင်း သင်တန်းပေးတာတွေရှိတယ်လို့ ဒေသခံတွေကပြောပါတယ်။
စစ်ကောင်စီ လွိုင်ကော်မြို့ကို ပြန်လည်ထိန်းချုပ်နိုင်ခဲ့တာ တစ်နှစ်ကျော်လာပေမယ့် မြို့ခံစစ်ရှောင်တွေ ရာနှုန်းပြည့် ပြန်လည်အခြေချနေထိုင်တာမျိုး မရှိတာကြောင့် အမြန်ဆုံးနေရပ်ပြန်ဖို့ ဖိအားပေးလုပ်ဆောင်နေတယ်လို့ သိရပါတယ်။
မြို့ကိုစွန့်ခွာပြီး စစ်ရှောင်နေကြတဲ့ လွိုင်ကော်မြို့ခံတွေကို စစ်ကောင်စီက ၂၀၂၅ ခုနှစ် မတ်လနောက်ဆုံးထား ပြန်လည်နေထိုင်ကြဖို့ ဖိအားပေးနေပါတယ်။
၂၀၂၃ ခုနှစ်၊ နို၀င်ဘာ ၁၁ ရက်က လူထုတော်လှန်ရေး ကရင်နီပူးပေါင်းတပ်တွေ ၁၁၁၁ စစ်ဆေးရေးကိုစတင်ခဲ့ပြီး စစ်ကောင်စီတပ်တွေကိုတိုက်ထုတ်ကာ လွိုင်ကော်မြို့အတွင်းပိုင်း ရပ်ကွက်တွေအထိ ထိန်းချုပ်သိမ်းပိုက်နိုင်ခဲ့ပေမယ့် စစ်ကောင်စီက အင်အားအလုံးအရင်းနဲ့ တန်ပြန်လည်ထိုးစစ်ဆင်ခဲ့တာကြောင့် တော်လှန်ရေးအဖွဲ့တွေ မြို့ကိုလက်လွှတ်လိုက်ရပါတယ်။
CJ-017
#MekongNews
#လွိုင်ကော်
#၅၀ကျော်အရွယ်
#စစ်မှုထမ်း
#ဖမ်းခံနေရ
