မဲခေါင်၊ ဒီဇင်ဘာ ၁၅
ရှမ်းပြည်အရှေ့ပိုင်းနဲ့ ထိုင်းနယ်စပ်ထိစပ်နေတဲ့နေရာမှာ နယ်မြေအငြင်းပွားမှုဖြစ်နေတဲ့ တပ်စခန်းတွေကနေ တပ်ဖွဲ့ကဆုတ်ခွာပေးဖို့ “ဝ” ဘက်က သဘောတူလိုက်ပြီး အချိန် ၃ လခန့် တောင်းဆိုတယ်လို့ ထိုင်းသတင်းတစ်ခုက ဒီနေ့ ဒီဇင်ဘာလ ၁၅ ရက်မှာ ဖော်ပြပါတယ်။
Thai Move Institute ရဲ့ သတင်းအစီအစဉ်ဖြစ်တဲ့ The Critics က ဖော်ပြခဲ့တာဖြစ်ပြီး သတင်းထဲမှာ “ဝ” တပ်ဖွဲ့ဘက်က ဆုတ်ခွာပေးဖို့ သဘောတူကြောင်း၊ ဒါပေမယ့် ဆုတ်ခွာပေးဖို့ “ဝ” တပ်ဖွဲ့ကို အချိန် ၃ လ၊ ၄ လခန့် ပေးဖို့ဆိုကြောင်း၊ ကြေညာချက်ထုတ်ပြန်ရာမှာ “ဝ” တပ်ဖွဲ့က အရှုံးပေးတာမျိုး၊ ကြောက်ရွံ့လို့ ဆုတ်ခွာတာမျိုး မဟုတ်ဘူးဆိုတာကို ထည့်သွင်းပေးရမယ်လို့ တောင်းဆိုကြောင်း ထိုင်းသတင်းမှာ ဖော်ပြသွားပါတယ်။
“ဝ” တပ်ဖွဲ့ ဆုတ်ခွာပေးမယ်ဆိုတဲ့ အကြောင်းအရာနဲ့ပတ်သက်လို့ အတည်ပြုနိုင်ဖို့ မဲခေါင်သတင်းဌာနက ကြိုးစားနေဆဲဖြစ်ပြီး “ဝ” တပ်ဖွဲ့ – UWSA တာဝန်ရှိသူတွေထံ ဆက်သွယ်နေဆဲဖြစ်ပါတယ်။
ရှမ်းပြည်အရှေ့ပိုင်း မိုင်းတုံမြို့နယ်နဲ့ ထိုင်းနိုင်ငံ မယ်ဟောင်ဆောင်ခရိုင်နယ်စပ်က “ဝ”တပ်ဖွဲ့ အခြေစိုက်ထားတဲ့ တပ်စခန်း ၉ နေရာနဲ့ပတ်သက်လို့ ပြန်လည်ဆုတ်ခွာပေးဖို့ ထိုင်းဘုရင့်တပ်ဘက်က တောင်းဆိုနေတာဖြစ်ပါတယ်။
အဲဒီဒေသဘက်ကို ဒီဇင်ဘာလ ၁၀ ရက်က မြန်မာစစ်တပ် တြိဂံဒေသတိုင်းစစ်ဌာနချုပ်တိုင်းမှူး ဗိုလ်ချုပ်စိုးလှိုင်သွားရောက်ခဲ့ပြီး ၅ ရက်အကြာမှာ အခုလိုသတင်းတွေ ထွက်ပေါ်လာတာပါ။
“ဝ” တပ်နဲ့ ထိုင်းတပ်ကြား ပြီးခဲ့တဲ့ နိုဝင်ဘာ ၂၅ က ထိုင်း -မြန်မာနယ်စပ်၊ မယ်ဟောင်ဆွန် ခရိုင်အတွင်းရှိတဲ့ နယ်စပ်မျဥ်းက UWSA ရဲ့ စစ်တပ်စခန်း ၇ ခုကို ဒီဇင်ဘာ ၁၈ ရက်နေ့ နောက်ဆုံးထားပြီး ဖယ်ပေးဖို့ ထိုင်းဘုရင့်တပ်က ထုတ်ပြန်ခဲ့တာဖြစ်ပါတယ်။
ထိုင်းနဲ့ “ဝ”တပ်ကြား စစ်ရေးတင်းမာမှု သတင်းတွေအပေါ် စစ်ရေးသတင်းတွေကို ဖန်တီးရေးသားကြတာနဲ့ပတ်သက်လို့ “ဝ” တပ်ဖွဲ့ – UWSA က ငြိမ်းချမ်းရေးသည်သာ အဓိကဖြစ်တာကြောင့် စစ်အပေါ် ပြင်းပြင်းထန်ထန် ရှုတ်ချတယ်လို့ ဒီဇင်ဘာ ၈ ရက်က စာထုတ်ပြန်ခဲ့ပါတယ်။
အငြင်းပွားနေတဲ့ စစ်စခန်းကုန်းတွေဟာ မြန်မာနိုင်ငံနယ်စပ်နားမှာ တည်ရှိတဲ့ RCSS ဌာနချုပ် လွယ်တိုင်းလျန်းနဲ့ ၁၀ ကီလိုမီတာအကွာမှာတည်ရှိတယ်လို့ မြေပြင်သတင်းအရ သိရပြီး ထိုင်းနိုင်ငံ၊ မယ်ဟောင်ဆောင်ဒေသ ပန်မဖနယ်ထဲကို မီတာ ၃၀၀ ခန့် ရောက်နေတာလို့ ထိုင်းသတင်းတွေက ပြောနေပါတယ်။
“ဝ” ဘက်ကတော့ မိုင်းပန်မြို့နယ်၊ ဟိုမိန်းမြို့၊ လွယ်ဝိုးမှာ ရှိနေတာလို့ ဆိုပါတယ်။ လွယ်ဝိုးဟာ မိုင်းတုံမြို့နယ်၊ မုံးထမြို့နဲ့ နီးကပ်စွာတည်ရှိနေတာ ဖြစ်ပါတယ်။
မိုင်းတုံမြို့နယ်ထဲက ခိုင်းလုံဟာ မုံးထရဲ့အနောက်ဖက်၊ လွယ်တိုင်းလျန်း RCSS ဌာနချုပ်ရဲ့ အရှေ့ဖက်မှာရှိပြီး အိမ်ခြေ ၁၀၀၀ ခန့်ရှိတဲ့ မြို့တည်ထားကာ တပ်မဟာ ၇၇၈ နယ်မြေဖြစ်ကြောင်း သိရပါတယ်။
MK – 004
#MeKongNews
#ထိုင်းနယ်စပ်
#ဝတပ်ဖွဲ့
#UWSA
#တပ်စခန်း
#အငြင်းပွား
