မဲခေါင်၊ ဒီဇင်ဘာ ၁၅
ရှမ်းပြည်တောင်ပိုင်း၊ တောင်ကြီးမြို့နယ်မှာ အခုလ(ဒီဇင်ဘာ) တတိယပါတ်အတွင်း စစ်ကောင်စီက ဧည့်စာရင်းဝင်စစ်ပြီး လူငယ်နဲ့ လူလတ်ပိုင်းတွေကို ပေါ်တာဆွဲဖမ်းဆီးဖို့စီစဉ်နေကြောင်း ရပ်ကွက်အုပ်ချုပ်ရေး အဖွဲ့ဝင်တွေထံကနေ သတင်းပေါက်ကြားလာတာကို ဒေသခံတွေက ပြောပါတယ်။
တောင်ကြီးမြို့နဲ့ အေးသာယာမှာ နေထိုင်တဲ့ အိမ်ငှားတွေကို ဧည့်စာရင်းအကြောင်းပြ ဝင်ရောက်စစ်ဆေးကာ ဧည့်စာရင်းမတိုင်သူကို ဖမ်းဆီးကာ စစ်မှုထမ်းအတွက်အသုံးပြုမှာဖြစ်တယ်လို့ သတင်းအရင်းအမြစ်က ပြောပါတယ်။
ဧည့်စာရင်းမတိုင်တဲ့ လူငယ်အချို့ကို ယာယီရှောင်ခိုင်းတာမျိုးရှိသလို ဧည့်စာရင်း အမြန်ဆုံးလာတိုင်ဖို့ ရပ်ကျေးအဖွဲ့ဝင်တွေက သူတို့နဲ့နီးစပ်သူတွေကို သတိပေးနေတာဖြစ်ပြီး အိမ်ငှား၊ အဆောင်ငှားကာ တောင်ကြီးမှာ အလုပ်လာလုပ်နေကြသူတွေကို အဓိကထား စစ်ဆေးမှာဖြစ်တယ်လို့ ဒေသခံတစ်ဦးက မဲခေါင်သတင်းဌာနကို ပြောပါတယ်။
“ဒီနေ့ပဲ သတိလာပေးသွားတယ်၊ ခဏရှောင်နေဖို့ပေါ့၊ အကုန်လုံးကို လိုက်သတိပေးနေတာမျိုးတော့ မဟုတ်ဘူး။ နီးစပ်ရာကို သတိပေးလာတာ၊ တချို့ကလည်း ရှောင်ကုန်ကြပြီ” လို့ ဒေသခံတစ်ဦးက မဲခေါင်သတင်းဌာနကို ပြောပါတယ်။
တောင်ကြီးနဲ့ အေးသာယာမှာ အိမ်ငှား၊ အဆောင်ငှားပြီး နေထိုင်သူတွေ အိမ်ရှင်အိမ်ငှားစာချုပ်ရှိပါက ဧည့်စာရင်းတစ်ကြိမ်ကို သက်တမ်း တစ်လ၊ အိမ်ငှားစာချုပ် မရှိသူတွေကို သက်တမ်း ခုနှစ်ရက်သာ ခွင့်ပြုထားတာကြောင့် အပါတ်စဉ် ပုံမှန်ဧည့်စာရင်းမတိုင်ဖြစ်သူ အများအပြားရှိနေတယ်လို့ အိမ်ငှားနေထိုင်သူတွေထံက နေသိရပါတယ်။
“အိမ်က လပေးနဲ့ ငှားနေတာ၊ အလုပ်က ခရီးထွက်ရတော့ အပါတ်တိုင်း ဧည့်စာရင်းတိုင်ဖို့ အဆင်မပြေကြတာ အများကြီးပဲ၊ အုပ်ကြီးက သတိပေးလာတာနဲ့ ကျနော်လည်း ခဏရှောင်လာလိုက်တယ်” လို့ တောင်ကြီးမှာ အိမ်ငှားနေထိုင်သူတစ်ဦးက မဲခေါင်သတင်းဌာနကို ပြောပါတယ်။
အတည်မပြုနိုင်သေးတဲ့သတင်းကတော့ မနေ့က( ဒီဇင်ဘာလ ၁၄) ညပိုင်းအချိန်က တောင်ကြီးမြို့၊ ကံကြီးရပ်ကွက်ကို မီးဖြတ်ကာ ဧည့်စာရင်း ဝင်ရောက်စစ်ဆေးပြီး လူငယ်နဲ့ လူလတ်ပိုင်းအရွယ် အမျိုးသား ၄၀ ခန့်ကို ဖမ်းဆီးသွားတယ်လို့ သတင်းထွက်ပေါ်နေတာပါ။ ဒါကို မဲခေါင်သတင်းဌာနအနေနဲ့ သီးခြားအတည်ပြုနိုင်ဖို့ ကြိုးစားနေဆဲ ဖြစ်ပါတယ်။
တောင်ကြီးမြို့မှာ အရင်က ဧည့်စာရင်းဝင်ရောက်စစ်ဆေးတဲ့အခါ ဧည့်စာရင်းတိုင်မထားသူကို ဒဏ်ကြေးအဖြစ် ငွေတောင်းယူတာမျိုး ရှိခဲ့ပေမယ့် ဧည့်စာရင်းစစ်ပြီးပေါ်တာဆွဲဖမ်းဆီးတာမျိုး မရှိသလို အခုလိုဧည့်စာရင်းစစ်မယ်ဆိုတာကို ကြိုသိတာမျိုးလည်း မရှိသေးပါဘူး။
ဒေသတချို့မှာတော့ ဧည့်စာရင်းဝင်စစ်တဲ့အခါ ဧည့်စာရင်းတိုင်ထားပေမယ့်လည်း လူငယ်ပိုင်းတွေကို ပေါ်တာဆွဲဖမ်းဆီးကာ ငွေနဲ့ပြန်ရွေးခိုင်းတာမျိုးတွေ ရှိနေပါတယ်။
CJ-003
#MekongNews
#တောင်ကြီး
#ဧည့်စာရင်း
#စစ်မှုထမ်း
#ပေါ်တာ
#စစ်ဆေး
