မဲခေါင်၊ ဒီဇင်ဘာ ၁၂
ရှမ်းပြည်တောင်ပိုင်း၊ ဖယ်ခုံမြို့ အရှေ့ခြမ်းကျေးရွာတွေဘက်ကို စစ်ကောင်စီက နယ်မြေရှင်းလင်းမယ်ဆိုတဲ့ သတင်းတွေကြောင့်ဒေသခံတွေနဲ့ စစ်ရှောင်ပြည်သူတွေ သတိထားပြီးရှောင်ရှားကြဖို့ စောင့်ကြည့်နေသူတွေက အသိပေးလှုံ့ဆော်နေပါတယ်။
နယ်မြေရှင်းလင်းရေးမှာ လက်နက်ကြီးနဲ့ပစ်တာ လေကြောင်းနဲ့ဗုံးကြဲတာတွေ ရှိလာနိုင်တာမို့ သတိပြုကြဖို့ နှိူးဆော်နေတာဖြစ်ပြီး ဒေသခံတွေနဲ့ အဲဒီဒေသမှာစစ်ရှောင်နေကြတဲ့ ပြည်သူတွေ စိုးရိမ်နေကြပါတယ်။
“စစ်ကြောင်းထိုးဖို့ရှိတယ်လို့ ပြောတယ်၊ လက်တလော အရှေ့ဘက်ကမ်းမှာတော့ ငြိမ်နေပါတယ်၊ အခြေအနေစောင့်ကြည့်နေကြတဲ့ သဘောပေါ့၊ စိုးရိမ်မှုတွေတော့ ရှိကြတယ်၊ ကျွန်မတို့က မိုးဗြဲမြို့ဘက်ကနေ ဖယ်ခုံအရှေ့ဘက်ကမ်းမှာ စစ်လာရှောင်နေကြတာ၊ ခုက ဆွေ မျိုးတွေ ရှိလို့လာရှောင်ရတာ၊ ထပ်ပြေးရရင်တော့ ဆွေမျိုးမရှိနဲ့ ဘယ်ထပ်ပြေးရမလဲမသိ” လို့ စစ်ရှောင်ပြည်သူတစ်ဦးက ပြောပါတယ်။
ပြီးခဲ့တဲ့ ၂၀၂၃ ခုနှစ် ၁၁၁၁ စစ်ဆင်ရေးအတွင်း ကရင်နီ ကာကွယ်ရေးပူးပေါင်းတပ်တွေက ဖယ်ခုံမြို့ အ၀င်အထွက်တွေကို ထိန်းချုပ်ထားနိုင်ခဲ့ပေမဲ့ ၂၀၂၄ ခုနှစ် ဇွန်လအတွင်းမှာတော့ ဖယ်ခုံမြို့ပေါ်ရပ်ကွက်တွေကို စစ်ကောင်စီက ပြန်လည်ထိန်းချုပ်ထားခဲ့ပါတယ်။
အခုလိုတိုက်ပွဲဖြစ်ပွားခဲ့ပြီးတဲ့ ဖယ်ခုံမြို့အတွင်းနဲ့ မိုးဗြဲအရှေ့ဘက်ခြမ်းကဒေသခံ တစ်သိန်းကျော်ခန့်ဟာ ဖယ်ခုံအရှေ့ဘက်ခြမ်းရွာတွေနဲ့ အနောက်ဘက်ခြမ်း ကျေးရွာတွေမှာ လက်ရှိအချိန်ထိစစ်ဘေးရှောင်နေကြရပြီး ကုန်ဈေးနှုန်းကြီးမြင့်မားမှု၊ စားသောက်ကုန်ရှားပါးမှုတွေကြောင့် အခက်အခဲတွေနဲ့ ရင်ဆိုင်နေကြရပါတယ်။
“ကျွန်မတို့သူငယ်ချင်း အနောက်တောင်ဘက်ကလူတွေကတော့ လက်နက်ကြီးထုသံတွေ ကြားတယ်၊ တဒုန်းဒုန်းနဲ့၊ ဒီဘက်ရော အခြေအနေဘယ်လိုလဲလို့ မေးတယ်၊ လိုင်းပေါ်မှာတော့ သတင်းတွေ့တယ်၊ စစ်ကြောင်းထိုးဖို့ရှိတယ်လို့လည်း ပြောတယ်၊ ဒါပေမဲ့ ဒီဘက်ကမ်းတော့ ငြိမ်တော့ ငြိမ်နေတယ်၊ လက်နက်ကြီးထုသံလည်း မကြားဘူး၊ သွားလာနေကြသေးတယ်” လို့ ဖယ်ခုံမြို့ ဒေသခံတစ်ဦးက ပြောပါတယ်။
စစ်ကောင်စီနဲ့ ပအိုဝ်းပြည်သူ့စစ် (PNO)ပူးပေါင်းအဖွဲ့တွေက ဖယ်ခုံမြို့နဲ့ ဆယ်မိုင်အကွာရှိတဲ့ မိုးဗြဲကိုဆက်လက်ထိုးစစ်ဆင်းနေပြီး ကရင်နီကာကွယ်ရေးပူးပေါင်းအဖွဲ့တွေနဲ့ မကြာခဏ တိုက်ပွဲဖြစ်ပွားလျက်ရှိနေတာပါ။ နို၀င်ဘာလအတွင်း စစ်ကောင်စီရဲ့ လေကြောင်းနဲ့ ဒရုန်းတိုက်ခိုက်မှုတွေ၊ လက်နက်ကြီးပစ်ခက်တွေတာကြောင့် ကလေးငယ်တစ်ဦး အပါအ၀င် အရပ်သား ခြောက်ဦး သေဆုံးပြီး ငါးဦး ထိခိုက်ဒဏ်ရာရခဲ့တယ်လို့ ကရင်နီအမျိုးသားများ ကာကွယ်ရေးတပ် (KNDF) က ပြောပါတယ်။
CJ-017
#MekongNews
#ရှမ်းပြည်တောင်ပိုင်း
#ဖယ်ခုံအရှေ့
#စစ်ကောင်စီ
#နယ်မြေရှင်း
#ဒေသခံ
