မဲခေါင်၊ ဒီဇင်ဘာ ၁၁
ထိုင်း-မြန်မာ နယ်စပ်မျဉ်းမှာ အထိုင်ချထားတဲ့ UWSA “ဝ”တပ်စခန်းတွေ ဒီဇင်ဘာ ၁၈ ရက်နောက်ဆုံးထားပြီး ပြန်လည်ဆုတ်ခွါပေးဖို့ ထိုင်းအာဏာပိုင်တွေက သတိပေးထားပြီးနောက် ထိုင်းဘုရင့်တပ်မတော်နဲ့ “ဝ”တပ်ဖွဲ့ အလွတ်တမ်းတွေ့ဆုံဆွေးနွေးမှုတွေ လုပ်ဆောင်ခဲ့တယ်လို့ မဲခေါင်သတင်းဌာနက စုံစမ်းသိရပါတယ်။
ထိုင်းဘုရင့်တပ်မတော်က ဗိုလ်ချုပ်ကြီးအဆင့်ရှိတဲ့သူနဲ့ UWSA “ဝ” တပ်ဖွဲ့က အရာရှိအချို့ တာချီလိတ်မှာ ဒီဇင်ဘာ ၇ ရက် ညပိုင်းနဲ့ ချင်းမိုင်းမြို့တွေမှာ အလွတ်တမ်းတွေ့ဆုံညှိနှိုင်းတာတွေ ရှိခဲ့ပေမယ့် တပ်စခန်းပြန်ဆုတ်ရေးဟာ ရေရာတဲ့ အဖြေမထွက်ရှိသေးဘူးလို့ ဒေသတွင်း အခြေအနေတွေနဲ့ နီးစပ်သူတစ်ဦးက ပြောပါတယ်။
UWSA “ဝ” တပ်ဖွဲ့က တပ်စခန်းပြန်လည်ဆုတ်ပေးရေးဟာ နှစ်နိုင်ငံအဆင့်အခြေနေတွေမို့ အာဏာသိမ်းစစ်ကောင်စီနဲ့ ထိုင်းအာဏာပိုင်တွေ ညှိနှိုင်းဖို့သာ ပြောထားဖူးပါတယ်။
“ထိုင်းဘုရင့်တပ်မတော်က ဗိုလ်ချုပ်ကြီးအဆင့်ရှိသူက “ဝ” ဘက်ကို ထပ်ပြီးလာညှိတယ်၊ ဒါပေမယ့် အခြေအနေက မပြောင်းလဲဘူး၊ ထိုင်းဘက်ကတော့ နယ်စပ်မျဉ်းတွေနားမှာ တပ်အင်အားတွေကော တင့်ကားတွေကော ချထားတယ်ကြားတယ်၊ ဘယ်လိုဆက်ဖြစ်မလဲ မသိဘူး၊ အခုဆိုအချိန်သိပ်မကျန်ဘူး ဒေသခံတွေက တိုက်ပွဲတွေဖြစ်မှာ စိုးရိမ်နေကြတယ်” လို့ ဒေသတွင်းအခြေအနေတွေနဲ့ နီးစပ်သူ အမည်မဖေါ်လိုသူတစ်ဦးက ပြောပါတယ်။
ရှမ်းအရှေ့အခြေစိုက် တြိဂံတိုင်းစစ်ဌာနချုပ် တိုင်းမှူးလည်း ဒီဇင်ဘာ ၁၀ ရက်က ကျိုင်းတုံကနေ တာချီလိတ်ကို ဖြတ်ပြီး မိုင်းဆတ်မြို့ကိုသွားရောက်ခဲ့တဲ့အပြင် “ဝ” တောင်ပိုင်း စစ်ဒေသ ၁၇၁ အတွင်းက မိုင်းတုံနဲ့ နားကောင်းမှုမြို့တွေမှာ UWSA ဘက်က တာဝန်ရှိသူတွေနဲ့ တွေ့ဆုံကာ ထိုင်းနိုင်ငံနဲ့ နယ်နိမိတ်အရေး ဖြစ်ပေါ်နေတဲ့ “ဝ”တပ်စခန်းကိစ္စတွေကို ဆွေးနွေးခဲ့ပြီး ဒီနေ့(ဒီဇင်ဘာ ၁၁)မှာ UWSA “ဝ” တပ်ဖွဲ့ထိန်းချုပ်နယ်မြေနဲ့ RCSS ရှမ်းတပ်ဖွဲ့ထိန်းချုပ်နယ်မြေ ထိစပ်နေတဲ့ မုံးထုံနဲ့ မုံးထမြို့နယ်တွေကို ဆက်လက်ပြီး ထွက်ခွာသွားတယ်လို့ ဒေသခံတွေဆီက သိရပါတယ်။
ထိုင်းနိုင်ငံဘက်က တချို့စစ်ဗိုလ်ချုပ်တွေအနေနဲ့ “ဝ”တပ်ဖွဲ့ကို တိုက်ဖို့လိုလားနေကြပေမယ့် တချို့စစ်ဗိုလ်ချုပ်တွေက ငြိမ်းချမ်းရေးအတွက် ဆွေးနွေးဆောင်ရွက်ဖို့ လိုလားသူ နှစ်ဖွဲ့ကွဲနေပြီး ထိုင်းဘုရင်ကိုယ်တိုင် တပ်စခန်းတွေကိုတိုက်ခိုက်ကာ ပြန်လည်ရယူဖို့ ညွှန်ကြားထားတာတွေလည်း ရှိတယ်လို့ အတည်မပြုနိုင်တဲ့သတင်းတွေ ထွက်ပေါ်နေပါတယ်။
“ဝ” တပ်ဖွဲ့ စခန်းတည်ဆောက်ထားတဲ့ နေရာတွေကို ထိုင်းအာဏာပိုင်တွေက သက်ဆိုင်ရာ နယ်ခြားကော်မတီ(TBC)နဲ့ ဒေသဆိုင်ရာကော်မတီ(RBC) အစည်းအဝေးတိုင်းမှာ ၂၀၀၀ ပြည့် နှစ်အလွန်ကတည်းက တင်ပြဆွေးနွေးပြီး တောင်းဆိုခဲ့တာ ဖြစ်ပါတယ်။
နယ်စပ်မျဉ်းပေါ် “ဝ”တပ်ဖွဲ့ စခန်းချထားတဲ့ နေရာတွေက မိုင်းတုံခရိုင်နဲ့ ထိုင်းနိုင်ငံ မယ်ဟောင်ဆောင်ခရိုင်တွေအတွင်းဖြစ်ပြီး UWSA စစ်ဒေသ ၁၇၁ ဧရိယာအတွင်းက တပ်စခန်းပေါင်း ကိုးခု ဖြစ်တယ်လို့ သိရပါတယ်။
MK – 002
#MekongNews
#ထိုင်းတပ်
#ဝတပ်
#နယ်စပ်မျဉ်း
#တွေ့ဆုံ
#မပြောင်းလဲ
