မဲခေါင်၊ ဒီဇင်ဘာ-၃
တရုတ်နိုင်ငံရဲ့ ပြောင်းဆံဝယ်လိုအားဟာ ရှမ်းပြည်အတွင်းကိုဦးတည်လာတာကြောင့် နယ်စပ်ကုန်သွယ်ရေးပြန်လည်စတင်နိုင်ချေရှိပြီး ပြောင်းစျေးအတက်ဘက်မှာရှိနေတယ်လို့ ပြောင်းကုန်သည်တွေကပြောကြပါတယ်။
မြန်မာပြည်က စိုက်ပျိုးတဲ့ပြောင်းမျိုးတွေက မျိုးရိုးဗီဇ မပြုပြင်ထားတဲ့ NonGMO မျိုးတွေ ဖြစ်နေလို့ တိရစ္ဆာန်အစာစပ် စက်ရုံတိုင်းလက်ခံလိုချင်ကြပါတယ်၊ တရုတ်ရဲ့ ပြောင်းဆံလိုအပ်ချက်ဟာ တန်ချိန်ပေါင်း ၂၆ သန်းကျော်အထိရှိနေပေမယ့် မြန်မာတစ်နိုင်ငံလုံး ပြောင်း ထွက်အားဟာ တန်ချိန်ပေါင်း ငါး သန်းမပြည့်တာကြောင့် တရုတ်ဝယ်လိုအားကိုပြည့်မှီအောင်မဖြည့်နိုင်ပါဘူး၊
တရုတ်နိုင်ငံက နိုင်ငံပိုင်စီးပွားရေးအဖွဲ့အစည်းတစ်ခုဖြစ်တဲ့ Eastwind International Trade Co..Ltd Non-GMO Corn ကမြန်မာပြောင်းဆံကို ဝယ်ယူလိုကြောင်း အကြောင်းကြားလာလို့ စစ်ကောင်စီရဲ့ စီးပွားရေးနဲ့ကူးသန်းရောင်းဝယ်ရေးဝန်ကြီးဌာနကနေ ရှမ်းပြည်နယ်ကတင်ပို့လိုသူတွေ UMFCCI နဲ့ ဆက်သွယ်လုပ်ဆောင်ဖို့စာထုတ်လာတာဖြစ်ပါတယ်။
တရုတ်နိုင်ငံရဲ့ကုန်းတွင်းပိတ် ယူနန်ဒေသဟာ နစ်စဉ်ပြောင်းဆံလိုအပ်ချက် ရှိနေပြီး ယူနန်ကို တရုတ် ကမ်းစပ်ကနေ ပြောင်းဆံ သယ်ယူရင် မိုင် ၂၀၀၀ ကျော် သယ်ယူရလို့ သယ်ယူခ စားရိတ်ကြီးတာကြောင့် မြန်မာနယ်စပ်ဂိတ်တွေဖြစ်တဲ့ မှုဆယ် ၊ နမ့်ခမ်း ၊ ကျင်စန်းကြော့ နဲ့ ချင်းရွှေဟော်လမ်းကြောင်း တွေက မိုင် ၃၀၀ လောက်နဲ့ ယူနန်နယ်ထဲ စရိတ်သက်သာစွာ သယ်ယူရတာကိုသာ ယူနန်ဒေသခံတွေက ဆန္ဒရှိနေကြတာလို့ ပြောင်းစိုက်အသင်းဝင်တစ်ဦးက မဲခေါင်ကိုပြောပါတယ်။
လက်ရှိတရုတ်ပြည်တွင်း ပြောင်းဆံ ဈေးနှုန်းမှာ ၅၀ kg ( ပိဿာ ၃၀.၆၂၃ ) ကို တရုတ် ယွမ်ငွေ ၁၃၅ ယွမ် မှ ၁၄၅ ယွမ် အထိတရုတ်အစာစပ် စက်ရုံအရောက်ဈေး ဖြစ်နေတယ်လို့ပြောပါတယ်။
တရုတ်ရဲ့ ပြောင်းလိုအပ်ချက်က တစ်နှစ်ထက်တစ်နှစ် ပိုကြီးမားလာကာ ထိုင်းတိုက်ရိုက် ၊ ထိုင်း မှ တစ်ဆင့် လာအို ၊ လာအိုကတရုတ် စတဲ့ကုန်းတွင်းလမ်းတွေကနေ စီစဉ်နေပေမယ့် လိုအပ်ချက် ကိုပြည့်မှီနေခြင်းမရှိပါဘူး၊ အာဆီယံနိုင်ငံတွေ အနက် မြန်မာ ဟာလမ်းကြောအတိုဆုံးနဲ့ ဖြေလျှော့မှု့အနည်းဆုံးဖြစ်တာကြောင့် ရှေးယခင် နစ်ပေါင်း ၄၀ ကျော်ကပင်ရှမ်းပြည်မြောက်ပိုင်းလမ်းကြောင်း ကုန်သွယ်မှုဟာ အဓိကဖြစ်ခဲ့ပြီး ဧရာ၀တီပြောင်း ဆံတွေကိုတောင်ရှမ်းပြည်ကနေ တရုတ်ကိုရောင်းချခဲ့ရတာလို့ ရှင်းပြပါတယ်။
“ဒီနှစ်က ကျနော်တို့ဒေသ မှာကိုပဲ ပြောင်းစိုက်ဧက သုံးချိုး နှစ်ချိုးလောက်လျော့တယ်၊ တိုက်ပွဲတွေ၊ မျိုးစေ့ စျေးနှုန်းမြင့်မားမှု၊ လုပ်သားစရိတ်၊ ယူရီးယားသွင်းအားစုတွေ စျေးနှုန်းမြင့်မားမှုတွေကြောင့်ရယ်ပေါ့.”လို့ ရှမ်းတောင်ပြောင်းကုန်သည်တစ်ဦးကပြောပါတယ်။
မနေ့က( ဒီဇင်ဘာ ၂) ရှမ်းတောင် အေးသာယာပြောင်းဆံ ဂိုထောင်ကတစ်ပိဿာ ၁၄၄၀ ကျပ်နဲ့ ဝယ်နေပြီး ရန်ကုန် ဒဂုံဆိပ်ကမ်းဂိုထောင်ချ စျေး ၁၆၁၀ကျပ်ရှိနေကာ အစိုဓာတ် ၁၅ဒသမ၅ အောက်နဲ့ (ပြောင်းအကောင်း ၉၀ရာခိုင်နှုန်း + မှို၊ အကျိုးအကြေနဲ့အခြားပစ္စည်း ၁၀ရာခိုင်နှုန်း) ကိုလက်ခံပြီး တွဲကားငါးစီးနဲ့အထက်ကို စျေးပိုပေးနေတယ်လို့သိရပါတယ်။
လက်ရှိ မြန်မာ-တရုတ် နယ်စပ်ကုန်သွယ်ရေးဂိတ်တွေကို တရုတ်ဘက်က ပိတ်ထားသလို မြန်မာဘက်က ပိတ်ထားပေမယ့် ဒီဇင်ဘာ ၁ရက်မှာ မူဆယ်ဆင်ဖြူပေါက်ကစားသောက်ကုန်တွေ ဖွင့်ပေးခဲ့ပြီး MNDAAထိန်းချုပ်ထားတဲ့ ကျင်စန်းကျော့ဂိတ်ကို နိုဝင်ဘာ ၂၈ ရက်က ပြောင်းသယ်ဖို့အဓိက ဖွင့်ထားခဲ့ပြီးဖြစ်ပါတယ်။
MK 012
#MekongNews
#တရုတ်
#ဝယ်လိုအား
#မြန်မာ
#ပြောင်ဆံ
#ရှမ်းပြည်
