မဲခေါင်၊ နိုဝင်ဘာ ၂၄
ရှမ်းပြည်အရှေ့ပိုင်း ကိုလာမယ့် ဒေသခံမဟုတ်တဲ့ခရီးသွားတွေအနေနဲ့ တောင်ကြီး – မိုင်းတုံကားလမ်းကလာရင် မိုင်းတုံအခြေချစစ်ဗျူဟာရဲ့ ခွင့်ပြုချက်ရမှသာ ဖြတ်သန်းခွင့်ရတယ်လို့ ခရီးသွားတွေနဲ့ ယာဉ်မောင်းတွေထံက သိရပါတယ်။
ရှမ်းပြည်အရှေ့ပိုင်းကိုလာသူတွေထဲ ကိုးကန့်၊ ပလောင်နဲ့ ရခိုင်လူမျိုးတွေအပြင် ရှမ်းပြည်မြောက်ပိုင်းက လာသူတွေပါ အခုလို ခွင့်ပြုချက်ယူနေရတာလို့ ကိုယ်တိုင်ကြုံခဲ့ရတဲ့ မြန်မာပြည်မကနေ မိုင်းဆတ်ကိုလာတဲ့ခရီးသည်တစ်ဦးက မဲခေါင်သတင်းဌာနကို ပြောပါတယ်။
“ကားစကတည်းက မိုင်းတုံဗျူဟာခွင့်ပြုဖို့လိုတယ်လို့ ဂိတ်ကပြောတယ်။ သံလွင်မြစ်ဂိတ်မှာ အကြာကြီး၊ မိုင်းတုံကဘယ်သူ့ သိသလဲ ဘာညာစုံနေတာပဲ၊ အဲဒီမှာ တစ်ည အိပ်လိုက်ရတယ်။ မနက်ကျမှ ရပြီဆိုပြီးလာရတာ။ ဒါတောင် ကားသမားကို ရောက်တာ သတင်းပို့ခိုင်းသေးတယ်၊ ပြီးမှ ဆက်သွားခွင့်ရတာ။ အတူလာတဲ့ကားတစ်စီးက လာတဲ့သူတွေတော့ ခွင့်ပြုချက်မရသေးလို့ ကျန်နေခဲ့တယ်”လို့ သူက ပြောပါတယ်။
ရှမ်းပြည်အရှေ့ပိုင်းမြို့တွေဖြစ်တဲ့ မိုင်းတုံ၊ မိုင်းဆတ်၊ တာချီလိတ်မြို့တွေမှာ နေထိုင်သူတွေကတော့ ဂိတ်တွေမှာ အဆင်ပြေတာကြောင့် ကားခပုံမှန်သာကောက်ခံပေမယ့် တခြားဒေသမှာနေပြီး စစ်ဆေးရေးဂိတ်မှာညှိနှိုင်းဖို့ လိုသူတွေအတွက်တော့ ကားခပိုကောက်ခံရတယ်လို့ မိုင်းဆက်-တောင်ကြီး ယာဉ်မောင်းတစ်ဦးက ပြောပါတယ်။ ပြသနာတက်နိုင်တဲ့ ခရီးသည်မျိုးဆိုရင်တော့ လုံးဝ မတင်ရတာလည်းရှိတယ်လို့ သူက ပြောပါတယ်။
“လပိုင်းလောက်တော့ကြာပြီ (ခွင့်ပြုချက်လိုတာ)။ ဂိတ်တင်ကတဲက တစ်ခါထဲ မေးထားရှင်းထားရတယ်။ ထားခဲ့လို့လည်း မရ၊ ပြန်ခေါက်ရလည်း အဆင်မပြေနိုင်တဲ့သူမျိုး လုံးဝမတင်ပေးပါနဲ့လို့ ပြောထားရတယ်။ သူတို့မသင်္ကာရင် ညှိတဲ့ကိုယ်ပါ ဆွဲခံရရင်မချောင်ဘူး” လို့ အဲဒီယာဉ်မောင်းက ပြောပါတယ်။
တောင်ကြီး-မိုင်းတုံ-မိုင်းဆက် လမ်းကြောင်းပေါ်မှာရှိတဲ့ သံလွင်တံတား တာဆန်းအနီးမှာထိုင်တဲ့ ခလရ ၂၉၄ ဂိတ်ကစပြီး တာဆန်းစုပေါင်းဂိတ်၊ တံတားထိပ် အဝင်အထွက်၊ တံတားအစောင့်ကျတပ်ဂိတ်တွေနဲ့ ရဲဂိတ်တွေမှာ မသင်္ကာရင် ကားနဲ့အတူ ခရီးသည်ကို ဓာတ်ပုံရိုက်ယူထားတယ်လို့ အဲဒီလမ်းကြောင်းမှာ သွားလာနေသူတွေက ပြောပါတယ်။
တောင်ကြီးကနေ ရှမ်းပြည်အရှေ့ပိုင်းမြို့တွေကို လာရင် ၃၈၃ မိုင်ရှိတဲ့ တောင်ကြီး- ကျိုင်းတုံ-တာချီလိတ်လမ်းကြောင်းနဲ့ ၃၂၄ မိုင်ရှိတဲ့ တောင်ကြီး- မိုင်းတုံ-မိုင်းဆတ်-တာချီလိတ်ဆိုပြီး လမ်းကြောင်း ၂ ကြောင်းရှိပြီး ရှမ်းပြည်တောင်ပိုင်း၊ နမ့်စန်မြို့မှာ လမ်းခွဲတာ ဖြစ်ပါတယ်။
အဲဒီလမ်းကြောင်းတွေအနက် တောင်ကြီး- ကျိုင်းတုံ-တာချီလိတ်လမ်းကြောင်းက လာသူတွေအတွက် ရှမ်းပြည်အရှေ့ပိုင်းအဝင်ဖြစ်တဲ့ တာကော်တံတားမှာ စစ်တပ်ခွင့်ပြုချက် မလိုဘူးပေမယ့် တောင်ကြီး- မိုင်းတုံ-မိုင်းဆတ် လမ်းကြောင်းမှာတော့ တာဆန်းတံတားမှာ အခုလို မိုင်းတုံစစ်ဗျူဟာရဲ့ ခွင့်ပြုချက်လိုအပ်နေတာဖြစ်လို့ ခရီးသည်တွေ အခက်အခဲဖြစ်နေတယ်လို့ ခရီးသွားလာသူတွေက ပြောပါတယ်။
“မိုင်းဆတ်မှာနေတာ၊ ကိုင်ထားတာက ၅/ (စစ်ကိုင်းတိုင်းမှတ်ပုံတင်) ဆိုတော့ ခဏခဏ စစ်ခံမေးခံနေရတာ။ တောင်ကြီးအထွက် ဂိတ်တွေထဲက အမေးခံနေရတာ၊ နေထိုင်ကြောင်း ထောက်ခံချက်တွေကိုတောင် သေချာစစ်တယ်။ နေတာဘယ်လောက်ကြာပြီလဲကစ မေးလို့ ခုအိမ်သားတွေ ခရီးသွားရင် အိမ်ထောင်စုဇယားမိတ္တူပါ ယူသွားကြတယ်”လို့ မိုင်းဆတ်မြို့မှာ အခြေချနေသူတစ်ဦးက ပြောပါတယ်။
ရှမ်းပြည်အရှေ့ပိုင်းဒေသတွေကို လာရောက်တဲ့လမ်းမှာ ဘာကြောင့် အခုလိုစစ်ဆေးတယ်ဆိုတာကို ဒေသခံတွေအနေနဲ့ သေချာစွာ မသိရပါဘူး။ ရှမ်းအရှေ့ဟာ တိုင်းရင်းသားတော်လှန်ရေးတပ်ဖွဲ့တွေဖြစ်တဲ့ ‘ဝ’ တောင်ပိုင်း UWSA စစ်ဒေသ ၁၇၁၊ NDAA မိုင်းလားနဲ့ RCSS စစ်စခန်းနဲ့ လှုပ်ရှားနယ်မြေတွေရှိပြီး ထိုင်းနယ်စပ်မြို့တွေနဲ့ နီးစပ်ထိကပ်နေတဲ့ ပထဝီဝင်အနေအထားရှိတဲ့ ဒေသဖြစ်ပါတယ်။
ပုံအညွှန်း – တာဆန်းဂိတ်ပုံဟောင်း
MK – 012
#MeKongNews
#မိုင်းတုံ
#မိုင်းဆတ်
#တာဆန်းဂိတ်
#မိုင်းတုံအခြေချစစ်ဗျူဟာ
