မိုင်းတုံဘက်မှာ စစ်မှုထမ်းဖို့ အဓမ္မဆွဲခံနေရ၊
လူစားထိုးဖို့ ကျပ်သိန်း ၈၀ ထိ ပေါက်ဈေးရှိ
မဲခေါင်၊ နိုဝင်ဘာ၂၄
ရှမ်းပြည်အရှေ့ပိုင်း၊ မိုင်းတုံမြို့နယ်က ထိုင်း-မြန်မာနယ်စပ် ပုံပါကျင်မြို့မှာ လယ်ယာစိုက်ပျိုးရေး လုပ်ငန်းခွင်က ပြန်လာတဲ့ ဒေသခံတွေကိုစစ်မှုထမ်းဖို့ အဓမ္မဆွဲခံနေကြရပြီး လူစားထိုးရင် ကျပ်သိန်း ၈၀ အထိ ပေါက်ဈေးရှိနေတယ်လို့ ဒေသခံတွေကပြောပါတယ်။
မနေ့က(နိုဝင်ဘာ ၂၃) ညနေပိုင်းမှာ ကြက်သွန်ဖြူစိုက်ဖို့ လယ်ပြင်ရာက ပြန်လာတဲ့မိသားစုထဲမှ လူငယ်တစ်ဦးကို စစ်မှုထမ်းဖို့ စစ်ကောင်စီက အဓမ္မဆွဲခေါ်သွားတယ်လို့ ပုံပါကျင်ဒေသခံတစ်ဦးက ပြောပါတယ်။
“ဘယ်လိုမှပြောမရ တောင်းပန်လို့မရဘူး၊ ရပ်ရွာလူကြီးကလည်း မတတ်နိုင်ဘူး၊ လူမရလို့ ဖမ်းတာတဲ့၊ သူတို့ကို ရွေးဖို့ သိန်းရာချီလည်း မတတ်နိုင်ဘူးကြဘူး၊ အခြားသူတွေလည်း ဆွဲခံရတာတွေရှိတယ်” လို့ ဒေသခံက မဲခေါင်ကို ပြောပါတယ်။
ပုံပါကျင် ရပ်ကွက် ၄ ရပ်ကွက်က စစ်မှုထမ်းအပတ်စဉ်တိုင်း အချိုးကျငွေထည့်ပြီး လူငှားထည့်လို့ရခဲ့ပေမယ့် ခုအပတ်စဉ်အတွက် လူရှာမရလို့ ပေါ်တာဆွဲနေတာလို့ မိုင်းတုံဒေသခံလူငယ်တစ်ဦးက ပြောပါတယ်။
“စာရင်းပါလို့ စစ်မှုထမ်းခေါ်စာ ရောက်လာတယ်၊ လူငှားထည့်ရင် သိန်း ၈၀ ရှိတယ်ပြောပေမယ့် လူစားမရရင် ကိုယ်တိုင်လိုက်ရမယ်ပြောတယ်။ အရင်က ထိုင်းထဲပြေးပြီးပြီ၊ ရှေ့ကခေါ်တာတွေမှာ မပါလို့ အေးဆေးပဲထင်တာ၊ ခု ဘာလုပ်ရမှန်း မသိတော့ဘူး” လို့ သူကပြောပါတယ်။
အဓမ္မလူစုခံရသူတွေကို ဖုန်းတွေကအစ သိမ်းဆည်းထားကာ မိသားစုအသိမိတ်ဆွေတွေနဲ့ ဆက်သွယ်ခွင့်မပေးဘဲ စစ်တပ်အချုပ်တွေမှာ တရားခံတွေလို ချုပ်ထားပြီး ကျိုင်းတုံစစ်လေ့ကျင့်ရေးတပ်ကို ပို့သွားမယ်လို့ စစ်တပ်နဲ့နီးစပ်တဲ့ သတင်းရင်းမြစ်တွေထံက သိရပါတယ်။
လက်ရှိမှာ မိုင်းတုံမြို့နယ်၊ နားကောင်းမူးက ခလရ(၆၅) မှာ ပုံပါကျင်ဘက်ကဖမ်းဆီးခံထားရသူတွေကို ချုပ်ထားပြီး မိုင်းတုံမှာတော့ တကရ (၆၀၀၃) တပ်နယ်မှာ လူစုနေတယ်လို့သိရပါတယ်။
ရပ်ကွက်အုပ်ချုပ်ရေးပိုင်းကတော့ စစ်မှုထမ်းအကျုံးဝင်သူတွေကို စာရင်းအရခေါ်သွားမှာဖြစ်ပြီး ရှောင်လွှဲပါက ဥပဒေအတိုင်း အရေးယူသွားမယ်လို့ လူထုကို ပြောဆိုနေကြောင်း သိရပါတယ်။
ရှမ်းပြည်၊ အရှေ့ပိုင်း ထိုင်းနယ်စပ် မြို့ပေါ်နဲ့ကျေးရွာတွေမှာ စစ်ကောင်စီက အဓမ္မလူသစ်စုနေလို့ လူငယ်တွေ မရှိသလောက်ဖြစ်နေပြီး စိုက်ပျိုးရေးကို အဓိကအားထားလုပ်ကိုင်စားသောက်နေရတဲ့ ဒေသခံတွေအတွက် မိသားစုတွေ တကွဲတပြားနဲ့စားဝတ်နေရေး အခက်တွေ့နေကြရတယ်လို့ ဒေသခံတွေက ပြောပါတယ်။
စစ်ကောင်စီတပ်ဟာ သေ၊ ပြေး၊ လက်နက်ချ၊ ဖမ်းခံ၊ ဒဏ်ရာရ စတဲ့ အကြောင်းအမျိုးမျိုးနဲ့ အင်အားလျော့လာတာကြောင့် ပြည်သူ့စစ်မှုထမ်း ဥပဒေကို ထုတ်ပြန်ပြီး ပြည်သူတွေကို အတင်းအဓမ္မ လူသစ်စုဆောင်းနေတာ ဖြစ်ပါတယ်။ စစ်မှုထမ်းသင်တန်းဆင်းတွေကို စစ်မြေပြင်တွေဆီ တိုက်ရိုက်ပို့ဆောင်နေလို့ သေဆုံး ဒဏ်ရာရသူ၊ ထွက်ပြေးသူ၊ လက်နက်ချသူတွေ များပြားနေတယ်လို့ သိရပါတယ်။
MK – 012
#MeKongNews
#စစ်မှုထမ်း
#အဓမ္မစစ်သားစုဆောင်း
#ပုံပါကျင်
#မိုင်းတုံ
