မဲခေါင်၊ နိုဝင်ဘာ ၉

ရှမ်းပြည်တောင်ပိုင်း၊ တောင်ကြီးမြို့၊ တန်ဆောင်တိုင်ပွဲကာလအနီး မြို့တွင်း၊ မြို့ပြင် နေရာအနှံ့အပြားမှာ စစ်ကောင်စီက လုံခြုံရေးတင်းကြပ်နေပြီး အာဏာသိမ်းစစ်ခေါင်းဆောင်လာရောက်မယ်လို့ သတင်းထွက်ပေါ်နေပါတယ်။

စစ်ခေါင်းဆောင်လာရောက်မှာဖြစ်လို့ လုံခြုံရေးတင်းကြပ်နေတာလို့ မြို့ခံတွေက ယူဆကြပါတယ်။

စစ်ကောင်စီက ဖိအားပေး ကျင်းပခိုင်းတဲ့ တန်ဆောင်တိုင်ပွဲတော်ကို ဒီနေ့ည (နိုဝင်ဘာ ၉) မှာ ကျင်းပဖို့ စီစဉ်ထားပေမယ့် နိုဝင်ဘာ ၁၁ ရက်ညကို ရွှေ့ဆိုင်းလိုက်တယ်လို့ မြို့ခံတွေက ယူဆကြပါတယ်။

စစ်ခေါင်းဆောင် လာရောက်မယ့် ပွဲတော်ကာလအနီး အေးသာယာမြို့မှာ လက်နက်‌တွေဖမ်းမိတာကြောင့် လုံခြုံရေးအတွက် ပွဲတော်ရက် ရွှေ့ဆိုင်းတာ ဖြစ်နိုင်သလို ရာသီဥတုကြောင့် ရွှေ့ဆိုင်းတာလို့လည်း မြို့ခံတွေက ပြောဆိုနေကြပါတယ်။

“မအလ (မင်းအောင်လှိုင်) လာမယ်ဆိုလို့ ခြေရှုတ်နေကြတာ၊ ပွဲရက်လည်း ရွှေ့ရတယ်၊ အသိသာကြီးကို၊ အရင်နှစ်တွေက အဲ့လောက်မှ မကြပ်တာ” လို့ ဌာနဆိုင်ရာနဲ့ နီးစပ်တဲ့ မြို့ခံတစ်ဦးက ပြောပါတယ်။

အတည်မပြုနိုင်တဲ့သတင်းအရ အေးသာယာမှာလက်နှက်တွေဖမ်းမိတာနဲ့ပါတ်သက်ပြီး ဆက်စပ်တရားခံအဖြစ် ၂/ မှတ်ပုံတင်ကိုင်ဆောင်သူ ကရင်နီတိုင်းရင်းသား ၁၂ ဦး ဖမ်းမိထားတယ်လို့ သတင်းထွက်ပေါ်နေပါတယ်။ ဒါနဲ့ပတ်သက်ပြီးစစ်ကောင်စီအနေနဲ့ အတည်ပြုထုတ်ပြန်ထားတာမရှိသေးပါဘူး။

ဝောင်ကြီးတန်ဆောင်တိုင်ပွဲတော်ကို ၂/ တွေတိုက်ခိုက်နိုင်တယ်လို့ယူဆချက်နဲ့ အခုလည်း တောင်ကြီးမြို့တွင်းရပ်ကွက်တွေနဲ့ တောင်ကြီးမြို့နယ်၊ အေးသာယာမြို့တွင်းက ရပ်ကွက်တွေမှာ ၂/ မှတ်ပုံတင်ကိုင်ဆောင်သူတွေကို လိုက်လံရှာဖွေနေတယ်လို့ ဆိုပါတယ်။

“ကျနော်တို့ဘက်မှာလည်း ပတ်ရှာနေလို့ ခြေငြိမ်နေရတယ်၊ အခုက အိမ်ငှားတွေကို အဓိကထားစစ်ပြီး ဧည့်စာရင်းမတိုင်ထားရင် အိမ်ရှင်ကိုပါ ဆွဲမယ့်သဘော” လို့ အေးသာယာမြို့ခံ တစ်ဦးက ပြောပါတယ်။

၂/ မှတ်ပုံတင် ကိုင်ဆောင်သူတွေအနေနဲ့ ခရီးထွက်တာ၊ ခဏတဖြုတ် နေရပ်ပြန်တာတွေ ကြုံခဲ့ရရင် ရပ်ကွက်ရုံးကို အရင်ဆုံး သတင်းပို့ရမှာဖြစ်ပြီး ပြန်ရောက်လာရင်လည်း အချိန်မီ အကြောင်းကြားပေးရမယ်လို့ သူကပြောပါတယ်။

ပြီးခဲ့တဲ့ အောက်တိုဘာလ နောက်ဆုံးပတ်လောက်ကစပြီး တောင်ကြီးမြို့ လဒကုန်း၊ အဓိက လမ်းမကြီးနေရာတွေနဲ့ လမ်းဆုံလမ်းခွနေရာတွေအပြင် တန်ဆောင်တိုင်ပွဲကျင်းပတဲ့ အဝေရာမီးပုံးပျံကွင်း အနီးတဝိုက်မှာလည်း လုံခြုံရေးတွေ ချထားပါတယ်။

အရင်နှစ်တန်ဆောင်တိုင်ပွဲတွေတုန်းက လိုင်စင်မဲ့ယာဉ်အားလုံးကို စီးနင်းခွင့်ပြုထားပေမယ့် ဒီနှစ်မှာတော့ ပွဲအနီးတဝိုက် ဧရိယာအတွင်း စီးနင်းခွင့် မပြုသလို အောက်တိုဘာလ နောက်ဆုံးပတ်ကတည်းက လိုင်စင်မဲ့ယာဉ်တွေကို တင်းတင်းကြပ်ကြပ်ဖမ်းဆီးနေပါတယ်။

MK014

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)