မဲခေါင်၊ မတ် ၂၂

တာချီလိတ်-မယ်ဆိုင် ချစ်ကြည်ရေးတံတား-၁ ပြန်ဖွင့်ပြီးနောက် ဖြတ်သန်းသွားလာသူတွေထဲကနေ တံတား လဝကတွေက သတ်မှတ်ထားတဲ့ ငွေကြေးထက်ပိုပြီး အကြောင်းအမျိုးမျိုးပြကာ အပိုငွေတောင်းခံနေတယ်လို့ ဒေသခံတွေက မဲခေါင်သတင်းဌာနကို ပြောပါတယ်။

မယ်ဆိုင်ဘက်ကို သွားရောက်ဖို့အတွက် မြန်မာဘက်မှာ သတ်မှတ်ထားတဲ့ ကုန်ကျစရိတ်ဟာ ကျပ်တစ်ထောင်သာ ဖြစ်ပေမယ့် နောက်ထပ် ၁၀ဘတ်ကနေ ဘတ် ၅၀ အထိ နည်းမျိုးစုံနဲ့ ထပ်တောင်းတာကြုံရတယ်လို့ တံတား-၁ ပတ်ဝန်းကျင်မှာ အလုပ်လုပ်ကိုင်သူတစ်ဦးက ပြောပါတယ်။

“ကမ်းကူးသွားသွားလာသူတွေထဲကနေ တစ်ရက်စာ တံတားဖြတ်သန်းခွင့် ကျပ်၁၀၀၀ အဲ့သလို ပေးရတာအပြင် နောက်ထပ်တံတားတုံးထုတဲ့နေရာမှာ ကမ်းကူးတုံးထုခဆိုပြီး နားမလည်တဲ့ မြန်မာစကားတတ်သူကော မတတ်သူကော ၁၀ဘတ်၊ ၂၀၊ ၅၀(ဘတ်) အမျိုးးမျိုး ပါးစပ်ထဲရှိတဲ့အတိုင်းတောင်းနေတာ” လို့ သူက ပြောပါတယ်။

ဒါ့အပြင် ရက်တိုကမ်းကူးလက်မှတ် ပြုလုပ်ပြီးသွားတဲ့ သူတွေထံကလည်း ဓာတ်ပုံရိုက်ခ၊ လက်ဗွေနှိပ်ခဆိုပြီး နောက်ထပ် ဘတ် ၂၀ကို တံတားလဝက တာဝန်ကျသူတွေက တောင်းခံတယ်လို့ ကိုယ်တိုင်ကြုံခဲ့ရသူတစ်ဦးက ပြောပါတယ်။

အပိုငွေကြေးတောင်းခံတဲ့နေရာမှာ မြန်မာစာ၊​ မြန်မာစကားမတတ်တဲ့ တိုင်းရင်းသားတွေကို ပိုမိုတောင်းခံလေ့ရှိပြီး အခြေအနေပေါ်မူတည်ပြီး ပိုတောင်းတာလဲရှိတယ်လို့ သူကပြောပါတယ်။

တာချီလိတ်-မယ်ဆိုင် ဖြတ်သန်းသွားလာရာမှာ ရက်တိုသွားလာခွင့်လတ်မှတ်အတွက် ကတ်ဖိုး ကျပ်၅၀၀၊ တုံးထုခ ကျပ် ၅၀၀ သတ်မှတ်ကောက်ခံတာဖြစ်ပါတယ်။

တာချီလိတ်မြို့နယ်အတွင်း အိမ်ထောင်စုဇယားနဲ့ နေထိုင်သူတွေ ပြုလုပ်ခွင့်ရှိတဲ့ တစ်နှစ်ခံစာအုပ်အတွက်ဆိုရင် စာအုပ်ဖိုးပိုမိုကုန်ကျမှာ ဖြစ်ပါတယ်။

MK – 004

#MeKongNews

#တာချီလိတ်

#မယ်ဆိုင်

#လဝက

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)