မဲခေါင် ၊ မေ ၂၆
ရှမ်းပြည်တိုးတက်ရေးပါတီ SSPP အုပ်ချုပ်ရေးဌာနက တန့်ယန်းမြို့ ရပ်ကွက်အုပ်ချုပ်ရေးမှူးတွေကို လောင်းကစားဝိုင်းတွေဖွင့်ရင် ဖမ်းဆီးအရေးယူမယ်လို့ ခေါ်ယူသတိပေးလိုက်တဲ့အတွက် တန့်ယန်းမြို့ထဲက လောင်းကစားဝိုင်းတွေ ပိတ်သိမ်းသွားခဲ့တယ်လို့ ဒေသခံတွေကပြောပါတယ်။
ပြီးခဲ့တဲ့မေလ ပထမပတ်ထဲမှာ SSPP က ခေါ်ယူသတိပေးခဲ့တာဖြစ်ပြီး တန့်ယန်းမြို့ထဲမှာ နှစ်လုံးထီ၊ သုံးလုံးထီ၊ ကာစီနို၊ ငါးပစ်ဂိမ်း အပါအဝင် လောင်းကစားအမျိုးမျိုးကို မပြုလုပ်ကြဖို့ သတိပေးခဲ့တာဖြစ်တယ်လို့ ဒေသခံတစ်ဦးကပြောပါတယ်။
SSPP ကခေါ်ယူသတိပေးမှု မပြုလုပ်ခင်အထိ လောင်းကစားဒိုင်တွေက စစ်ကောင်စီ လက်အောက်ရှိ ဌာနဆိုင်ရာတွေကို လဘ်ငွေထိုးပြီးလောင်းကစားအမျိုးမျိုးကို တန့်ယန်းမြို့ထဲမှာ ဖွင့်လှစ်နေခဲ့တာဖြစ်တယ်လို့ သူကပြောပါတယ်။
“SSPP ကခေါ်သတိပေးပြီးကတည်းက ပိတ်သွားတယ်ဗျ။ ပိတ်သွားတာ ကောင်းတာပေါ့ဗျာ။ လောင်းကစားဝိုင်း ဆက်ရှိနေရင် သူခိုး ဂျပိုးတွေ များလာမယ်။ လုယက်မှုတွေလည်း များလာနိုင်တာမို့ အခုလို သတိပေးပြီးနောက် ပိတ်သွားတာ ကောင်းတယ်လို့ပဲ ကျွန်တော်ကတော့ မြင်တယ်ဗျ” လို့ ဒေသခံတစ်ဦးကပြောပါတယ်။
ရပ်ကွက် အုပ်ချုပ်ရေးမှူးတွေ ရာအိမ်မှူးတွေကို ခေါ်ယူပြီး လောင်းကစားဝိုင်းတွေ မဖွင့်ဖို့ သတိပေးမှု ပြုလုပ်ခဲ့တာ မှန်တယ်လို့လည်း SSPP ပြောရေးဆိုခွင့်ရှိသူ ဗိုလ်ကြီးသီဟရာဇာကပြောပါတယ်။
SSPP ရဲ့ မူဝါဒ ပေါ်လစီအရ လောင်းကစားတွေကို ခွင့်ပြုတာတွေ မရှိတဲ့အပြင် လောင်းကစားတွေဟာ လူတွေရဲ့ အကျင့်စာရိတ္တကို ပျက်စီးစေတာကြောင့် ခေါ်ယူသတိပေးခဲ့တာဖြစ်တယ်လို့ သူကပြောပါတယ်။
“တန့်ယန်းမြို့ထဲမှာ လောင်းကစားဝိုင်းတွေများနေတယ်။ ခိုးမှု ဓားပြမှုတွေ များလာနေတော့ ပေါ်လစီအတိုင်းပဲ လုပ်ဆောင်သွားတာဖြစ်ပါတယ်။ ပထမ တော့ သတိပေးတယ်။ ဒီလိုမလုပ်ဖို့ပေါ့။ နောက်တော့ ဒီလိုမလုပ်နဲ့ ဒီလိုလုပ်နေရင် ကျွန်တော်တို့ သွားဖမ်းဆီးအရေးယူရလိမ့်မယ်လို့ သတိပေးလိုက်တာပါ” လို့ ဗိုလ်ကြီးသီဟရာဇာက ပြောပါတယ်။
တန့်ယန်းမြို့ထဲမှာ ယခင်က လောင်းကစားဝိုင်းတွေ များတာကြောင့် ခိုးဆိုးလုယက်မှုတွေ များပြားခဲ့ပြီး SSPP က သတိပေးပြီး လောင်းကစားဝိုင်းတွေ ပိတ်သိမ်းလိုက်တဲ့နောက်ပိုင်းမှာတော့ ခိုးဆိုးလုယက်မှုတွေ နည်းလာတယ်လို့ တန့်ယန်းမြို့ခံတစ်ဦးကပြောပါတယ်။
SSPP ကခေါ်ယူသတိပေးမှု မလုပ်ခင်မှာ တန့်ယန်းမြို့ပေါ်ရှိ ရပ်ကွက်တွေထဲကို တစ်ရပ်ကွက်လျှင် လောင်းကစားရုံ ၅ ရုံခန့်အထိ အကြောင်းအမျိုးမျိုးပြပြီး လောင်းကစားဒိုင်တွေက ဖွင့်လှစ်ခဲ့ကြတာဖြစ်တယ်လို့ သူကပြောပါတယ်။
CJ – 002
#MeKongNews
#SSPP
#တန့်ယန်း
#လောင်းကစားဝိုင်း