မဲခေါင်၊ ဖေဖော်ဝါရီ ၁၅
ကရင်အမျိုးသားအစည်းအရုံး (KNU) တပ်မဟာ ၅ နယ်မြေအတွင်းက စစ်ကောင်စီစခန်း ၂ ကို စွန့်ခွာထွက်ပြေးသွားတယ်လို့ မူတြော်သတင်းစဥ်က မနေ့ ဖေဖော်ဝါရီ ၁၄ ရက်မှာ သတင်းထုတ်ပြန်ပါတယ်။
ဖာပွန်ခရိုင် (မူတြော်)အတွင်းမှာ တပ်စွဲထားတဲ့ အဲ့ဒီစခန်းတွေဟာ နှစ်ပေါင်း ၂၀ ကျော်တပ်စွဲထားတဲ့ စစ်ကောင်စီစခန်းတွေဖြစ်တယ်လို့ သိရပါတယ်။
အဲ့ဒီစခန်းတွေကို KNLA က ရိက္ခာလမ်းကြောင်းတွေ၊ စစ်ကြောင်းထိုးလမ်းကြောင်းတွေ၊ သောက်သုံးရေခပ်တဲ့ လမ်းကြောင်းတွေကို ပိတ်ဆို့ထားရာမှာ ရဟတ်ယာဥ်နဲ့ စစ်ကောင်စီက ရိက္ခာပို့နေရတဲ့ စခန်းတွေဖြစ်ပါတယ်။
ဆုတ်ခွာသွားတဲ့ စစ်ကောင်စီတပ်တွေဟာ မနီးမဝေးမှာရှိတဲ့ ဗျူဟာစခန်းများဆီ သွားရောက်ပူးပေါင်းခဲ့တယ်လို့ KNU သတင်းထုတ်ပြန်ချက် က ဆိုပါတယ်။
စစ်ကောင်စီ ခမရ-၃၄၉ လက်အောက်ခံ စစ်ကောင်စီစခန်းတွေဟာ ဖေဖော်ဝါရီ ၁၀ ရက်နေ့မှာ ကျူလူတပ်စခန်းမှာ ပြန်လည်ပူးပေါင်းသွားခဲ့ပြီး ဖေဖော်ဝါရီ ၁၁ ရက်နေ့မှာတော့ အတွင်းပိုင်းကျတဲ့ မော်ဖူးဗျူဟာစခန်းကို ပူးပေါင်းသွားခဲ့တယ်လို့ ဆိုပါတယ်။