မဲခေါင်၊ အောက်တိုဘာ ၁၆

စစ်အာဏာရှင် တော်လှန် ကာလမှာ UNOCHA အနေနဲ့ လူသားချင်း စာနာကူညီဖို့ စစ်တပ်နဲ့ ပူးပေါင်းတဲ့ နည်းလမ်းနဲ့ အဖြေမရှာဘဲ လူထုက ယုံကြည်လက်ခံပြီး မြေပြင်မှာ ထိထိရောက်ရောက် လုပ်နေတဲ့ ဒေသန္တရ လူထု အဖွဲ့အစည်းတွေနဲ့ ချိတ်ဆက်ဖို့ CSOs Nexus Consortium–Tanintharyi က တိုက်တွန်းလိုက်ပါတယ်။

ကုလသမဂ္ဂ လူသားချင်းစာနာမှုဆိုင်ရာ ပေါင်းစပ်ညှိနှိုင်းရေးရုံး-UNOCHA က ဆောင်ရွက်နေတဲ့ AHCT (Area of Humanitarian Country Team) အခင်းအကျင်းမှာ ကိုယ်စားလှယ် နေရာ ပါဝင်ဖို့ ငြင်းဆိုစဥ် အခုလို တိုက်တွန်းလိုက်တာ ဖြစ်ပါတယ်။

AHCT စတင်နိုင်ရေးအတွက် တိုင်းကိုယ်စားပြု ကိုယ်စားလှယ်နေရာမှာ ပါဝင်ဆွေးနွေးဖို့ AHCT ရုံးအဖွဲ့က ဆက်သွယ်တာကို တနင်္သာရီ အရပ်ဖက် အဖွဲ့အစည်းတွေ ပါဝင်တဲ့ CNC-Tanintharyi အဖွဲ့တွေ အချင်းချင်း ဆွေးနွေးပွဲ အကြိမ်ကြိမ် ပြုလုပ်ပြီး မနေ့က အောက်တိုဘာ ၁၅ ရက်နေ့မှာ ငြင်းဆို ထုတ်ပြန်ခဲ့တာပါ။

ငြင်းဆိုရတဲ့ အကြောင်းရင်းကတော့ UNOCHA တာ၀န်ရှိသူနဲ့ အာဏာသိမ်းဖို့ ကြိုးပမ်းနေတဲ့ စစ်တပ်ခေါင်းဆောင် မင်းအောင်လှိုင် တို့ ပြီးခဲ့တဲ့ ဩဂုတ်လက နေပြည်တော်မှာ လူသားချင်း စာနာမှု အကူအညီပေးရေး ကိစ္စတွေကို ဆွေးနွေးခဲ့တာကြောင့်လို့ ဆိုပါတယ်။

UNOCHA အနေနဲ့ စစ်တပ်နဲ့ မပူးပေါင်းဘဲ လူထုနဲ့ ပူးပေါင်းပြီး ရွေးချယ်နိုင်တဲ့ နည်းလမ်းအသွယ်သွယ်နဲ့ ပံ့ပိုးကူညီ မှသာ UNOCHA ရဲ့ လုပ်ငန်းစဉ်နဲ့ တာဝန်အတိုင်း လူသားချင်း စာနာထောက်ထားမှု အကြပ်အတည်းကို ထိထိရောက်ရောက် ကျယ်ကျယ်ပြန့်ပြန့် လုပ်နိုင်မယ်လို့ CNC–Tanintharyi က ပြောပါတယ်။

UNOCHA အနေနဲ့ စစ်တပ်ခေါင်းဆောင်နဲ့ တွေ့ဆုံဆွေးနွေးတာဟာ မြန်မာနိုင်ငံရဲ့ လူသားချင်း စာနာမှုဆိုင်ရာ အကြပ်အတည်း လျော့ပါး သက်သာစေမှာ မဟုတ်ဘဲ တနိုင်ငံလုံးမှာ စစ်ရာဇဝတ်မှု ကျူးလွန်နေတဲ့ စစ်တပ်ကို အသိအမှတ်ပြု ထောက်ခံ အားပေးတာ ဖြစ်တယ်လို့ CNC–Tanintharyi ရဲ့ ထုတ်ပြန်ချက်မှာ ထောက်ပြပါတယ်။

လက်ရှိ မြန်မာနိုင်ငံ တဝှမ်း ခံစားနေရတဲ့ လူ့အခွင့်အရေး ချိုးဖောက်မှုတွေရဲ့ တရားခံဟာ စစ်တပ်ဖြစ်ပြီး ပြည်သူတွေ ကြုံတွေ့နေရတဲ့ အတိဒုက္ခတွေဟာ မင်းအောင်လှိုင် ဦးဆောင်တဲ့ စစ်တပ်ရဲ့ ရက်စက်ကြမ်းကြုတ်မှု ကြောင့်လို့ ယုံကြည်ကြောင်း ဆိုပါတယ်။

အခုလို စစ်တပ်ကို ထောက်ခံတာ၊ အသိအမှတ်ပြုတာဟာ ပြည်သူလူထုအပေါ် ရက်စက်ကြမ်းကြုတ်မှုတွေကို တိုးပွားစေပြီး သံတမန်ရေးရာအရ စစ်တပ်ဟာ မြန်မာနိုင်ငံရဲ့ တရားဝင် အစိုးရအဖြစ် အသိအမှတ်ပြုခံရဖို့ ကြိုးပမ်းရာမှာ အထောက်အပံ့ ဖြစ်သွားနိုင်တယ်လို့ CNC–Tanintharyi က ရှုမြင် သုံးသပ်ထားပါတယ်။

တနင်္သာရီဒေသမှာရှိတဲ့ အရပ်ဖက် အဖွဲ့အစည်းတွေ အနေနဲ့လည်း စစ်အာဏာရှင် အပါအဝင် အာဏာရှင်စနစ် အဆုံးသတ်ပြီး အနာဂတ် ဖက်ဒရယ် နိုင်ငံတော် ထူထောင်နိုင်ရေး အတွက် ဆက်လက် တိုက်ပွဲဝင်သွားမယ်လို့ မနေ့က ထုတ်ပြန်ချက်မှာ ဖော်ပြထားပါတယ်။

MK-009

#MekongNews

#UNOCHA

#CNC_Tanintharyi

#ဖက်ဒရယ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)