မဲခေါင်၊ အောက်တိုဘာ ၁၂
ကရင်နီပြည်နယ်၊ ဖရူဆိုမြို့နယ် အနောက်ခြမ်းမှာ မနေ့က နယ်မြေရှင်းလင်း စစ်ဆေးမှုခဲ့တယ်လို့ KARENNI STATE POLICE-ကရင်နီရဲတပ်ဖွဲ့ တာ၀န်ရှိသူ တစ်ဦးက ဒီကနေ့ မဲခေါင်သတင်းဌာနကို ပြောပါတယ်။
ကရင်နီ အမှတ် (၃) နယ်မြေဖြစ်တဲ့ ဖရူဆို အနောက်ခြမ်း လမ်းပိုင်းတွေမှာ ဥပဒေနဲ့ မလွတ်ကင်းတဲ့ မူးယစ်ဆေး၀ါးနဲ့ ပတ်သက်တာတွေ အလေးထား ရှာဖွေစစ်ဆေးခဲ့တာ ဖြစ်တယ်လို့ ဆိုပါတယ်။
“အဓိကကတော့ WY စိတ်ကြွရူးသွပ်ဆေးပြားနဲ့ အခြား မူးယစ်ဆေး၀ါးတွေကို ရှာပါတယ်” လို့ သူကရှင်းပြပါတယ်။
ဒါ့အပြင် နယ်မြေ လုံခြုံရေး အတွက် စစ်ကောင်စီ ထောက်တိုင် ဒလန်တွနဲ့ ပတ်သက်ပြီး စစ်ဆေး ဆောင်ရွက်တာတွေ ရှိတယ်လို့ သူကပြောဆိုပေမယ့် အသေးစိတ်ကိုတော့ မပြောပါဘူး။
ကရင်နီရဲတပ်ဖွဲ့-KSP ကို ၂၀၂၁ ခုနှစ်၊ ဩဂုတ်လ ၂၅ မှာ ကရင်နီ အတိုင်ပင်ခံ ကောင်စီ-KSCC ရဲ့ နိုင်ငံရေး ဦးဆောင်မှုနဲ့ စစ်ကောင်စီကို ဆန့်ကျင် CDM ပြုလုပ်လာတဲ့ ရဲ ၃၂၀ ဦးနဲ့ စတင် ဖွဲ့စည်းခဲ့တာ ဖြစ်ပါတယ်။
ကရင်နီရဲတပ်ဖွဲ့ကို ပြည်သူ့ရေးရာဌာန၊ ရဲရေးရာဌာန၊ သတင်းနှင့်ပြန်ကြားရေးဌာနနဲ့ လေ့ကျင့်ရေးဌာနစတဲ့ ဌာန ၄ ခုနဲ့ ဖွဲ့စည်းထားပြီး တော်လှန်ရေး အင်အားစုတွေ ထိန်းချုပ်ထားတဲ့ နယ်မြေတွေမှာ ရဲစခန်း ၈ ခု၊ လုံခြုံရေးကင်း စခန်း ၂ ခု ဖွင့်လှစ် တာ၀န် ထမ်းဆောင်နေတယ်လို့ သိရပါတယ်။
၂၀၂၃ ခုနှစ် ဩဂုတ်လ ၂၅ ရက်နေ့က ထုတ်ပြန်တဲ့ KSP (၂) နှစ်ပြည့် အစီရင်ခံစာမှာတော့ ကရင်နီပြည်နယ် အတွင်း မူးယစ်ဆေး၀ါးမှု၊ ခိုးမှု၊ မုဒိန်းမှု၊ အိမ်တွင်း အကြမ်းဖက်မှု၊ စစ်ကောင်စီကို သတင်းပေးမှုနဲ့ အခြား အမှုပေါင်း ၃၆၂ မှု ဖော်ထုတ် အရေးယူနိုင်ခဲ့တယ်လို့ ဖော်ပြထားပါတယ်။
ဒါ့အပြင် စစ်ကောင်စီ ကျူးလွန်ခဲ့တဲ့ ၂၀၂၁ ခုနှစ်၊ ဒီဇင်ဘာလ ၂၄ ရက်နေ့က ဖရူဆိုမြို့နယ် မိုဆိုကျေးရွာ အနီး ကားတစ်စီးပေါ်မှာ လူ ၄၀ ကျော်ကို မီးရှို့သတ်ဖြတ်မှု၊ အခုနှစ် မတ်လ ၁၁ ရက်နေ့က ပင်လောင်းမြို့နယ်၊ နမ့်နိန်းကျေးရွာက ပြည်သူ ၂၁ ဦးကို သတ်ဖြတ်မှုတွေကို KSP က သက်သေနဲ့တကွ ဖော်ထုတ်ပြီး NUG လူ့အခွင့်အရေး ၀န်ကြီးဌာန၊ နိုင်ငံတကာ လူ့အခွင့်အရေး အဖွဲ့အစည်းတွေ၊ ပြည်တွင်း မီဒီယာတွေနဲ့ ချိတ်ဆက် ဆောင်ရွက်ခဲ့တယ်လို့ ဖော်ပြထားပါတယ်။
MK-007
#MeKongNews
#ဖရူဆိုမြို့နယ်
#ကရင်နီ_ရဲတပ်ဖွဲ့
#NUG_လူ့အခွင့်အရေး၀န်ကြီးဌာန
