မဲခေါင်၊ ဩဂုတ် ၃၀
ရန်ကုန်၊ မြောက်ဥက္ကလာပမြို့နယ်၊ အ-ထ-က(ခွဲ)၊ အလက (၁၀) ကျောင်းမှာ မူးယစ်ဆေးဝါး သုံးစွဲနေတဲ့ ကျောင်းသား ၇ ဦးကို ကျောင်းအုပ် ဆရာကြီးက ကျောင်းသား မိဘများထံ ပြန်လည် အပ်နှံခဲ့တယ်လို့ ရပ်ကွက်နေ ပြည်သူတစ်ဦးက မဲခေါင်သတင်းဌာနကို ပြောပါတယ်။
သြဂုတ်လ ၂၆ ရက်နေ့က ဆရာ၊ ဆရာမများက Grade -10 (STEAM-2) စာသင်ခန်းအတွင်း စစ်ဆေးရာ စီးကရက်၊ မီးခြစ်နဲ့ ဖုန်းတစ်လုံး သိမ်းဆည်းရမိခဲ့ပြီး အဆိုပါဖုန်းကို စစ်ဆေးရာ Messenger မှာ မူးယစ်ဆေးဝါး သုံးစွဲထားတဲ့ အထောက်အထားများ တွေ့ရှိခဲ့ရပြီးနောက် ကျောင်းသား ၉ ဦးကို စစ်ဆေးခဲ့ရာ ကျောင်းသား ၇ ဦးမှ သုံးစွဲခဲ့တယ်လို့ ဝန်ခံ ထွက်ဆိုခဲ့တယ်လို့ ဆိုပါတယ်။
“သူတို့အဖွဲ့က အားလုံး ၉ ယောက်ရှိတယ်။ ၂ ယောက်ကတော့ မိဘတွေ ခံဝန်ထိုးပေးထားလို့ ကျောင်းကနေ ခဏနားထားတဲ့ ပုံစံနဲ့ နေရတာ။ ကျောင်းနားမှာ ဖွင့်ထားတဲ့ အအေးဆိုင်မှာ ထိုင်ပြီး ဆေးသုံးတယ်၊ ဆေးလိပ် သောက်တယ်။ အဲ့ဆိုင်ကလည်း ကျောင်းက ဆရာ၊ ဆရာမတွေကိုတောင် ဆဲဆိုတာတွေ လုပ်တယ်။ ကျောင်းသူတွေကိုလည်း အဲ့ကောင်လေးတွေက လိုက်နှောက်ယှက်တာတွေရှိတယ်” လို့ သူကပြောပါတယ်။
အဆိုပါ ကျောင်းသားများကို ဆရာ၊ ဆရာမများက ရှောင်တခင် စစ်ဆေးရာမှာ ဆေးလိပ်၊ မီးခြစ်၊ ဆေးရည်ထည့် သုံးစွဲရတဲ့ Vape ၊ Pod များ အကြိမ်ကြိမ် တွေ့ရှိခဲ့ပြီး မိဘများကို ခေါ်ယူကာ အကြိမ်ကြိမ် သတိပေးမှုတွေလည်း ပြုလုပ်ခဲ့တယ်လို့ သိရပါတယ်။
မူးယစ်ဆေးဝါး သုံးစွဲခဲ့တဲ့ Grade -10 (STEAM-2) က ကျောင်းသား ၆ ဦးနဲ့ Grade -10 (STEAM-1) က ကျောင်းသား တစ်ဦး စုစုပေါင်း ကျောင်းသား ၇ ဦးအား မိဘများနဲ့ ညှိနှိုင်းကာ ကျောင်းပြောင်း လက်မှတ်များကို သြဂုတ်လ ၂၈ ရက်နဲ့ ၂၉ ရက်နေ့တို့မှာ ကျောင်းအုပ် ဆရာကြီးက ထုတ်ပေးခဲ့တယ်လို့ သိရပါတယ်။
ကျန်ကျောင်းသား ၂ ဦးမှာ မူးယစ်ဆေးဝါး သုံးစွဲခြင်း မရှိတဲ့အတွက် ခံဝန်ကတိ ရေးထိုးခိုင်းခဲ့ပြီး မိဘများထံ ရက်သတ္တပတ် ပြန်လည် အပ်နှံထားတယ်လို့ ကျောင်းသား မိဘ တစ်ဦးက ပြောပါတယ်။
အဆိုပါ ကျောင်းသား ၇ ဦးဟာ စာသင်ကျောင်းမှာ ဆရာ၊ ဆရာမတွေကို ရိုင်းစိုင်းစွာ ပြောဆို ဆက်ဆံမှုတွေရှိပြီး မကြာခဏ ရန်ဖြစ်လေ့ရှိသူတွေ ဖြစ်တယ်လို့ ကျောင်းသား မိဘတစ်ဦးက ပြောပါတယ်။
MK-005
#MeKongNews
#မြောက်ဥက္ကလာ
#မူးယစ်ဆေး
#Vape_Pod
