မဲခေါင်၊ ဇူလိုင် ၂၉
ရှမ်းပြည်နယ် တောင်ပိုင်း၊ ပင်လောင်းမြို့နယ်နဲ့ ညောင်ရွှေမြို့နယ် တောင်ပိုင်းမှာ စစ်ကောင်စီ လက်အောက်ခံ PNO ပြည်သူ့စစ်က ရှမ်း-ကရင်နီ နယ်စပ် လုံခြုံရေး အကြောင်းပြပြီး မကြာခဏ ဆက်ကြေးတောင်းတာကြောင့် အခက်အခဲ ဖြစ်နေတယ်လို့ ဒေသခံ ပြည်သူတွေက ပြောပါတယ်။
ဦးအောင်ခမ်းထီ ဦးဆောင်တဲ့ PNO ပြည်သူ့စစ်ဟာ ပင်လောင်းမြို့နယ် နဲ ညောင်ရွှေမြို့နယ် တောင်ပိုင်းရှိ ကျေးရွာတွေက တစ်ရွာကို ၂ ယောက်မှ ၅ ယောက်အထိ တပ်သားသစ် တောင်းနေပြီး မပေးတဲ့ ရွာတွေကို လတိုင်း ဆက်ကြေး ကောက်နေတယ်လို့ ဒေသခံတွေကပြောပါတယ်။
“ကျွန်တော်တို့ရွာက လူသစ်မပေးတဲ့အတွက် လုံခြုံရေးစရိတ် လတိုင်း ထည့်ရမယ်ဆိုပြီး တောင်းတယ်ဗျာ။ ဒီနှစ်ထဲမှာကိုပဲ သူတို့တောင်းတာ ၁၀ ကြိမ်ထက် မနည်းတော့ဘူး။ တစ်ခါတောင်းရင် အနည်းဆုံး ၃ သောင်း တောင်းတယ်ဗျာ” လို့ ပင်လောင်းမြို့နယ်၊ နန်းတုန်ကျေးရွာအုပ်စု ဒေသခံ တစ်ဦးက ပြောပါတယ်။
PNO ပြည်သူ့စစ်ဟာ ကျေးရွာတွေမှာ တပ်သားသစ် စုဆောင်းနေတာဖြစ်ပြီး တပ်သားသစ် မပေးတဲ့ ရွာတွေကို တစ်အိမ် တစ်လ ၃ သောင်းကျပ်နဲ့အထက် လုံခြုံရေးကြေး ဆက်ကြေး ကောက်နေတယ်လို့ ဒေသခံတွေက ဆိုပါတယ်။
“အရင်က ပင်လောင်းတစ်မြို့နယ်လုံးကို သူတို့ကောက်တဲ့ ကျည်ဆံဖိုး တစ်အိမ် တစ်သိန်းတုန်းကလည်း ထည့်ရတယ်။ အခုက ရှမ်းနဲ့ကယား နယ်စပ်ဖက်မှာကျတဲ့ ရွာတွေကိုပဲ သူတို့ သီးသန့် ကောက်တာပေါ့။ PNO ဗဟိုက လုပ်တာလား PNO အောက်ခြေ တပ်မှူးတွေက တောင်းစားတာလားတော့ ကျွန်တော်တို့လည်း မမေးရဲဘူး” လို့ ညောင်ရွှေမြို့နယ်၊ စံကားကျေးရွာအုပ်စုနေ ဒေသခံ တစ်ဦးက ပြောပါတယ်။
အဲ့ဒီလို ဆက်ကြေးအပြင် မကြာခဏ စစ်သားဖိနပ်ဖိုး၊ စစ်သားစောင်ဖိုး၊ စစ်သား စားနပ်ရိက္ခာဖိုး ဆိုပြီး ခေါင်းစဉ် အမျိုးမျိုးနဲ့ ငွေကြေးကောက်ခံနေတာ အခုနှစ်အတွင်းမှာ ၁၀ ကြိမ်ထက် မနည်းတော့ဘူးလို့ ပင်လောင်းမြို့နယ်၊ လုံးပဉ်ကျေးရွာအုပ်စုမှ ကျေးရွာရပ်မိရပ်ဖ တစ်ဦးက ပြောပါတယ်။
အဲ့ဒါအပြင် PNO ပြည်သူ့စစ်ဟာ ဒေသခံတွေကို မူးယစ်ဆေးဝါး အကြောင်းပြကာ မကြာခဏ ပြန်ပေးဆွဲပြီး ငွေတောင်းတာတွေ လုပ်နေတယ်လို့ ဒေသခံ အမျိုးသမီး တစ်ဦးက ပြောပါတယ်။
“အခုလထဲမှာတင် ၃ ယောက်ရှိပြီ ဖမ်းပြီး ငွေနဲ့ ပြန်ရွေးခိုင်းတာ။ အရင်နှစ်က အဲ့လို ပြန်ပေးဆွဲခံရရင် တစ်ယောက်ကို ၁၀ သိန်းအောက်နဲ့ ညှိနှိုင်းလို့ရတယ်။ ဒီနှစ်ကျတော့ အဲ့လောက်နဲ့ မရတော့ဘူး။ တစ်ယောက်ကို သိန်း ၄၀ လောက်တောင်းတယ်” လို့ သူကပြောပါတယ်။
အခုလို ပြည်သူတွေကို ဆက်ကြေးကောက် နှိပ်စက်နေတာကြောင့် ဒေသခံလူငယ် အများအပြား ထိုင်းနိုင်ငံကို ထွက်ပြေးသွားတယ်လို့ ဒေသခံတွေက မဲခေါင်သတင်းဌာနကို ပြောဆိုပါတယ်။
အဲ့ဒီလို PNO ပြည်သူ့စစ်က ဒေသခံတွေအပေါ် ဆက်ကြေးအမျိုးမျိုး ကောက်နေတာနဲ့ ပတ်သက်ပြီး PNO ပြည်သူ့စစ် တာဝန်ရှိသူတွေကို ဆက်သွယ် မေးမြန်းပေမယ့် လက်ခံဖြေကြားတာ မရှိပါဘူး။
ဦးအောင်ခမ်းထီ ဦးဆောင်တဲ့ PNO ပြည်သူ့စစ်ဟာ ၁၉၉၁ ခုနှစ်မှာ စစ်တပ်နဲ့ အပစ်အခတ် ရပ်စဲပြီး ၂၀၀၉ ခုနှစ်မှာတော့ စစ်ကောင်စီ လက်အောက်ခံ အသွင်ပြောင်း ပြည်သူ့စစ်အဖြစ် ပြောင်းလဲ ဖွဲ့စည်း ခဲ့ပါတယ်။
ဒါ့အပြင် နွေဦးတော်လှန်ရေးမှာလည်း စစ်ကောင်စီနဲ့ ပူးပေါင်းပြီး ဆန္ဒပြသူတွေကို ဖမ်းဆီးတာ ၊ တော်လှန်ရေး တပ်ပေါင်းစုကို ကရင်နီပြည်ထဲအထိ ဝင်ရောက် တိုက်ခိုက်တာတွေ ပြုလုပ်နေတဲ့အတွက် နာမည်ဆိုးနဲ့ ကျော်ကြားနေတဲ့ စစ်ကောင်စီ လက်အောက်ခံ ပြည်သူ့စစ်အဖွဲ့ ဖြစ်ပါတယ်။
CJ-002
#Mekongnews
#ပင်လောင်းမြို့နယ်
#PNO
#ရှမ်း-ကရင်နီ
