မဲခေါင်၊ ဇူလိုင် ၁၈
ရှမ်းပြည်နယ် မြောက်ပိုင်း၊ တအာင်းဒေသ နမ့်ဆန်မြို့နယ် တစ်နေရာမှာ တအာင်းအမျိုးသား လွတ်မြောက်ရေး တပ်မတော်-TNLA က အခြေခံ ရဲသင်တန်း အပတ်စဉ် (၄) ကို ဇူလိုင်လ ၁၇ ရက်နေ့မှာ စတင်ဖွင့်လှစ်ခဲ့တယ်လို့ TNLA က ထုတ်ပြန်ပါတယ်။
အခုလို ရဲသင်တန်းဖွင့်လှစ်ရတာဟာ ဒေသတွင်း တရားဥပဒေ စိုးမိုးရေး လုပ်ငန်း လုပ်ဆောင်ရာမှာ နည်းစနစ်ကျကျ ပိုမိုဆောင်ရွက်နိုင်ဖို့ နဲ့ တရားဥပဒေ လွှမ်းမိုးမှု ပိုမိုခိုင်မာလာဖို့ ရွည်ရွယ်တာ ဖြစ်တယ်လို့ TNLA က ပြောပါတယ်။
“ရဲအလုပ်ဆိုတာ ပြည်သူလူထုကို လုံခြုံမှုပေးရမယ်၊ တအာင်းဒေသ (မူရင်းအသုံး-တအာင်းပြည်နယ်) အတွင်းမှာ နေထိုင်တဲ့ မည်သည့် လူမျိုးကိုမဆို လူမျိုးခွဲခြားမှု မရှိစေဘဲ တရားဥပဒေ အတိုင်း ကျစ်လစ်ခိုင်မာစွာ လွှမ်းမိုးမှုရှိမယ်၊ ပြည်သူလူထုတွေ အေးချမ်းစွာ နေထိုင်နိုင်ရန်နဲ့ လုံခြုံမှုရှိစေရန် ကျွန်တော်တို့ ရဲတာဝန်ဖြစ်တယ်” လို့ TNLA အုပ်ချုပ်ရေးဌာနမှူး ဗိုလ်မှူးကြီးတားဂူးဇား ကပြောပါတယ်။
မနေ့က စတင်ဖွင့်လှစ်သင်ကြားလိုက်တဲ့ ရဲသင်တန်းဟာ (၄) ကြိမ်မြောက် ဖွင့်လှစ်ခဲ့တာဖြစ်ပြီး သင်တန်းသား ၄၅ ဦး ရှိတယ်လို့ TNLA က ထုတ်ပြန်ပါတယ်။
အခုဖွင့်လှစ်တဲ့ ရဲသင်တန်းကို TNLA ရဲ့ အုပ်ချုပ်ရေးဌာနမှာ တာဝန်ထမ်းဆောင်နေကြတဲ့ အရည်အချင်း ပြည့်မီသူတွေကို စိစစ်ရွေးချယ်ကာ ရဲသင်တန်း တက်ရောက်စေခဲ့တာဖြစ်ပြီး ရဲသင်တန်းဖွင့်ပွဲကို မနက် ၉ နာရီကနေ နေ့လယ် ၁၂ နာရီထိ ပြုလုပ်ခဲ့တယ်လို့ TNLA ကဆိုပါတယ်။
၆ လတာကြာမြင့်မယ့် အခု ရဲသင်တန်းမှာ ရဲလုပ်ငန်း၊ ဥပဒေ၊ ကိုယ်ခံပညာ၊ ခေါင်းဆောင်မှုပညာ၊ စီမံခန့်ခွဲမှုပညာ၊ နိုင်ငံရေး၊ အုပ်ချုပ်ရေး ဘာသာရပ်တွေကို သင်ကြားသွားမှာ ဖြစ်ပါတယ်။
TNLA အနေနဲ့ ၂၀၂၁ မှ ၂၀၂၃ အထိ ရဲသင်တန်း (၃) ကြိမ် ဖွင့်လှစ်ခဲ့ပြီး ရဲဝန်ထမ်း ၁၃၇ ဦးကို မွေးထုတ်ပေးနိုင်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
CJ-002
#MekongNews
#TNLA
#နမ့်ဆန်မြို့နယ်
#ရဲသင်တန်း
