မဲခေါင်၊ မေ ၂၆
ရှမ်းပြည်နယ်ရဲ့ မြို့တော် တောင်ကြီးမြို့ရဲ့ အခြေခံပညာ အထက်တန်းကျောင်းတွေမှာ ကျောင်းဆရာ ဝတ်စုံနဲ့ အသွင်ယူပြီး တစ်ရက်အတွင်း ဆိုင်ကယ် ၁၂ စီး ခိုးယူမှု ဖြစ်ပွားခဲ့တယ်လို့ ကျောင်းသား မိဘတွေဆီက သိရပါတယ်။
ကျောင်းဆရာ အသွင်ယူ ဆိုင်ကယ်ခိုးယူမှုဟာ မေလ ၂၃ ရက်နေ့ ကျောင်းအပ်နှံရေးနေ့ မနက်ပိုင်းက အ.ထ.က (၁) ကျောင်းမှာ ဖြစ်ပွားခဲ့ပြီး ကျောင်းဆရာရဲ့ ဆိုင်ကယ် တစ်စီးနဲ့ ကျောင်းသားမိဘတွေရဲ့ ဆိုင်ကယ် ၃ စီး စုစုပေါင်း ၄ စီး ခိုးယူသွားတယ်လို့ ကျောင်းနဲ့ နီးစပ်သူ တစ်ဦးက ပြောပါတယ်။
“အဲဒီရက်က Grade 9 သင်ရိုးသစ် သင်တန်း ဆိုတော့ နယ်က ဆရာ/မတွေ အများကြီးလာတယ်။ အဲဒီမှာ သူခိုးက ကျောင်းဆရာလို ဝတ်လာပြီး ဓါတ်ပုံရိုက်ခံပြီး ဝင်ခိုးသွားတယ်။ ၄ စီးပါသွားတယ်။ ၂ စီးက သံကြိုးနဲ့ ခတ်ထားတော့ ပါမသွားလိုက်ဘူး။ တစ်စီးက ပင်းတယ ဆရာရဲ့ ဆိုင်ကယ် Honda 125 သိန်း ၃၀ တန်။ ကျောင်သားမိဘ တစ်စီးက Wave 100 ၂၅ သိန်းတန်။ အပြင်မှာ ရပ်ခဲ့လို့ပါသွားတာ။ သူတို့က ငှားစီးလာတာတဲ့။ ပျောက်တော့လည်း ငိုလို့ပေါ့” သူက ပြောပါတယ်။
အလားတူ အဲဒီရက် တစ်ချိန်တည်းမှာ အ.ထ.က (၂)၊ အ.ထ.က (၃)၊ အ.ထ.က (၄)၊ အ.ထ.က (၁၀) တို့မှာလည်း တစ်ကျောင်းမှာ ဆိုင်ကယ် ၂ စီးနှုန်းနဲ့ စုစုပေါင်း ၈ စီး ပျောက်ဆုံးခဲ့တယ်လို့ ဆိုပါတယ်။
“ထ ၂ မှာ ဝင်ခိုးတာက မိန်းကလေး။ ပုံစံက သူခိုးလို့ မထင်ရဘူး။ အပျိုအရွယ်ပဲ၊ ဂါဝန်နဲ့ ဝတ်ထားတာ။ ဆံပင်အဖြောင့်နဲ့။ CCTV က ပြန်ကြည့်တာ ပြောတယ်။ ဘယ်က CCTV လဲတော့ မသိဘူး” လို့ ကျောင်းနဲ့ နီးစပ်သူ တစ်ဦးက ဆက်ပြောပြပါတယ်။
တောင်ကြီးမြို့ အ.ထ.က ကျောင်းတွေမှာ အခုလို တစ်ရက်တည်း ဆိုင်ကယ် ၁၂ စီး စံချိန်တင် ပျောက်ဆုံးတာဟာ သမိုင်းမှာ ပထမဆုံး ဖြစ်တယ်လို့ ကျောင်းသားမိဘတွေက ပြောပါတယ်။
အခုလို ဆိုင်ကယ်တွေ ပျောက်ဆုံးပြီးနောက် စစ်ကောင်စီ လက်အောက်ခံ နယ်ထိန်းရဲကို ဆက်သွယ် အကြောင်းကြားခဲ့ပေမယ့် CCTV ပြန်ကြည့်ပေးရုံသာ လုပ်ပေးပြီး ဖမ်းဆီး ပေးတာမျိုး မရှိဘူးလို့ သိရပါတယ်။
ဒါ့အပြင် ပျောက်ဆုံးသွားတဲ့ အထဲက ၁၀ စီးဟာ လိုင်စင်ပါတဲ့ ဆိုင်ကယ်တွေ ဖြစ်နေပေမယ့် ကုန်းလမ်း ပို့ဆောင်ရေး ညွှန်ကြားမှု ဦးစီးဌာန-ကညန က ကူညီပေးတာ မရှိသေးဘူးလို့ သိရပါတယ်။
၂၀၂၃ ခုနှစ် အစောပိုင်း ကတည်းက တောင်ကြီး တစ်မြို့လုံးရဲ့ လမ်းဆုံလမ်းခွတိုင်းမှာ တပ်ဆင်ထားတဲ့ AI စနစ်ပါ CCTV ကင်မရာတွေဟာ လူဆိုး၊ သူခိုးတွေကို ဖမ်းဆီးဖို့ မဟုတ်ဘဲ နိုင်ငံရေး တက်ကြွလှုပ်ရှားတဲ့ လူငယ်တွေကို ဖမ်းဆီးဖို့ တပ်ဆင်ထားတာဖြစ်လို့ မြို့နေလူထု အနေနဲ့ စစ်ကောင်စီ လက်အောက်ခံ ရဲတပ်ဖွဲ့အပေါ် ဝေဖန်မှုတွေ မြင့်တက်နေပါတယ်။
CJ-007
#MeKongNews
#တောင်ကြီးမြို့
#ကျောင်းဆရာ
#ဆိုင်ကယ်ခိုးယူ
