ဖယ်ခုံ ရဟန်းတစ်ဦးနှင့် အမျိုးသားတစ်ဦး အသတ်ခံရမှု ၎င်းတို့နှင့် မသက်ဆိုင်ကြောင်း ဖယ်ခုံ PDF ထုတ်ပြန်၊ အမှုမှန်ပေါ်ပေါက်ရေး ဆောင်ရွက်မည်ဟုဆို
မဲခေါင်၊ မတ် ၅
ဖယ်ခုံမြို့နယ်၊ အုံတိုင်းကျေးရွာတွင် အသတ်ခံရသည့် ရဟန်းနှင့်လူကိစ္စတွင် ၎င်းတို့နှင့် လုံးဝမသက်ဆိုင်ကြောင်း ဖယ်ခုံမြို့နယ် ပြည်သူ့ကာကွယ်ရေးတပ် တပ်ရင်း-၂(၁၀၀၆ တပ်ရင်း)က ယနေ့ မတ်လ၅ ရက်တွင် ထုတ်ပြန်သည်။
ထုတ်ပြန်ချက်တွင် ယမန်နေ့ ၂၀၂၅ခုနှစ်၊ မတ်လ ၄ရက်နေ့ ညနေ ၄ နာရီ ဝန်းကျင်၌ ဖယ်ခုံမြို့နယ်၊ နားဟီးကျေးရွာအုပ်စု၊ အုံတိုင်းကျေးရွာ အုန်းတိုင်းကျေးရွာရှိ (ဖယ်ခုံမြို့- ရှမ်းဘုန်းကြီးကျောင်း) မှ ကျောင်းထိုင် သံဃာတော်တစ်ပါးနှင့် အမျိုးသားတစ်ဦးအား လက်နက်ကိုင်လူတစ်စုမှ သေနတ်ဖြင့်ပစ်ခတ်သတ်ဖြတ်မှု ဖြစ်စဥ်ဖြစ်ပွားခဲ့ကြောင်း၊ ယင်းဖြစ်စဥ်သည် ဖယ်ခုံPDF(၁၀၀၆ တပ်ရင်း) နှင့် လုံးဝမသက်ဆိုင်ကြောင်း နှင့် ၁၀၀၆ တပ်ရင်း၏ တပ်ရင်းမှူး၊ ဒု-တပ်ရင်းမှူး မှအစ အောက်ခြေရဲဘော်များအဆုံး တပ်ဖွဲ့ဝင်များအားလုံးက ထိုသို့နိုင်ထက်စီးနင်းသော လုပ်ရပ်အား ပြုလုပ်ကျူးလွန်ခြင်းမရှိကြောင်း ထွက်ဆိုချက်များအား ကျွန်ုပ်တို့ရဲဘော်များက အသက်နှင့် သစ္စာခံကြောင်း ပြည်သူလူထုထံ အသိပေး တင်ပြအပ်ပါသည်ဟု ဖော်ပြပါရှိသည်။
ယင်းအပြင်ဖယ်ခုံPDF (၁၀၀၆ တပ်ရင်း)၏ စိုးမိုးရာနယ်မြေဒေသတွင် ဖြစ်ပွားခဲ့သော ထိုဖြစ်စဥ်အပေါ် မိမိတို့ ၁၀၀၆ တပ်ရင်းအနေဖြင့် တရားသောအမှုမှန်ပေါ်ပေါက်ရေး ပအဖများ နှင့် ပူးပေါင်းကာ တပ်ရင်းအနေဖြင့် လိုအပ်သည်များကို ဆောင်ရွက်သွားမည် ဖြစ်ကြောင်းလည်း အသိပေးအပ်ပါသည်ဟု ပါရှိသည်။
ထို့အတူ အဆိုပါဖြစ်စဥ်နှင့်ပက်သက်၍ ၁၀၀၆ တပ်ရင်းအနေဖြင့် မပြီးဆုံးသေးသော တော်လှန်ရေးလမ်းခရီး တွင် တပ်ရင်း နှင့် လူထုအကြား သဘောထားကွဲလွဲစေရန် သွေးခွဲလုပ်ဆောင်သည့် မည်သို့သော အကြောင်းရင်းများကိုမဆို လက်သင့်ခံမည် မဟုတ်ကြောင်း အထက်ပါ တင်ပြချက်များနှင့်တကွ အသိပေးထုတ်ပြန်လိုက်ရပါသည်ဟုပါရှိသည်။
ယမန်နေ့ မတ်လ ၄ ရက်နေ့၊ ညနေ ၄ နာရီအချိန်ကဖယ်ခုံမြို့နယ် ဖယ်ခုံရှမ်းကျောင်းမှ ဦးဇင်းပိန် နှင့် ဆီစက်ပိုင်ရှင် ဦးကယားမောင် ၏ သား အိုက်ပီး တို့ကို ဆိုင်ကယ် ၄ စီးဖြင့် ရောက်ရှိလာသည့် လက်နက်ကိုင်များက သေနတ်နဲ့ ပစ်သတ်သွားခဲ့ခြင်းဖြစ်သည်။
မဟာ
#MeKongNews
