သည်းထန်စွာရွာသွန်းသည့် အခါမဲ့မိုးကြောင့် ကျိုင်းတုံ-တာကော်ကြား လမ်းချော်သဖြင့် ရင်ကွဲတောင်၌ ယနေ့ထိ ကားအစီးရေ ၂၀၀ ခန့် ရပ်တန့်ထားရ
မဲခေါင်၊ ဖေဖော်ဝါရီ ၂၇
ယခုလ ၂၄ နှင့် ၂၅ ရက်များတွင် ရွာသွန်းသည့် အခါမဲ့မိုးကြောင့် ရှမ်းပြည်အရှေ့ပိုင်း ကျိုင်းတုံမှ တာကော်တံတားသွား ကားလမ်းဖြစ်သည့် ပြည်ထောင်စုလမ်းမကြီး၌ ရွှံ့ဗွက်များဖြစ်ပေါ်ကာ လမ်ချော်ခြင်းနှင့် ယာဉ်ထိမ်းမှောက်ခြင်းများ ဖြစ်ပွားခဲ့ကြောင်း ခရီးသည်တင်ယာဉ်များထံမှ သိရသည်။
ယမန်နေ့က ကျိုင်းတုံ-တာကော်ကြား ဆင်မောင်း၊ ရင်ကွဲတောင်၌ လမ်းချော်ကာ ယဉ်တိမ်းမှောက်မှု ဖြစ်ပွားခဲ့ သော်လည်း လူအထိအခိုက်မရှိခဲ့။ သို့သော်လည်း လမ်းပိတ်ဆို့မှုကြောင့် ယာဉ်များရပ်ဆိုင်းနေကြရသည်ဟု သိရသည်။
“ မြေသားတွေက မိုးရွာတော့ ရွှံစေးတွေဖြစ်ပြီး ကားတွေလမ်းချော်ကုန်တာ၊ တူးဝီးတွေဆို ဘရိတ်ဒန့်ကတော့တာပဲ၊ အချို့ကားတွေ ဘီးတွေကို ချိန်းပတ်ရတယ်၊ အမောင်းကျွမ်းရင်တောင် လမ်းအယူကျွမ်းဖို့ လိုမယ်” ဟု ယာဉ်မောင်းတစ်ဦးက ပြောသည်။
လမ်းအခြေအနေကြောင့် ယနေ့(ဖေဖော်ဝါရီ၂၇) နံနက်ပိုင်းမှသာ ခရီးဆက်ရသည့်ကားများရှိနေသလို လမ်းချော်သည့်နေရာများ၌ လမ်းရှင်းရန်စောင့်ဆိုင်းနေသည့် ကုန်ကားကြီးများ၊ ခရီးသည်တင် Express ကားကြီးများ ယနေ့ နံနက်အထိ အစီးရေ၂၀၀ ခန့် ရှိနေသည်ဟု သိရသည်။
“ ခုရက်ပိုင်းလေး မိုးရွာတာတောင် ခုလောက်လမ်းချော် ဒုက္ခရောက်နေရင် လမ်းကောင်းအောင်မလုပ်နိုင်သမျှ မိုးတွင်းဆို မချောင်ဘူး၊ ခုကို မိသားစုလိုက် ခရီးထွက်လာတာ ကလေးငယ်နဲ့ တစ်ညစောင့်လိုက်ရပြီ”ဟု ကျိုင်းတုံမှ တောင်ကြီးသွားခရီးသည်တစ်ဦးက ပြောသည်။
“ ရိက္ခာလည်းမပါ၊ အပေါ့ အလေးစွန့်ဖို့လည်းခက်၊ ရာသီကလည်း အရမ်းအေး၊ ကျန်းမာရေးမကောင်းတဲ့သူဆို မလွယ်ဘူး “ဟု ခရီးသွားတစ်ဦးကပြောသည်။
ယမန်နှစ်အတွင်း အဆိုပါနေရာသည် လမ်းဆိုး လမ်းပျက်ကာ လမ်းပိတ်ဆို့များကြောင့် ခရီးသွားကားများ ၄-၅ ရက်ခန့် ကြန့်ကြာမှုများ ရှိခဲ့သည်။
ယခုလ ၂၄၊၂၅ ရက်တွင် ရှမ်းအရှေ့မြို့များဖြစ်သည့် ကျိုင်းတုံ၊ တာချီလိတ် ၊ မိုင်းလား၊ မိုင်းဆတ် ၊ မိုင်းတုံ၊ နားကောင်းမူးဘက်များ၌ မိုးသည်းထန်စွာရွာသွန်းခဲ့သည်။
မဟာ
#MeKongNews
