ကျေးရွာပေါင်း ၃၀ ရှိသည့် မိုင်းဆတ်မြို့နယ်၊ ကျတီအုပ်စုတစ်စုလုံး ပြည်သူ့စစ်မှုထမ်းအတွက် တစ်အိမ်ထောင် ကျပ်ငါးသောင်းပေးရ
မဲခေါင်၊ ဖေဖော်ဝါရီ ၁၉
ကျေးရွာပေါင်း ၃၀ ၊ အိမ်ထောင်စု ၁၇၀၀ ကျော်ရှိသည့် ရှမ်းပြည်အရှေ့ပိုင်း၊ မိုင်းဆတ်မြို့နယ်၊ ကျတီအုပ်စု တစ်စုလုံး ပြည်သူ့စစ်မှုထမ်းကင်းလွတ်ခွင့်အတွက် တစ်အိမ်ထောင်လျှင် ကျပ်ငါးသောင်းစီ မဖြစ်မနေပေးဆောင်နေရကြောင်း ရွာဒေသခံများထံက သိရသည်။
ယခင် စစ်သင်တန်းအပတ်စဉ်များအတွက် တစ်အိမ်ထောင်လျှင် ကျပ်သုံးသောင်းပေးနေရာမှ ယခု ကျပ် ငါးသောင်းအထိ တိုးမြင့်ကောက်ခံလာခြင်းဖြစ်သည်။
“ ငါးသောင်း မသွင်းရင် လူပေးရမယ်ပြောတာ၊ လူထည့်လိုက်တာလည်း ဘာသတင်းမှမကြားရတော့ဘူး၊ သေလား ရှင်လားမသိ၊ ခုကျ ငါးသောင်းဆိုတော့ တစ်ချို့တွေ စားဖို့တောင် အရမ်းခက်ခဲနေတာလေ၊ အရမ်းဒုက္ခရောက်နေကြတာ၊ လူကြီးတွေ ကိုယ်ချင်းစာပါ” ဟု ဒေသခံတစ်ဦးက ပြောသည်။
မိုင်းဆတ်မြို့နယ်တစ်ခုလုံး အိမ်ထောင်စု ပေါင်း ခုနှစ်သောင်းကျော်ရှိရာ မြို့နယ်အုပ်ချုပ်ရေးမှူး ဦးအားလွန်၏ ညွှန်ကြားချက်အရ စစ်မှုထမ်းလူသစ်စုဆောင်းရာတွင် ကျေးရွာများ၌ တစ်အိမ်ထောင် ကျပ်ငါးသောင်း မဖြစ်မနေကောက်ခံနေခြင်းဖြစ်ကြောင်း သိရသည်။
ပြည်သူ့ စစ်မှုထမ်းဥပဒေနှင့် နည်းဥပဒေများတွင် ပြည်သူ့စစ်မှုထမ်းကင်းလွတ်ခွင့်အတွက် ငွေကြေးပေးဆောင်ရမည်၊ ပြည်သူ့စစ်မှုထမ်း အဓမ္မခိုင်းစေခံရသူအတွက် ငွေကြေးထောက်ပံ့ပေးရမည်ဟူဟော ပြဌာန်းချက် လုံးဝပါဝင်ပြဌာန်းထားခြင်းမရှိသော်လည်း အောက်ချေရပ်ကျေးမှစတင်ကာ မြို့နယ်၊ ခရိုင်အထိအဆင့်ဆင့်ထိ ရပ်ကျေးများ၌ ငွေကြေးတောင်းခံနေခြင်းဖြစ်သည်။
ကျေးရွာ သို့မဟုတ် ရပ်ကွက်၌ စစ်မှုထမ်းအတွက်အရေအတွက်သတ်မှတ်ပြည့်မီအောင်မပေးနိုင်ပါက ရဲ၊ စစ်ကောင်စီအဖွဲ့၊ မြို့နယ်များသို့ ငွေပေးရခြင်းဖြစ်ပြီး လိုအပ်နေသည့်အရေအတွက်ပြည့်မီရေးအတွက် ပေါ်တာဆွဲ ဖမ်းဆီးကာ အင်အားဖြည့်ခြင်းဖြစ်သည်။
ထိုသို့သော အကျင့်ပျက်ခြစားခြင်းများကို အာဏာသိမ်းစစ်ခေါင်းဆောင်ဦးစီးသည့် စစ်ကောင်စီဗဟိုကသိသော်လည်း အမိန့်နာခံရေး၊ အုပ်ချုပ်မှုကောင်းမွန်စေရေး အတွက်လက်လျှုရှုထားခြင်းဖြစ်သည်။
မဟာ
