မိုင်းဆတ်အခြေစိုက် စကခ(၁၄) မှ စစ်သုံ့ပန်းမိသားစုများ ခံစားခွင့် ဖြတ်တောက်ခံရ
မဲခေါင်၊ ဖေဖော်ဝါရီ ၁၃
လားရှိုးမြို့သိမ်းတိုက်ပွဲ၌ ကိုးကန့်တပ်မှ စစ်သုံ့ပန်းအဖြစ် ဖမ်းဆီးထားသည့် ရှမ်းပြည်အရှေ့ပိုင်း၊ မိုင်းဆတ်မြို့အခြေစိုက်အမှတ်(၁၄) စစ်ဆင်ရေးကွပ်ကဲမှုဌာနချုပ်မှ စစ်သည်များ၏ မိသားစုဝင်များ ယခုလမှစတင်ကာ ခံစားခွင့် ဖြတ်တောက်ခံရကြရသည်။
စကခ(၁၄)မှ စစ်သည်များ စစ်သုံ့ပန်းအဖြစ် ဖမ်းဆီးခံရသည်မှာ ၆ လပြည့်ပြီးဖြစ်ရာ ၎င်းတို့၏ ယခုနှစ်၊ ဇန်နဝါရီလ လစာကိုသာ နောက်ဆုံးထုတ်ပေးခြင်းဖြစ်ပြီး ယခုလ မှစတင်ကာ လစာထုတ်ပေးမည်မဟုတ်ကြောင်းနှင့် မှီခိုများအတွက်ထောက်ပံ့သည် ဆန်ဆီများကိုလည်း ဆက်လက်ထုတ်ပေးမည်မဟုတ်ကြောင်းနှင့် ထုတ်ယူပြီးပါကလည်း တန်ကြေးငွေပြန်လည်ပေးသွင်းရမည်ဟု ဌာနချုပ် တပ်ခွဲမှူးက မိသားစုဝင်များကို ခေါ်ပြောသည်ဟု မိသားစုဝင်တစ်ဦးကပြောသည်။
“ ဘယ်ကမှ ဝင်ငွေမရှိတဲ့အပြင် ယောက်ျားလစာလည်းမရ၊ ရိက္ခာလည်းမရတော့ ကျွန်မတို့ဘာနဲ့သွားစားရမလဲ မသိတော့ပါဘူး၊ ဒီလိုလုပ်တာဟာတပ်ထဲမနေနိုင်အောင် တစ်ဖက်လှည့်နဲ့မောင်းထုတ်နေတာရှင့်” ဟု မိသားစုဝင်တစ်ဦးကပြောသည်။
ခံစားခွင့်များမပေးသော်လည်း တပ်တွင်းလိုင်းခန်း၌ နေထိုင်စဉ်ကာလအတွင်း တခြားသော မိသားစုဝင်များနှင့်တန်းတူ ဖက်ထိပ်(လုပ်အားပေး)ရမည်ဟုလည်း ပြောသည်ဟု ဆိုသည်။
တိုက်ပွဲ၌ ပျောက်ဆုံးသူများကို ၆လအကြာတွင် သေစာရင်းသွင်းကာ မည်သည့်ထောက်ပံ့မှု၊ ရပိုင်ခွင့်မျှမပေးသည့်အပြင် ဘဏ်စုငွေများကိုလည်း ထုတ်ယူခွင့်မပြုပဲ တပ်မှမောင်းထုတ်နေသည်ဟု ပြောပါသည်။
“တပ်က သင်တန်းတွေလည်းတက်ရ၊ ကင်းလည်းစောင့်ရ၊ ဖက်ထိပ်လည်းလုပ်ရတာတွေအပြင် ဆရာကြီးကတော်၊ အရာရှိကတော်တွေ ငြိုငြင်မှာလည်းကြောက်ရနဲ့ ကျွန်ဝယ်ရာ အစစ်ပါ၊ ကျွန်မတို့ဘဝတွေမှာ လင်သေ ဘာမှမရှိ၊ ကလေးတွေနဲ့အားကိုးရာမဲ့ဘဝတွေပါ” ဟု မိုင်းဆတ်မြို့အခြေစိုက် တပ်ရင်းတစ်ရင်းမှ တိုက်ပွဲကျ စစ်သားတစ်ဦး၏ဇနီးကပြောသည်။
ထိုအမျိုးသမီးသည် စစ်ကောင်စီက မီးရှို့ခဲ့သည့် စစ်ကိုင်းတိုင်းအတွင်းရှိ ကျေးရွာတစ်ရွာမှဖြစ်ပြီး စစ်ကောင်စီစစ်သည်၏ ဇနီးမယားဖြစ်သောကြောင့် ရပ်ရွာက မကြည်ဖြူမှာကိုသိသဖြင့် မပြန်ရဲကြောင်း၊ အတန်းပညာနည်းပါးသည့်အပြင် အတတ်ပညာမရှိခြင်း၊ တခြားဒေသများကိုလည်းမသွားတတ်သူဖြစ်ခြင်းကြောင့် မိုင်းဆတ်တွင်သာ ရရာအလုပ်လုပ်ပြီးနေထိုင်ရမည်ဟုပြောသည်။
မဟာ
#MeKongNews
