မဲခေါင်၊ ဇန်နဝါရီ ၂၈
ရှမ်းပြည်အရှေ့ပိုင်း၊ တာချီလိတ်မြို့နယ်၊ မိုင်းကိုးကျေးရွာအုပ်စု၊ ပန်ဟတ်ကျေးရွာအခြေစိုက် အထက မိုင်းကိုးကျောင်းမှာ ကျောင်းသူ၊ ကျောင်းသားတွေထံက တစ်ဦးကို ၁၀ ဘတ်(ကျပ် ၁၃၀၀)လစဉ်တောင်းခံနေတယ်လို့ ကျောင်းသားမိဘတွေက ပြောပါတယ်။
ပညာရေးဋ္ဌာနက ခွင့်ပြုထားတာမျိုးမရှိပဲ ရေနဲ့မီးအတွက်ဆိုပြီး ကျောင်းအုပ်ဆရာမကြီးဒေါ်လှလှမိုးကိုယ်တိုင် ကောက်ခံနေတာလို့ ပြောပါတယ်။
“ကလေးတွေက မိဘတွေဆီမှာ မတောင်းရဲသလို ကျောင်းကိုလည်း ကြောက်ရတော့ သူတို့လေးတွေရတဲ့ မုန့်ဖိုးထဲက ပေးနေကြတယ်” လို့ ကျောင်းသားမိဘတစ်ဦးက ပြောပါတယ်။
ကျောင်းသူ၊ ကျောင်းသားတွေ လစဉ်ငွေကြေးပေးသွင်းကြပေမယ့် ကျောင်းသုံး အိမ်သာတွေ သုံးမရအောင် ပျက်စီးယိုယွင်းနေသလို ရေလည်း မရှိတာကြောင့် ကလေးတွေက ကျောင်းအိမ်သာကို ရှက်လို့ မတက်ကြပဲ အောင့်အီး ကြိတ်မှိတ်နေကြတယ်လို့ ပြောပါတယ်။
“ ကလေးတွေရဲ့ ကျန်းမာရေးနဲ့ အရှက်ကိုလျစ်လျူရှုထားပြီး ငွေရရှိရေးကိုသာ ရှေးရှုဆောင်ရွက်နေတယ်” လို့ ကျောင်းသားမိဘတစ်ဦးက ပြောပါတယ်။
ရေစက်ပျက်တဲ့အခါမှာလည်းကျောင်းသူ၊ ကျောင်းသားတွေဆီက ငွေကောက်နေတာ၊ ရေနဲ့မီးအတွက်ဆိုပြီးငွေကောက်နေတာရှိပေမယ့် အိမ်သာရေမရှိတာ၊ အိမ်သာမပြုပြင်တာတွေကို အထက်ကသိစေချင်တယ်လို့ ကျောင်းသားမိဘတွေကဆန္ဒရှိကြပါတယ်။
အခမဲ့ပညာရေးစနစ်မှာ တာချီလိတ်မြို့ပေါ်က အခြားကျောင်းတွေက ကလေးတွေနည်းတူ တန်းတူအခွင့်အရေးရရှိပြီး စိတ်ဓာတ်ရေးရာနဲ့ ကျန်းမာရေး ကောင်းမွန်စေဖို့ ကျောင်းအုပ်ဆရာမကြီးအနေနဲ့ လုပ်ဆောင်ပေးစေချင်တယ်လို့ ကျောင်းသားမိဘတစ်ဦးကပြောပါတယ်။
မဲခေါင်အနေနဲ့ ဖြစ်စဉ်နဲ့ပတ်သက်ပြီး ကျောင်းဘက်က ဖြေရှင်းပြောဆိုခွင့်အတွက် အဲ့ဒီကျောင်းမှာတာဝန်ထမ်းဆောင်နေတဲ့ NON CDM ဝန်ထမ်းတစ်ဦးကို ဆက်သွယ်ပေမယ့် ပြန်လည်ဖြေကြားတာ မရှိသလို ကျောင်းအုပ်ကိုလည်း ဆက်သွယ်ခွင့်မရပါဘူး။
တာချီလိတ်မြို့နယ်မှာ အခြေခံပညာအထက်တန်းကျောင်း (အထက) ၆ ကျောင်းရှိပြီးအခု မိုင်းကိုး အထက မှာ အခု ၂၀၂၄-၂၀၂၅ ပညာသင်နှစ်အတွင်း ကျောင်းသား ကျောင်းသူ ၈၀၀ ကျော် ရှိနေတယ်လို့ သိရပါတယ်။
MK-012
#MeKongNews
# တာချီလိတ်မြို့နယ်
#ပန်ဟတ်ကျေးရွာ
#အထကမိုင်းကိုး
#လစဉ်ကြေး
