စစ်ရှောင်တွေအားထားရတဲ့ မူကယန်းဆေးခန်းမှာ ဆေးဝါး ပြတ်လပ်နေ
မဲခေါင်၊ ဇန်နဝါရီ ၂၂
ကရင်နီပြည်၊ ဒီးမော့ဆိုအနောက်ဘက်ခြမ်းမှာ စစ်ဘေးရှောင်နေကြတဲ့ ပြည်သူတွေနဲ့ ဒေသခံတွေကို အခမဲ့ ဆေးကုသပေးနေတဲ့ မူကယန်းဆေးခန်းမှာ ဆေးဝါးတွေ လိုအပ်နေတယ်လို့ ဆေးခန်းတာဝန်ရှိသူတစ်ဦးက ဇန်နဝါရီလ ၂၁ ရက်က ပြောပါတယ်။
အာဏာသိမ်းပြီးစ ၂၀၂၁ ကနေ၂၀၂၃ခုနှစ်အထိ နာတာရှည်လူနာတွေအတွက် ရက် ၂၀ စာ သောက်ဆေးပေးပြီး ရက်ချိန်းပြုလုပ်နိုင်ပေမယ့် ၂၀၂၄ ခုနှစ်ကနေ အခုထိ ဆေးဝါးတွေ ကူညီထောက်ပံ့နိုင်ခြင်းမရှိတော့ပဲ ပြင်ပက ဆေးဆိုင်တွေမှာ ဝယ်ခိုင်းရတာတွေရှိနေပါတယ်။
ဒီအပြင် အရေးပေါ်အခြေအနေအရ လူနာတွေကို ဆေးရုံ လွှဲပြောင်းပေးဖို့လိုအပ်ချိန်မှာလည်း ကားရှိပေမယ့် ဓာတ်ဆီလုံလောက်မှုမရှိတာတွေ ကြုံတွေ့နေရပါတယ်။
“ အရင်တုန်းက အလှူရှင်တွေချိတ်ဆက်ပြီးတော့မှ ဆေးဝါးတွေကူပေးနိုင်တယ်ဆိုပေမယ့် အခုစစ်ရှောင်နေ ကာလကလည်း ကြာလာတာနဲ့အမျှ အခြေခံ ဆေးဝါးတွေလည်း အပြင်မှာပဲ ဝယ်ခိုင်းနေရတာတွေရှိတယ်၊ အခု ဆေးဝါးမစုံတော့ လူနာပါးလာသလိုရှိတယ် “လို့ မူကယန်းဆေးခန်း တာဝန်ခံဆရာမက ပြောပါတယ်။
လက်ရှိမှာရာသီတုပ်ကွေးတွေ အဖြစ်များနေပြီး နာတာရှည်ရောဂါ လာပြတဲ့လူနာ ပိုများလာတယ်လို့ တာဝန်ခံဆရာမကပြောပါတယ်။
၂၀၂၂ ခုနှစ်ထဲမှာ တစ်လကို လူနာ ၈၀၀ ကနေ ၁၀၀၀ ကြား၊ ၂၀၂၃ ခုနှစ်မှာ ၉၀၀ ကနေ ၁၀၀၀ ကြား၊ ၂၀၂၄ ခုနှစ်မှာ ၅၀၀ ကနေ ၆၀၀ ကြား စစ်ဘေးရှောင်ပြည်သူတွေကို ဆေးဝါးကုသပေးနေပြီး ကိုယ်ဝန်သည်မိခင်တွေ အရေးပေါ် ကလေးမီးဖွားတာတွေကိုလည်း ဆောင်ရွက်ပေးနေပါတယ်။
မူကယန်းဆေးခန်းက ဒီးမော့ဆို အနောက်ဘက်ခြမ်းတနေရာမှာ ၂၀၂၁ ခုနှစ် သြဂုတ်လ ၈ ရက်ကစပြီး စစ်ဘေးရှောင်ပြည်သူတွေကို အခမဲ့ကုသပေးနေတဲ့အဖွဲ့ဖြစ်ပါတယ်။
ဒီးမော့ဆိုအနောက်ခြမ်းနဲ့ ဖယ်ခုံနယ်စပ်က စစ်ဘေးရှောင်ပြည်သူ အရေအတွက် တစ်သိန်းနီးပါးအထိရှိနေပါတယ်။
CJ-004
#MeKongNews
