စစ်ကောင်စီနဲ့ ရဲက လိုင်းကြေး သိန်းဆယ်ချီ ရယူ ခွင့်ပြုထားတဲ့ ကြက်တိုက်လောင်းကစားဝိုင်း ပင်လုံမှာ စည်ကားနေ
မဲခေါင်၊ ဇန်နဝါရီ ၁၅
ရှမ်းပြည်နယ်တောင်ပိုင်း၊ လွိုင်လင်ခရိုင်၊ လွိုင်လင်မြို့နယ်၊ ပင်လုံမြို့မှာ ပြီးခဲ့တဲ့ နှစ်သစ်ကူးကာလ မတိုင်ခင်ကတည်းက စစ်တပ်နဲ့ ရဲက လိုင်းကြေးငွေ သိန်းဆယ်ချီရယူပြီး ကြက်ဝိုင်းတွေကို ဖွင့်လှစ်ခွင့် ပေးထားတယ်လို့ ဒေသခံတွေထံက သိရပါတယ်။
ကြက်ဝိုင်း ဖွင့်လှစ်နိုင်ဖို့အတွက် ပင်လုံမြို့ခံတစ်ဦးနဲ့ လားရှိုးကနေ ပင်လုံကို ပြောင်းရွေ့လာသူ တစ်ဦးက ပင်လုံမြို့ရဲတပ်ဖွဲ့ကို ကျပ် ၁၀သိန်း၊ ရဲတပ်ဖွဲ့ကနေတဆင့် စစ်ကောင်စီကို တစ်လ ကျပ်သိန်း ၃၀ ပေးဆောင်ကာ ဖွင့်လှစ်နေတာ ဖြစ်တယ်လို့လည်း သိရပါတယ်။
ပင်လုံမြို့၊ တန့်အယ်ကျေးရွာနဲ့ နောင်လိုင်ကျေးရွာဖက်မှာ ကြက်ဝိုင်းတွေကို ပြီးခဲ့တဲ့ ၂၀၂၄ ခုနှစ်၊ ဒီဇင်ဘာလ နောက်ဆုံးပါတ်က စတင်ကာ ခွင့်ပြုပေးထားတာ ဖြစ်ပြီး ဒီနေ့ထိ လာရောက်ဆော့ကစားသူ၊ လည်ပတ်သူ၊ အရက်ဘီယာနဲ့ အစားအသောက်ရောင်းချသူတွေနဲ့ စည်ကားနေတယ်လို့ သိရပါတယ်။
ကြက်လာတိုက်သူ တစ်ရက်ကို ၃၀ ကျော်ရှိကာ လာရောက်ကြည့်ရှု့သူ၊ ဈေးရောင်းချသူတွေနဲ့ ပွဲလုပ်နေတယ် ထင်ရလောက်အောင် စည်ကားနေတယ်လို့ ဒေသခံက ပြောပါတယ်။
“ ရန်ဖြစ်တာ၊ စကားများကြတာလည်း ခဏခဏတွေ့ရတယ်”လို့ ဒေသခံတစ်ဦးက မဲခေါင်သတင်းဌာနကို ပြောပါတယ်။
ကြက်ဝိုင်းကို တောင်ကြီး နဲ့ လားရှိုးဖက်ကနေ ပြောင်းလာတဲ့ စစ်ရှောင်တွေထဲက အများဆုံးလာ တိုက်ကြတာဖြစ်ပြီး တစ်ဝိုင်းကို သိန်းဆယ်ချီ လောင်းကြေးထွက်တယ်လို့ဒေသခံက ပြောပါတယ်။
“ဆိုးကျိုးက ဘာဖြစ်လာလဲဆိုတော့ ရွာဖက်နဲ့ နီးစပ်ရာမှာ ဆိုင်ကယ်တွေ၊ ပစ္စည်းတွေ ခဏခဏပျောက်လာတယ်”လို့လည်း နောင်လိုင်ရွာခံတစ်ဦးက မဲခေါင်သတင်းဌာနကို ပြောပါတယ်။
စစ်ကောင်စီတပ် ၊ ရဲတပ်ဖွဲ့အနေနဲ့ အာဏာသိမ်းပြီးချိန်မှ စတင်ပြီး ဒီကနေ့ထိ နိုင်ငံရေး၊ တော်လှန်ရေး လုပ်ကိုင်သူတွေ၊ ဆက်စပ်ပါတ်သက်သူတွေကို အပူတပြင်းလိုက်လံရှာဖွေ နေပေမယ့် လောင်းကစားဝိုင်းတွေကို လောင်းကြေးရယူပြီး ဖွင့်လှစ်ခွင့်ပြုထားသလို ခိုးဆိုးလုနှိုက်တွေကိုလည်း မျက်ကွယ်ပြုထားလေ့ ရှိပါတယ်။
CJ-003
#MeKongNews
ဓါတ်ပုံ။ ကြက်ဝိုင်းကြည့်ရှုနေသူတွေ။ ဒေသခံပေးပို့။
