စစ်ရှုံးနေတဲ့ စစ်ကောင်စီက ရေဘေးသင့်အတွက် အလှူငွေ ကျပ် ၁၁ ဒဿမ ၉၇ ဘီလီယံကျော်ရရှိထားပေမယ့် အင်းလေးဒေသ ပြန်လည်ထူထောင်ရေး ခုထိမလုပ်နိုင်
မဲခေါင်၊ ဇန်နဝါရီ ၁၃
ရေဘေးသင့်အတွက် အလှူငွေ ကျပ် ၁၁ ဒဿမ ၉၇ ဘီလီယံကျော်ရရှိထားတဲ့ စစ်ကောင်စီက ၆ လအတွင်း ပြန်လည်ထူထောင်ရေး အပြီးလုပ်မယ် ကြေညာထားပေမယ့် ၄ လကျော်တဲ့အထိ အင်းလေးဒေသခံတွေ အထောက်အပံ့မရသေးဘူးလို့ ဒေသခံတွေက ပြောပါတယ်။
စစ်ရှုံးနေတာကြောင့် ပြည်သူအတွက် ပြုလုပ်ပေးဖို့ အစီအစဉ်မရှိဘူးလို့ အမျိုးသားညီညွှတ်ရေးအစိုးရရဲ့ ကာကွယ်ရေးဝန်ကြီးချုပ်ရုံး၊ ပြောခွင့်ရပုဂ္ဂိုလ် ဦးနေဘုန်းလတ်က ပြောပါတယ်။
ရေကြီးရေလျှံဖြစ်စဉ်ကြောင့် ရေဘေးသင့်ကူညီကယ်ဆယ်ရေးနဲ့ ပြန်လည်ထူထောင်ရေးကို ၆ လအတွင်းအပြီးလုပ်ဆောင်မယ်လို့ ၂၀၂၄ ၊ စက်တင်ဘာလ ၂၁ ရက်၊ နေပြည်တော် မြို့တော်ခန်းမမှာ စစ်ကောင်စီ အကြီးအကဲကိုယ်တိုင်ပြောခဲ့ပေမယ့် ပြည်တွင်း ပြည်ပကအလှူငွေတွေ အင်းလေးဒေသရေဘေးသင့်တွေအတွက် စစ်ကောင်စီကတဆင့် ဘာအကူအညီမှ ခုထိမရဘူးလို့ရေဘေးသင့်တွေက ပြောပါတယ်။
ငွေလိုအပ်နေတဲ့ စစ်ကောင်စီက ဘယ်ကနေငွေရရ ရသမျှငွေကို စစ်အသုံးစရိတ်အတွက် အသုံးပြုနေတာဖြစ်ပြီး ဆက်လက်ပြီးတော့လည်း စစ်အသုံးစရိတ်ကိုတိုးမြှင့်သွားမှာဖြစ်လို့ ပြည်သူအတွက် ဘာတစ်ခုမှအသုံးပြုမှာမဟုတ်ဘူးလို့ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးချုပ်ရုံးပြောခွင့်ရပုဂ္ဂိုလ် ဦးနေဘုန်းလတ်ကပြောပါတယ်။
” စစ်အကြီးအကျယ်ရှုံးနေတော့ ဘက်ဂျက်တွေကိုတခြားနေရာအတွက်မသုံးပဲနဲ့ ဒီစစ်ရေးအတွက်ပဲ အဓိက သုံးတယ်ဆိုတာကို သူတို့ရဲတရားဝင်ဖော်ပြတဲ့ဘက်ဂျက်ဇယားတွေမှာ ကျနော်တို့တွေ့ရတယ်လေနော်၊ အဲ့တော့ဒီတိုင်းပဲဆက်သွားမယ့်သဘောပဲ” လို့ဦးနေဘုန်းလတ်က ပြောပါတယ်။
ရေဘေးသင့် ကူညီကယ်ဆယ်ရေးနဲ့ ပြန်လည်ထူထောင်ရေးအတွက် ပထမအကြိမ်မှာ ကျပ် ၃၂ ဘီလီယံ ကျော်နဲ့ ဒုတိယအကြိမ်မှာ ကျပ် ၁၀ ဘီလီယံကျော် ရရှိခဲ့တယ်လို့ ၂၀၂၄ခုနှစ်၊ အောက်တိုဘာ ၉ ရက်က ရန်ကုန်တိုင်းဒေသကြီး အစိုးရအဖွဲ့ရုံး၊ မင်္ဂလာခန်းမမှာ ကျင်းပတဲ့ ရေဘေးသင့်ဒေသကူညီကယ်ဆယ်ရေး နဲ့ ပြန်လည်ထူထောင်ရေးအတွက် တတိယအကြိမ်လှူဒါန်းငွေလက်ခံပွဲမှာ စစ်ကောင်စီခေါင်းဆောင်က ပြောတာပါ။
ရန်ကုန်တိုင်းရုံးမှာပြုလုပ်တဲ့ တတိယအကြိမ် ပေးအပ်လှူဒါန်းပွဲမှာရရှိတဲ့ ပြန်လည်ထူထောင် ရေး ပစ္စည်းတွေနဲ့ အလှူငွေ အပါအဝင် ပထမ၊ ဒုတိယ၊ တတိယအကြိမ် စုစုပေါင်းဟာ ကျပ် ၁၁ ဒသမ ၉၇ ဘီလီယံကျော် လက်ခံရရှိခဲ့တယ်လို့ ONE NEWS မီဒီယာကဖေါ်ပြထားပါတယ်။
လက်ရှိမြန်မာနိုင်ငံရဲ့အခြေအနေဟာ စစ်ကောင်စီအဖွဲ့အပါအဝင် ဌာနဆိုင်ရာအားလုံး အကျင့်ပျက်ခြစားနေတာဖြစ်လို့ ရရှိတဲ့ငွေတွေကို တခြားဘက်လှည့်သုံးမှာပဲလို့ CDM စစ်သား တပ်ကြပ်ကြီးစာရေးကိုဇေယျက ပြောပါတယ်။
သူက “စစ်တပ်ကအုပ်ချုပ်နေတဲ့အချိန်ဆိုတော့ ဒါမျိုးဖြစ်တာက မဆန်းဘူးလို့မြင်တယ် ၊ ခုချိန်က ရှုပ်ယှက်ခတ်နေတဲ့အချိန်ဆိုတော့ပိုဆိုးတယ်၊ အကုန်လုံးကအကျင့်ပျက်ချစားပြီးတိုင်းပြည်က ဖရိုဖရဲဖြစ်နေတဲ့အချိန်၊ ဒေါ်လာနဲ့ရတယ်ဆိုရင်ပိုဆိုးတယ်”လို့ပြောပါတယ်။
အင်းလေးဒေသ ရေဘေးသင့်ပြန်လည်လည် ထူထောင်ရေးအတွက် အရပ်ဘက်အဖွဲ့အစည်းက နှစ်ကြိမ်အကူအညီရရှိခဲ့ပေမယ့် ခေတ်ကာလ ကျပ်ငွေတန်ဖိုးကျဆင်းနေတာရယ်၊ ကုန်ဈေးနှုန်းမြင့်မားနေတာရယ်၊ အလုပ်အကိုင်ရှားပါးနေတာရယ်ကြောင့် ရရှိတဲ့ငွေဟာ ပြန်လည်ထူထောင်ရေးအတွက် လုံလောက်မှုမရှိပဲ ခုချိန်မှာစားရေး၊ ဝတ်ရေး၊ နေရေးတွေမှာ အကြပ်အတည်းနဲ့ရင်ဆိုင်နေရတယ်လို့သိရပါတယ်။
၂၀၂၄ခုနှစ်၊ မိုးရာသီမှာ ကျရောက်တဲ့ ရာဂီမုန်တိုင်းအရှိန်ကြောင့် မြန်မာနိုင်ငံတဝှမ်းလုံး ရေကြီးရေလျှံဖြစ်ပေါ်ခဲ့ရာမှာ အင်းလေးဒေသလည်းပါဝင်ခဲ့ပါတယ်။ အင်းလေးဒေသမှာ အခု ရေကြီးရေလျှံခြင်းဟာ နှစ်ပေါင်း ၃၀ အတွင်းအဆိုးဝါးဆုံးလို့ RFA က အခုနှစ်၊ ဇန်နဝါရီ ၁၀ ရက်မှာသတင်းဖေါ်ပြထားပါတယ်။
ရေကြီး ရေလျှံဖြစ်စဉ်ကြောင့် အင်းလေဒေသမှာ ပြည်သူတွေ အိုးအိမ်တွေပြိုကျပျက်စီးသွားတဲ့အပြင် ဝင်ငွေအတွက်မှီခိုအားထားရတဲ့ ကျွန်းမျှောစိုက်ခင်းတွေလည်းပျက်စီးသွားတာဖြစ်ပါတယ်။ ပြန်လည်ထူထောင်ရေးအတွက် ကူညီထောက်ပံ့သူ နည်းပါးလွန်းတာရယ်၊ အလုပ်အကိုင်လည်းရှားပါးလွန်းတာရယ်ကြောင့် ခုအခါမှာ စားနပ်ရိက္ခာ၊ ဆေးဝါး၊ အဝတ်အထည်နဲ့ လူသုံးကုန်အမျိုးမျိုးလိုအပ်လျက်ရှိတယ်လို့ သိရပါတယ်။
“ အလုပ်ဆိုလည်း သိပ်မခေါ်တော့ဘူး၊ နေ့စားလိုက်ရင်လည်း အရင်ကဈေးအတိုင်းမရတော့ဘူး ၊ ရေကြီးဒဏ် ကြုံကြရတော့ သူသူငါငါ အခက်အခဲဖြစ်ကြကုန်တယ်၊ ကိုယ့်ကိုယ်ကိုလည်း ပြန်လည်ထူထောင်ရေးလည်းလုပ်ရ ၊ကုန်ဈေးနှုန်းကလည်း မြှင့်တက်နဲ့ဆိုတော့ စားဖို့သောက်ဖို့ တော်တော်လေး ရုန်းကန်ရတဲ့အခြေအနေ မှာရှိနေတယ်” လို အင်းလေးဒေသခံတစ်ဦးက ပြောပါတယ်။
အင်းလေးဒေသမှာ ရေကြီးပြီးတာ ၄လ ကျော်ပြီဖြစ်ပေမယ့် ဒေသခံတော်တော်များများဟာ စိုက်ပျိုးရေးပြန်လုပ်ဖို့နဲ့ စားဝတ်နေရေး ပုံမှန်ပြန်လည်လည်ပတ်ဖို အများကြီးခက်ခဲနေသေးတယ်လိုလည်း သိရပါတယ်။
၂၀၂၄ခုနှစ်၊ စက်တင်ဘာ ၇ ရက်က ဗီယက်နမ်နိုင်ငံကို တစ်နာရီ မိုင် ၁၃၀ နဲ့ ဝင်ရောက်တိုက်ခတ်ခဲ့တဲ့ ရာဂီတိုင်ဖွန်းမုန်တိုင်းအရှိန်ကြောင့် အကြွင်းကျန်မိုးသားတိမ်တိုက်တွေဟာ အိမ်နီးချင်း ကမ္ဘောဒီးယားနိုင်ငံ၊ ထိုင်းနိုင်ငံ၊ လာအိုနိုင်ငံနဲ့ မြန်မာနိုင်ငံအထိ အဆင့်ဆင့်ရောက်ရှိပြီး စံချိန်တင် မိုးရွာသွန်းခဲ့ပါတယ်။
မြန်မာနိုင်ငံကို ကြွင်းကျန်မိုးသားတိမ်တိုက်တွေ ရောက်ရှိချိန်မှာ ဘင်္ဂလားပင်လယ်အော်နဲ့ အိန္ဒိယနိုင်ငံအစပ်မှာလည်း စက်တင်ဘာ ၉ ရက် နဲ့ ၁၀ ရက်တွေမှာ အားကောင်းတဲ့ လေဖိအားနည်းရပ်ဝန်းတစ်ခခုဖြစ်ပွါးခဲ့တာကြောင့် စက်တင်ဘာ ၁၁ ရက်နဲ့ ၁၂ ရက်မှာ မိုးရွာသွန်းမှု ပိုမိုများပြားခဲ့ပါတယ်။ အဲ့ဒီမိုးကြောင့် မြန်မာနိုင်ငံတဝှမ်း ရေကြီးရေလျှံဖြစ်ပေါ်တာ၊ မြေပြိုတာတွေဖြစ်ပွါးခဲ့တာပါ။
MK-016/ CJ-018
#MeKongNews
