ဖျားနာနေတဲ့ မင်းပလောင်ရွာ စစ်ရှောင်ကလေးတွေအတွက် ဆေးဝါးအကူအညီလိုအပ်နေ
မဲခေါင်၊ ဇန်နဝါရီ ၂
တစ်ရွာလုံး မီးရှို့ခံရတဲ့ ရှမ်းပြည်တောင်ပိုင်း၊ ရွာငံမြို့နယ်၊ မင်းပလောင်ကျေးရွာမှ စစ်ရှောင်ကလေးငယ်အများစု ဖျားနာနေတာမို့ ဆေးဝါးအကူအညီနဲ့ စစ်ရှောင်အားလုံးလည်း အခြားအကူအညီတွေ အရေးတကြီး လိုအပ်နေတယ်လို့ ဓနုပြည်နယ် အမျိုးသားကာကွယ်ရေးတပ်မတော် DSNDA သတင်းနဲ့ ပြန်ကြားရေးက ဇန်နဝါရီ ၁ ရက်မှာ မဲခေါင်ကို ပြောပါတယ်။
ပြီးခဲ့တဲ့ ၂၀၂၄ ခုနှစ်၊ ဒီဇင်ဘာ ၂၂ ရက်နဲ့ ၂၃ ရက်မှာ စစ်ကောင်စီက ရွာလုံးကျွတ် မီးရှို့ဖျက်ဆီးခဲ့တာကြောင့် နေအိမ်နဲ့ပစ္စည်း ဆုံးရှုံးခဲ့ရတဲ့ ဒေသခံ စစ်ရှောင် ပြည်သူတွေမှာ ရိက္ခာ၊ ဆေးဝါး၊ စောင်နဲ့ အနွေးထည်မလုံလောက်မှုတွေ ကြုံတွေ့နေရပြီး ကလေးငယ်တွေမှာ ဖျားနာတဲ့ဒဏ်ကို ခံစားနေကြရတာပါ။
“ ဖျားနာမှုတွေ ရှိနေတယ်ဗျ၊ ကလေးငယ် တွေပေါ့၊ လိုအပ်တာဖြည့်ဆည်းပေနေပေမယ့် ကျွန်တော်တို့နဲ့လည်း မလုံလောက် နိုင်ဘူး၊ စစ်ရှောင်တွေအတွက် လိုအပ်လျက်ရှိဆဲဖြစ်တယ်၊ ပြည်သူလူထုအနေနဲ့ ဝိုင်း ၀န်းကူညီပေးကြပါ” လို့ DSNDA သတင်းနဲ့ ပြန်ကြားရေးတာ၀န်ရှိသူ ကိုကျားပျံက ပြောပါတယ်။
လက်ရှိ မြေပြင်မှာ စစ်ကောင်စီနဲ့ DSNDA တို့ ထိတွေ့တိုက်ပွဲဖြစ်ပွားတာ မရှိသေးလို့ မင်းပလောင်ရွာ ပြန်လည်နေရာချထားရေးနဲ့ ပြန်လည်တည်ဆောက်ရေးအတွက် ကြိုးစားဆောင်ရွက်နေတယ်လို့ ဆိုပါတယ်။
မင်းပလောင်ကျေးရွာမှာ ရွာငံမြို့နဲ့ မိုင် (၄၀) ကျော်ကွာဝေးပြီး လမ်းပန်းဆက်သွယ်ရေးခက်ခဲတဲ့ ဒေသဖြစ်ပါတယ်။ ကျေးရွာရှိ လူနေအိမ် ၁၇၀ ကျော်ခန့်ဟာ စစ်ကောင်စီ စစ်ကြောင်းရဲ့မီးရှို့တာကိုခံခဲ့ရပြီးနောက် ကျေးရွာနေထိုင်သူ ၇၀၀ ကျော် အိုးမဲ့ အိမ်မဲ့အဖြစ်နဲ့ တောတောင်တွေထဲ မှာ စစ်ရှောင်နေကြရတာပါ။
ဓနုပြည်နယ် အမျိုးသားကာကွယ်ရေးတပ်မတော် DSNDA/DSNDF ဟာ ပြီးခဲ့တဲ့ ၂၀၂၄ ခုနှစ် နို၀င်ဘာ ၁၁ ရက်မှာ ဖွဲ့စည်းမှု တစ်နှစ်ပြည့်မြောက်ခဲ့တာဖြစ်ပြီး စစ်အာဏာရှင်လက်အောက်က ပြည်သူတွေလွတ်မြောက်ဖို့ ရွာငံ၊ ပင်းတယဘက်မှာ တိုက်ပွဲ၀င်နေတဲ့ တိုင်းရင်းသားတပ်ဖွဲ့တစ်ခုဖြစ်ပါတယ်။
CJ-017
#MekongNews
