မိုင်းလားနဲ့ ဝ နယ်မှာ ကြံခုတ်လုပ်သားတွေ လုပ်အားခပြဿနာတွေ ဖြစ်ပေါ်နေ
မဲခေါင် ၊ ဒီဇင်ဘာ ၃၀
ရှမ်းပြည်အရှေ့ပိုင်း၊ မိုင်းလားမြို့၊ အထူးဒေသ (၄)နဲ့ ‘ဝ’ နယ်အထူးဒေသ(၂)ဖြစ်တဲ့ ဆီလူး ၊ မိုင်းဖျန့် ၊ မိုင်းယမ်း ဘက်မှာ ကြံခုတ်လုပ်သားတွေရဲ့ လုပ်အားခခေါင်းပုံဖြတ်ခံရတာနဲ့ လုပ်သားခေါ်ယူစဉ်ကပြောတဲ့ လုပ်ခပမာဏအပြည့်မရတဲ့ ပြဿနာတွေရှိနေတယ်လို့ လုပ်သားတွေထံက သိရပါတယ်။
မိုင်းလားမှာ ကြံခုတ်လုပ်သား ခေါ်ယူစဉ်က တစ်ဦးကို စရိတ်ငြိမ်းတစ်ရက် လုပ်အားခ ယွမ် ၁၀၀ ကနေ ၂၀၀ အကြား (ကျပ်ငွေ ခြောက်သောင်းကနေ တစ်သိန်းခွဲဝန်းကျင်) ရနိုင်မယ်လို့ပြောပေမယ့် လက်တွေ့လုပ်ငန်းခွင်မှာ ကြံ ၁၁ ချောင်းခုတ်ပြီး စည်းပြီး တစ်စည်းကားပေါ်တင်တဲ့အထိ ၇ ကျော့ကို တစ်ယွမ်ပေးပါတယ်။ လုပ်သားတစ်ဦး တစ်ရက်ကို အစည်း ၅၀ ခန့် ကားတင်အကျော့ ၃၅၀ သာခုတ်နိုင်တာဖြစ်လို့ တစ်ရက်လုပ်အားခ ၃၅ ယွမ်သာရရှိပြီး လုပ်ငန်းကျွမ်းကျင်သူ ဖြစ်ရင်တောင် တစ်ရက်ကို ယွမ် ၅၀ သာရရှိတယ်လို့ သိရပါတယ်။
ပန်ဆန်းဘက်မှာ ကြံအချောင်း ၃၀ ပါတစ်စဉ်းကို နှစ်ယွမ်ခွဲနှုန်းနဲ့ လုပ်သားတစ်ဦး တစ်ရက်အကျော့ ၃၀ အတွက်သာ ခုတ်နိုင်တာကြောင့် တစ်ရက်ကို ၇၅ ယွမ်သာရရှိကြပါတယ်။
စရိတ်ငြိမ်းဆိုပေမယ့် ဆန်၊ ဆီသာထုတ်ပေးပြီး လုပ်သားအစီအစဉ်နဲ့သာ ချက်ပြုတ်စားသောက်ရသလို တောထဲမှာ မိမိအစီအစဉ်နဲ့ မိမိ တဲထိုးနေထိုင်ကြရတယ်လို့ ဆိုပါတယ်။
အပင်ပန်းခံနိုင်ပြီး လုပ်ငန်းကျွမ်းကျင်သူတွေဆိုရင် တစ်ရက်လုပ်အားခ ကျပ်ငွေ နှစ်သိန်း ကနေ သုံးကျပ်ထိ ဝင်ငွေရနိုင်တယ် ဆိုပေမယ့် ပြောသလောက် မလွယ်ကူဘူးလို့ဆိုပါတယ်။
ဘာသာစကား အခက်အခဲပေါ်မူတည်ပြီး လုပ်အားခခေါင်းပုံဖြတ်တဲ့ လုပ်ရပ်တွေလည်းလုပ်ငန်းခွင်မှာရှိနေပါတယ်၊ လုပ်အားခကို နေ့စဉ်ရှင်းပေးတာရှိသလို ၁၀ ရက်တစ်ခါ၊ တစ်လတစ်ခါ ရှင်းပေးတာမျိုးလည်းရှိရာမှာ တရုတ်ဘာသာစကားတတ်တဲ့ အလုပ်သမားခေါင်းဆောင်က လုပ်သားတချို့ကို လုပ်အားခပြန်ရှင်းပေးတာမျိုးမရှိဘူးလို့ ဆိုပါတယ်။
“ ကျွန်တော် တစ်လခွဲစာ မရလို့ တောင်းတာကို ခေါင်းဆောင်က နေ့ရွှေ့ ညရွှေ့နဲ့ ၊ ခြံဘက်က အကြေပေးပြီးပြီလို့ ပြောတယ်၊ ပင်ပန်းပြီးမရဘူးဗျာ” လို့ပြောပါတယ်။
အခုရက်ပိုင်း လောက်ကိုင်၊ ပန်ဆန်း၊ ဆီလူးနဲ့ မိုင်းလားဒေသတွေမှာ ကြံခင်းလုပ်သား အများအပြား လိုအပ်နေတယ်လို့သိရှိရပါတယ်။
MK-012
#MekongNews
