မိုဆိုရွာအနီး အစုလိုက်အပြုံလိုက် မီးရှို့သတ်ခံရတဲ့ဖြစ်စဉ် ဒီနေ့ သုံးနှစ်ပြည့်ပြီ
အပြည်ပြည်ဆိုင်ရာတရားရုံးမှာ တရားမျှတမှုဖော်ဆောင်နိုင်ရေး KSCC ကြိုးပမ်းနေ
မဲခေါင်၊ ဒီဇင်ဘာ ၂၄
ဒီကနေ့ သုံးနှစ်ပြည့်ပြီဖြစ်တဲ့ မိုဆိုရွာဖြစ်စဉ်နဲ့ပတ်သက်ပြီး အပြည်ပြည်ဆိုင်ရာ တရားရုံးမှာ တရားမျှတမှုဖော်ဆောင်နိုင်ရေးအတွက် ကရင်နီပြည် အတိုင်ပင်ခံကောင်စီ (KSCC)အနေနဲ့ သက်ဆိုင်ရာအဖွဲ့အစည်းတွေနဲ့ စဉ်ဆက်မပြတ် ပူးပေါင်းကြိုးပမ်းလုပ်ဆောင်နေတယ်လို့ အဲ့ဒီကောင်စီက ဒီနေ့( ဒီဇင်ဘာ ၂၄)မနက်ပိုင်းမှာ ထုတ်ပြန်ပါတယ်။
၂၀၂၁ ခုနှစ်၊ ဒီဇင်ဘာ ၂၄ ရက်က ကရင်နီပြည်၊ ဖရူဆိုမြို့နယ်၊ မိုဆိုကျေးရွာအနီး နယ်ခြားစောင့်တပ် (၁၀၀၄)မှ တပ်ဖွဲ့၀င်လေးဦးအပါအဝင် စစ်ဘေးရှောင် ရွာသား ၃၅ ဦးကို စစ်ကောင်စီရဲ့ တပ်မ (၆၆) လက်အောက်ခံ၊ ဓနုဖြူတပ်ရင်း ခမရ (၁၀၈) က အဓမ္မဖမ်းဆီးပြီး ဒန်ပါကား သုံးစီး၊ ကားငယ် သုံးစီး၊ ထော်လာဂျီအပါအ၀င်ဆိုင်ကယ် ငါးစီးတို့နဲ့အတူ အရှင်လတ်လတ် အစုလိုက်အပြုံလိုက် မီးရှို့သတ်ဖြတ်ခဲ့တာပါ။
စစ်ကောင်စီရဲ့ လူမျိုးတုံးသတ်ဖြတ်မှုနဲ့ စစ်ရာဇ၀တ်မှုကျူးလွန်တာတွေကို နိုင်ငံတကာအဖွဲ့အစည်းတွေအနေနဲ့ အားပေးထောက်ခံတဲ့ လုပ်ရပ်တွေ ရှောင်ကျဉ်ပြီး လူမျိုးတုံးသတ်ဖြတ်မှုကို တားဆီးဖို့နဲ့ ပြည်သူတွေအပေါ်အကြမ်းဖက်တိုက်ခိုက်မှု ပပျောက်အောင် လူ့အခွင့်အရေးစံနှုန်းတွေကို အကောင်အထည်ဖော် မြင့်တင်ဆောင်ရွက်ကာ တရားမျှတမှုရရှိရေး၊ ပြန်လည်ကုစားမှုရရှိရေး လမ်းကြောင်းတွေ ဖော်ဆောင်သွားဖို့လိုအပ်တယ်လို့ ကရင်ပြည်နယ်အတိုင်ပင်ခံကောင်စီက တိုက်တွန်းထားပါတယ်။
မိုဆိုရွာဖြစ်စဉ်အပါအဝင် ရီခီးဘူး စစ်ရှောင်ပြည်သူတွေကို လေယာဉ်နဲ့ ဗုံးကြဲတဲ့ မတရားလုပ်ရပ်တွေကို စိတ်နာပြီး စစ်ကောင်စီကို ပြန်လည်တိုက်ခိုက်ဖို့ ရည်ရွယ်ချက်နဲ့ ၂၀၂၂ ခုနှစ်၊ ဇန်န၀ါရီ ၂၂ ရက်မှာ ဖရူဆိုမြို့နယ်အခြေစိုက် စစ်ကောင်စီတပ်ရင်းတစ်ခုက တပ်ကြပ် ရာထူးရှိတဲ့ အသက် (၄၉) နှစ်အရွယ် ရဲဘော်တစ်ဦး ဖရူဆိုပြည်သူ့ကာကွယ်ရေးတပ်ဖွဲ့ (ဖရူဆို PDF) ထံ လက်နက်နဲ့တကွ အလင်း၀င်လာခဲ့ပါသေးတယ်။
၂၀၂၂ ခုနှစ်၊ ဇန်နဝါရီ ၁၆ ရက်ညမှာ ဒီးမော့ဆိုအနောက်ဖက်ခြမ်း နန်းမယ်ခုံနဲ့ ဖရူဆိုမြို့ အနောက်ဘက်ခြမ်း ရီခီးဘူး စစ်ရှောင်စခန်းကို တိုက်လေယာဉ်နဲ့ ဗုံးကြဲတာကြောင့် စစ်ရှောင်စခန်းမှ ကလေးငယ်အပါအ၀င် သုံးဦးနဲ့ ဆေး၀န်ထမ်း သုံးဦးကျဆုံးခဲ့ပါတယ်။
ဒီအပြင် စစ်ကောင်စီက ကရင်နီပြည်နယ်အတွင်း နေရပ်စွန့်ခွာပြီး စစ်ဘေးရှောင်နေတဲ့ ပြည်သူတွေကို လူမျိုးတုံး သတ်ဖြတ်မှုနဲ့ နေ့စဉ်အသက်ရှင်နေထိုင်မှုဘ၀ ခက်ခဲစေရန် လေကြောင်းအပါအဝင် လက်နက်ကြီးနဲ့ ပစ်မှတ်ထားတိုက်ခိုက်တာကို ဒီနေ့ထိ နေ့စဉ်နဲ့အမျှ ပြုလုပ်လျှက်ရှိတယ်လို့ ဆိုပါတယ်။
ဒီအတွက် ကရင်နီပြည်သူတွေအနေနဲ့ အလားတူအဖြစ်အပျက်မျိုးမှ ရှောင်ကျဉ်နိုင်ရေး စစ်ကောင်စီရဲ့ လှုပ်ရှား ဆောင်ရွက်မှုတွေကို သတိထား စောင့်ကြည့်ကြဖို့နဲ့ စစ်ကောင်စီ တပ်ဖွဲ့၀င်တွေနဲ့ ထိတ်တိုက်တွေ့ဆုံမှုတွေကို ရှောင်ရှားကြဖို့ ကရင်နီပြည်နယ်အတိုင်ပင်ခံကောင်စီ (KSCC) က ပြည်သူတွေကို တိုက်တွန်းပြောကြားပါတယ်။
CJ-017
#MekongNews
ဓါတ်ပုံ။ ဖြစ်စဉ်မှတ်တမ်းပုံဟောင်း
