ဟိုပုံးတိုးဂိတ်အနီးရှိ စစ်ကောင်စီဂိတ် ရိုင်းပျတဲ့ဆက်ဆံရေးနဲ့ ငွေအတောင်းကြမ်းနေ
မဲခေါင်၊ ဒီဇင်ဘာ ၁၈
ရှမ်းပြည်တောင်ပိုင်း၊ ဟိုပုံးမြို့ တိုးဂိတ်အကျော်မှာရှိတဲ့ စစ်ကောင်စီဂိတ်စောင့်အရာရှိကိုယ်တိုင် ယာဉ်မောင်းတွေကို ရိုင်းပျတဲ့ဆက်ဆံရေးနဲ့ ဂိတ်ကြေးအဆမတန်တောင်းယူတာမျိုးတွေ ပြုလုပ်နေတယ်လို့ ကုန်တင်ကားသမားတွေကပြောပါတယ်။
အဲ့ဒိဂိတ်မှာ အရင်ကကျပ်တစ်ထောင်ပေးသာပေးရပြီး မကြာသေးခင်က ကျပ်ငါးထောင် အထိ တိုးမြှင့်ကောက်ခံရာကနေ ရိုင်းပျစွာဆက်ဆံတတ်တဲ့ အရာရှိရောက်လာမှ ကုန်ကားတစ်စီးကို ကျပ်ငါးသောင်း(၅၀၀၀၀ကျပ်)တောင်းတယ်လို့ ပြောပါတယ်။
“ စျေးဆစ်ရင် နှစ်ဆပေးရမယ်၊ မပေးရင်ရပ်ထား၊ မင်းတို့ကောင်တွေကို ဘာမှသောက်ဂရုမစိုက်ဘူး” လို့ ပြောကြောင်း ယာဉ်မောင်းတစ်ဦးက ပြောပါတယ်။
တခြား စစ်ကောင်စီဂိတ်တွေမှာ အရာရှိကိုယ်တိုင် ဂိတ်ကြေးကောက်ခံတာမျိုးမရှိပဲ အဲ့ဒိဂိတ်မှာသာ အရာရှိကိုယ်တိုင် ဂိတ်ကြေးတောင်းတာဖြစ်ပြီး အဲ့ဒိအရာရှိဟာ အသက်ငယ်ရွယ်သူမို့ ကျောင်းဆင်းကာစ ဖြစ်နိုင်တယ်လို့ယာဉ်မောင်းတွေက ခန့်မှန်းပါတယ်။
“ကျွန်တော်ဆို အသက်၆၀ ရှိပြီ၊ ဆံပင်ဖြူနေတာတောင် ဟေ့ကားသမား မင်းဆင်းလာခဲ့၊ စပယ်ယာနဲ့ပေးခိုင်းရအောင် ငါကအရာရှိကွ၊ မင်းကိုယ်တိုင်လာခဲ့ လို့ခေါ်ခံရတာ၊ အနားရောက်တော့ ရိုက်မလိုပုံစံနဲ့ ပြောတာ” လို့အခြားကားသမား တစ်ဦးကပြောပါတယ်။
တောင်ကြီး-ကျိုင်းတုံ-တာချီလိတ်ကားလမ်းမှာ နမ့်စန်အထိ ဂိတ်များစွာရှိကာ တစ်ဂိတ်မှာ ရဲ၊ လဝက၊ မူးယစ်၊ သစ်တော၊ စသုံးလုံး စတဲ့ဌာနတစ်ခုကို အနည်းဆုံး ကျပ်ငါးထောင်( ၅၀၀၀ကျပ်) ကနေ ကျပ်တစ်သောင်း (၁၀၀၀ ကျပ်) အထိ ပေးနေရတယ်လို့ပြောပါတယ်။
တောင်ကြီး – နမ့်စန် – ကျိုင်းတုံ- တာချီလိတ်ပြည်ထောင်စု ကားလမ်းပေါ်က ဂိတ်တွေအနက် တောင်ကြီး-နမ့်စန်ကြားမှာရှိတဲ့ ဂိတ်၂၀ ဘခန့်မှာဆက်ဆံရေးနဲ့ငွေတောင်းအဆိုးဆုံးဖြစ်ပြီး နမ့်စန်-ကျိုင်းတုံကြားမှာတော့ တာကော်တံတားစုပေါင်းဂိတ်က အဆိုးဆုံးဖြစ်တယ်လို့ ကုန်ကားနဲ့ခရီးသည်တင် ယာဉ်မောင်းတွေက ပြောပါတယ်။
MK-012
#MekongNews
