ကိုးကန့်ဒေသကို ချက်ထားတဲ့ ဟင်းကအစ ‘ဝ’ က ပေးမသယ်
မဲခေါင်၊ ဒီဇင်ဘာ ၁၂
MNDAA ထိန်းချုပ်ထားတဲ့ ကွမ်းလုံမြို့နယ်ကို တစ်ကိုယ်ရည်သုံးပစ္စည်းကလွဲပြီး ချက်ထားတဲ့ဟင်းကအစ ‘ဝ’ (UWSA) က ပေးမသယ်ကြောင်း ဒေသတွင်းသတင်းရင်းမြစ်တွေက ပြောပါတယ်။
ဟိုပန်မြို့နယ်ကနေ ကွမ်းလုံမြို့နယ် သွားရောက်ကြမယ့် ဒေသခံတွေကို UWSA က အစားအသောက်တွေ၊ ကုန်စိမ်းသားငါးတွေ၊ မုန့်အပါအဝင် ချက်ပြုတ်ထားတဲ့ဟင်းကအစ ပေးမသယ်ပဲ သယ်ဆောင်လာတဲ့ ပစ္စည်းတွေကို စစ်ဆေးရေးဂိတ်နဲ့ ချောင်းထဲ စွန့်ပစ်လိုက်တာ၊ သိမ်းဆည်းတာ၊ သယ်ဆောင်လာသူတွေကို လှည့်ပြန်ခိုင်းတာတွေ ရှိနေတယ်လို့ ဆိုပါတယ်။
‘ဝ’ နဲ့ကိုးကန့် ကုန်ပစ္စည်းသယ်ယူခွင့်ကို အပြန်အလှန် ကန့်သတ်နေကြတာဖြစ်ပေမယ့် ချက်ထားတဲ့ ဟင်းသယ်မရတဲ့အထိ ‘ဝ’ဘက်ကပိုမိုတင်းကြပ်တာဖြစ်ပါတယ်။ သူတို့ လက်နက်ကိုင်နှစ်ဖွဲ့ကြောင့် ကြားကပြည်သူတွေ ဒုက္ခကြီးမားလာကြောင်း မဲခေါင်က ဒီဇင်ဘာ၂ ရက်မှာ သတင်းဖေါ်ပြဖူးပါတယ်။
“ အမျိုးတွေဆီသွားလည်မယ်ဆိုရင် မုန့်ထုပ်တွေ၊ အချိုရည်ဘူးတွေအစ ယူသွားလို့ မရဘူး၊ ဟင်းတွေယူသွားပြီး အမျိုးတွေကို သွားကျွေးချင်တယ်ဆိုရင်တောင်မှ ပေးမသယ်ဘူး၊ ဂိတ်မှာရဲမေ စစ်ဆေးရေးတွေ တော်တော်တင်းကြပ်ထားတယ်”လို့ သတင်းရင်းမြစ်တယောက်က မဲခေါင်သတင်းဌာနကို ပြောပါတယ်။
၁၀၂၇ စစ်ဆင်ရေး ဒုတိယလှိုင်းကာလကတည်းက ‘ဝ’တပ် ( UWSA ) ထိန်းချုပ်ထားတဲ့ ဟိုပန်မြို့နယ်၊ ဖောင်ဆိပ်ဂိတ်ကနေ ကိုးကန့်ဒေသဘက်ကို ကုန်ပစ္စည်း သယ်ယူတာတွေ တားမြစ်ထားတာဖြစ်ပေမယ့် တပိုင်တနိုင်သယ်ယူခွင့်ကိုတော့ ခွင့်ပြုထားတာဖြစ်ပြီး လက်ရှိမှာတော့ တပိုင်တနိုင်သယ်ယူလာတဲ့ စားသောက်ကုန်၊ ဆေးဝါးစတဲ့ ပစ္စည်းတွေကို ဘာတစ်ခုမှ ပေးမသယ်တော့တာ ဖြစ်တယ်လို့ သိရပါတယ်။
ကိုးကန့်ဘက်ကလည်း ပြီးခဲ့တဲ့ နိုဝင်ဘာ နောက်ဆုံးပတ်က စတင်ပြီး ဟိုပန်မြို့နယ်ထဲကို ဟင်းသီးဟင်းရွက်တွေ သွားရောက်ရောင်းချတာကို ပိတ်ပင်လိုက်တာကြောင့် ဒေသတွင်းမှာ ဟင်းသီးဟင်းရွက် ဈေးနှုန်းကြီးမြင့်မှုနဲ့ ကုန်စိမ်းရှားပါးမှုဒဏ်တွေကို ဟိုပန်ဒေသခံတွေ ခံစားနေရတယ်လို့ ဆိုပါတယ်။
“ဒီအချိန်ဆို ရေလည်ကျွန်းကစိုက်ထားတဲ့ ဟင်းသီးဟင်းရွက်တွေ ထွက်နေပြီလေ၊ ဒါကို ဟိုပန်တို့၊ နမ့်တစ်တို့ဖက်ကို သွားရောင်းကြတာ၊ မိုးမလင်းဈေးလို့ ခေါ်တာပေါ့၊ ဒါကို ကိုးကန့်ဖက်က ပိတ်လိုက်တော့ ဝမ်းရေးအတွက် နည်းနည်းခက်တာပေါ့၊ အခုဆို ပဲရွက်၊ ဖရုံသီး၊ မှုံညှင်း၊ နံနံပင်တွေ ထွက်နေပြီ၊ ဒါတွေကို ဟိုပန်ဖက်၊ နမ့်တစ်ဖက်မှာ သွားရောင်းရင် ငွေပိုရတယ်လေ”လို့ ကွမ်းလုံဒေသခံ တစ်ယောက်က မဲခေါင်သတင်းဌာနကို ပြောပါတယ်။
CJ-003
#MekongNews
