တရုတ် အငှားမယားဈေးကွက် ပြန်လည်ဦးမော့လာ
နယ်စပ်က အမျိုးသမီးငယ်တွေကို ပစ်မှတ်ထား ခေါ်ယူနေ
မဲခေါင် ၊ ဒီဇင်ဘာ ၆
ကျားဖြန့်ငွေလိမ်ဂိုဏ်းတွေ ပြည်တွင်းပြန်ဝင်လာပြီးနောက် နယ်စပ်ဒေသတွေက အမျိုးသမီးငယ်တွေကို တရုတ်အပျော်မယားလုပ်ဖို့ ဆိုရှယ်မီဒီယာကနေ ပစ်မှတ်ထား ခေါ်ယူနေတာတွေ ရှိနေတယ်လို့ သိရပါတယ်။
အခုနှစ်စပိုင်းမှာ မြန်မာနိုင်ငံနယ်စပ်ဒေသတွေမှာအခြေစိုက်တဲ့ တရုတ်ကျားဖြန့်ငွေလိမ်ဂိုဏ်းတွေကို တရုတ်နိုင်ငံက နယ်စပ်မြို့တွေအထိ ဝင်ရောက်ဖမ်းဆီးပြီးတဲ့နောက်ပိုင်း အငှါးမယားဈေးကွက် ရပ်တန့်သလောက်ဖြစ်သွားပေမယ့် အခု နိုဝင်ဘာ၊ ဒီဇင်ဘာလအတွင်း ငွေလိမ်ဂိုဏ်းတွေ ပြည်တွင်းပြန်လည်ဝင်ရောက်လာတာနဲ့အတူ အငှားမယားဈေးကွက်လည်း ပြန်လည်ဦးမော့လာတာ ဖြစ်ပါတယ်။
အမျိုးသမီးငယ်တွေကို တစ်လကို တရုတ်ယွမ် ၁၅၀၀၀ လောက်နဲ့ အပျော်မယားလုပ်ဆောင်ဖို့ ဆိုရှယ်မီဒီယာကနေ အကောင်တုတွေအသုံးပြုပြီး စာလိုက်ပို့နေတာ ဖြစ်ပါတယ်။
တစ်ချို့ အမျိုးသမီးတွေကို နယ်စပ်မြို့တွေဖြစ်တဲ့ တာချီလိတ်၊ မိုင်းပေါက်၊ ပန်ဆန်းမြို့တွေက တရုတ်နိုင်ငံသားတွေနဲ့ အတူနေထိုင်ရတာတွေရှိပြီး တချို့ကိုတော့တရုတ်နိုင်ငံအတွင်းက ကျေးရွာတွေက အမျိုးသားတွေနဲ့ အငှါးမယားအဖြစ် ခြောက်လပြတ်နဲ့ သွားနေထိုင်ရတာတွေလဲ ရှိနေပါတယ်။
“တစ်ချို့က တာချီလိတ်မြို့ထဲက တရုတ်တွေအလုပ်လုပ်နေတဲ့ ကုမ္ပဏီဝန်းထဲမှာ သူတို့နဲ့ သွားနေရတယ်၊ တစ်ချို့ကြတော့ တရုတ်ပြည်ထဲထိ လိုက်သွားရတယ်၊ တောလမ်းကနေခိုးဝင်သွားရတာလို့ပြောတယ်၊ တရုတ်ရဲဖမ်းခံရရင် အချုပ်ထဲ ခြောက်လလောက်နေပြီး မန္တလေးဘက်ကိုပြန်ပို့တာ”လို့ တရုတ်ပြည်တွင်းထိ အငှားမယားသွားလုပ်ဖူးသူ အမျိုးသမီးတစ်ဦးက ပြောပါတယ်။
တရုတ် အငှါးမယားလုပ်ဖို့ ပစ်မှတ်ထားခေါ်ယူခံရသူ အမျိုးသမီးငယ်အများစုက KTV မှာ ဟိုင်းမယ် လုပ်ဖူးသူတွေနဲ့ နယ်စပ်မြို့တွေမှာ SexWorker လုပ်ဖူးသူအမျိုးသမီးငယ်တွေ ဖြစ်နေတယ်လို့ သိရပါတယ်။
တရုတ်ပြည်တွင်းရောက်ရှိသွားသူတွေအနေနဲ့ ပွဲစားကသတ်မှတ်ထားတဲ့ လုပ်ခလစာထဲက စရန်အနေနဲ့လစာ ယွမ် ၃၀၀၀၀ လောက်ကို ထုတ်ပေးထားပြီး သတ်မှတ်တဲ့လပြည့်မှ ကျန်ငွေကိုထုတ်ပေးပြီး အငှါးမယားလုပ်နေသူ အမျိုးသားထံ လာရောက်ခေါ်ယူတာဖြစ်တယ်လို့ သိရပါတယ်။
ရှမ်းပြည်နယ်အတွင်းက မူဆယ်၊ တာချီလိတ်နဲ “ဝ”ဒေသအတွင်းက မိုင်းပေါက်မြို့တွေကနေ ပွဲစားအဆင့်ဆင့်နဲ့ အငှါးမယားလုပ်တဲ့ လုပ်ငန်းဟာ ၂၀၂၁ စစ်တပ်က အာဏာသိမ်းပြီးနောက်ပိုင်း ပိုမိုကျယ်ပြန်လာတာ ဖြစ်ပါတယ်။
MK-002
#MeKongNews
