ရေလွှမ်းခဲ့တဲ့ နန်းမယ်ခုံဒေသ ခုချိန်ထိ ရေပြန်မကျသေး
မဲခေါင်၊ နိုဝင်ဘာ ၂၁
အခုနှစ် မိုးရာသီ စက်တင်ဘာလကစပြီး မိုးဗြဲရေကာတာဖောက်ချတာနဲ့ မိုးအဆက်မပြတ် ရွာသွန်းတာတွေကြောင့် ရေကြီးရေလျှံဖြစ်ပေါ်ခဲ့တဲ့ ကရင်နီပြည်၊ နန်းမယ်ခုံကျေးရွာတွေထဲမှာ ခုချိန်ထိရေပြန်မကျသေးဘူးလို့ ဒေသခံတွေဆီက သိရပါတယ်။
နေအိမ်တွေ နစ်မြုပ်ပြီး ပင်လယ်လိုဖြစ်ပေါ်နေရင်းကနေ တဖြည်းဖြည်းရေကျလာတယ်ဆိုပေမယ့် ရေကခုချိန်ထိ ၆ပေ စာလောက် ရှိနေသေးတယ်လို့ဆိုပါတယ်။
” အောက်ထပ်က ရေမြုပ်နေတုန်းပဲ၊ အပေါ်ထပ်မှာပဲနေနေရတာပေါ့။ “လို့ ဖောင်းတောကျေးရွာက ဒေသခံက ပြောပါတယ်။
နန်းမယ်ခုံမြို့နယ်က ဘုရားဖြူ၊ ဘုရားနီ၊ ဖောင်းတောကျေးရွာတွေဟာ ရေနစ်မြုပ်မှုဒဏ်ကို ဆိုးရွားစွာ ခံစားခဲ့ရပြီး သီးနှံတွေနဲ့ စပါးဧကထောင်ချီလည်း ပျက်စီးခဲ့ရတဲ့အပြင် နေအိမ်တွေ ပျက်စီးဆွေးမြေ့တာတွေ ကြုံနေရတယ်လို့ သိရပါတယ်။
“နေလို့မရတဲ့ အိမ်တွေက ဘုန်းကြီးကျောင်းမှာနေရတာပေါ့၊ အခက်အခဲက လှေနဲ့သွားနေရတာပေါ့နော်၊ ကုန်းပေါ်ကျတော့လည်း ကားတွေကမရှိဘူး”လို့ အားမာန်သစ်ပရဟိတအသင်းက အဖွဲ့ဝင်တယောက်က ပြောပါတယ်။
ရေကြီးနေတဲ့အတွက် စီးပွားရေးလုပ်ကိုင်စားသောက်ဖို့အဆင်မပြေဘဲ ပြည်သူတွေက လှူဒါန်းတာကို အားကိုးနေရပြီး ကန်စွန်းရွက်ခူးရောင်းတာ၊ ငါးဖမ်းတာတွေနဲ့ ဖြတ်သန်းနေရတယ်လို့ သိရပါတယ်။
ခုလက်ရှိမှာ စစ်ကောင်စီတပ်က စစ်ကြောင်းထိုးနိုင်တဲ့အခြေနေတွေလည်း ရှိနေတာကြောင့် ဒေသခံတွေအနေနဲ့ ရေမကျသေးတဲ့ဒုက္ခအပြင် စစ်ဘေးအတွက်ပါ ပူပန်နေကြရပါတယ်။
ဓါတ်ပုံ။ ရေပြန်မကျသေးတဲ့ လက်ရှိအခြေအနေ၊ ဒေသခံမှပေးပို့။
CJ-004
#MekongNews
